Gam saong bruk daong di karja, urang bhapbini di Buôn Mih, xã Đắk Nuê, huyện Lắk, tỉnh Đak Lak hu alin brei 2.300m2 taneh, 1.000 harei ngak bruk piah peih praong saong tuh bê tông canah jalan 4km dalam  buôn. Jalan ini dahlau diah bilan pandiak lac dhur mun par sup lingik, hajan ye gluh baok, urak ini praong, laneng, mbuan lagaih ka bruk pablei salih, pajeng ba kaya nong… Ông Y Bhem Du, akaok Buôn Mih brei thau, puac thun 2016, xã Đắk Nuê patabik bruk ngak jalan nao mai dalam palei, taong abih urang bhapbini jeng pachreih tui abih hatai rik pren yava jien padai tame ngak, hadei di 2 bilan, jalan hu ngak blaoh ba tame pandar ba mbuan lagaih ka mikva dom buôn nao mai:  "Dahalu daih jalan ini lac jalan haluk kan nao, bilan hajan lac gluh baok ndik radaih nao takai jeng tanyait tanyot gluh baok kan si nao, urak ini Đảng, karja sangka brei mikva ngak jalan ini lac jalan praong di buôn Trinh glaong jeng nao jalan ini, Buôn Mih jeng buôn chính, Buôn Tham 1 jeng nao jalan ini, lac jalan praong"

Oh lac khang kajap, hu tuh menyek, tuh bê tông, rah tui dua gah jalan daok hu dom bingu rilo sambo màu hadah mekre meng plak tangin pasang iek di abih menuac dalam palei, meng urang taha tal uranaih. Lac urang taha dalam palei, amuk Trần Thị Thành lac urang nao dahlau dalam bruk pala jeng jalan bingu di palei 3, xã Ea Kpam, huyện Cư Mgar. Dom janih bingu dalam bein, urak ini hu pilih ruah ba mai pala, pasang iek tapeng dua gah jalan bê tông pambuak dom palei, dom xã ngak brei patagok jang pren barau ka dom baoh jalan: "Dahlak mboh bingu halei gheih lac likau mai pala, thun dahlau ngak jalan bloh dahlak mboh anek taco dahlak ba bingu mai pala sa talei, dahlak lac brei ka amuk hasit dahlak ba mai pala abih. Bingu nerak mboh sang drei jeng hadah, jalan jeng gheih mekre, haci hacih.

-Tui kuhria di Ủy ban bhapbini tỉnh Đắk Lắk, thun 2017, urang bhapbini di dom puk palei dalam tỉnh hu rik daong labaih 120 tỷ đồng, alin brei labaih 80.000 m2 taneh, rik labaih 49.000 harei ngak piah  padang cơ sở vật chất hạ tầng palei pala. Dalam nan, dom puk palei hu ngak barau labaih 640 km jalan bê tông, 102 km jalan randaih; ramik pasiam labaih 243 km jalan puk, palei… Gam saong nan, rilo bruk ngak gheih jeng hu dom puk palei ngak yau ye Đoàn dam dara taduan ngak jalan nao mai di palei pala, kapul urang nong, urang kumei pataom tame ramik pasiam, khik caga jalan palei ngan saong dom bruk “ canah jalan tự quản”, “baoh jalan bingu urang kumei”... Taong abih dom bruk ngak siam nan hu jeng bruk gheih mekre pambak praong tal rilo puk palei dalam tỉnh.

-Ông Vũ Văn Đông, Phó Giám đốc Sở ngak nong saong patagok palei pala, Chánh Văn phòng tacei ba danadak palei pala barau tỉnh Đăk Lắk brei thau, dom jalan mbak di palei pala ngak siam oh lac ba mbuan lagaih ka bruk nao mai, pajeng ba pandap panda, kaya nong di urang bhapbini bo daok peih tabiak jalan ka bruk patagok kinh te, ilimo xã hội… Kayua yau nan ye, Đắk Lắk tuk halei jeng kham merat ramik pasiam dom jalan mbak. UB bhapbini dom pakat hu patabiak rilo jalan daong, pachreih bhapbini ba gauk tame padang ngak palei pala barau:" Jalan ngak di tỉnh jeng ye mban tacei pato danakdak padang ngak palei pala barau jeng thau tiêu chí palei pala lac sa dalam dom tiêu chí praong njauk pataom tame ngak. Yau nan ye, tukvak tal pataom tame jak ba jien padai di karja jeng ye libik karei saong pren bhapbini piah padang ngak jalan mbak, abih di nyu nan lac bhum atah bayah, bhum kan kandah yau Mdrak, Ea sup, Lak, Krông Bông ini lac dom libik njauk ngak dahlau piah mbuan lagaih ka urang bhapbini nao mai saong patagok pala drak"

Meda ndom, dom jalan hu padang ngak tui danakdak bruk ngak negar ka palei pala barau lac dom jalan “ ý Đảng lòng dân”, daong ngak brei dak harei dak salih barau ia mbaok palei pala Đắk Lắk. Hu jalan barau jeng mbuan peih praong bruk pablei salih, urang bhapbini daok yam tal jaik jang raidiuk trei sir saong haniem phuan./.