Tui dom urang roh duah ilamu, adat tui darah gah amaik di urang Ê đê hu taong yaom lac hadah mekre di Việt Nam,  hu mboh cambaih tapa lakhah paga, dalam sang danaok di urang ê đê. urang kumei hu iek lac pô dalam baoh sang, brei panuac ka dom bruk praong dalam sang. harei ini, raidiuk di urang bangsa Ê đê hu salih birau tui jalan diuk pasang sumu gauk, dom bruk hit dalam sang hu daong gauk ngak.

Di nyaom biai, dom urang lambaok vakil hu pataom tame  ginum biai, klak rabha dom bruk yau: langyah tapa dom kadha dom bruk di adat tui darah gah amaik meng kan saong harei ini; likei kumei sumu gauk saong bruk khik ramik ilamu jeng yau adat cambat meng kan dalam sang urang kumei ê đê urak ini, bruk khik iek di karja gah patagok saong khik ramik ilamu meng kan di urang Ê đê. tiến sĩ bkrông tuyết nhung, gru pato di sang bac đại học tây nguyên mboh lac, bruk sahaneng ka adat tui darak gah amaik di urang Ê đê dalam ralo urang ê đê harei ini daok kurang khách quan, taong yaom oh ka njauk labik dang di urang kumei dalam dom bruk pmbuak pagam abih gah:

“ Hu oh takik urang kumei Ê Đê bo daok hu dom urang Ê đê sahaneng lac adat tui darah gah amaik di bangsa Ê đê oh siam gheih bo tui darah gah ame meng siam, nan ye ba tal bruk khin tapa mbaok urang kumei. Meyah khol drei sahaneng tantu, cambaic laic ye adat tui darah amaik di urang Ê đê jeng yau mẫu hệ di dom bangsa karei di Viet Nam saong dunya njauk iek praong urang kumei, urang kumei lac manuac pambuak bruk patagok raidiuk jeng yau bruk pato pakai, iek glang anek bik saong baoh sang.”

Langiu di nan, ralo urang lambaok mboh lac, raidiuk dom baoh sang jeng daok hu dom kan kandah, yau: adat pah likah glaong, daok sahaneng lac “ngak anek metau gah kumei oh hu quyền, nan ye oh hu trach nhiem”, ngak brei urang pasang oh ngak abih trach nhiem di drei dalm bruk daong gauk iek glang anek bik, sangka pato pakai anek bhik, patagok bruk ngak mbang. tapa bruk ngak brei cambaic laic dom asal kadha nan, meng bruk hu mboh hu thau di bhum palei, dom urang lambaok hu ba tabiak dom jalan ngak piah khik ramik dom ilamu siam gheih di adat tui darak gah amaik dalam tuk mbeik drei tame dunya yau urak ini.

 Muk Trần Thị Phong, Phó akaok Kapol urang kumei tỉnh Dak Lak brei thau, ini lac bruk ngak piah jhull pakhang bruk pathau khan, jak ba dak padang dom talei pambuak bruk dalam sang kumei bangsa takik hu sumu gauk, cak rok. Muk Trần Thị Phong lac:

“ Mẫu hệ Ê đê oh ka hu rilo urang thau cambaic ginup saong mboh abih dom hagit siam gheih di nyu, yau nan ye khol dahlak caong khin tapa nyaom biai ini dom urang kumei jeng yau kumei Ê đê hu thau saong brei hu dom bruk ngak lagaih piah rik tame patagok saong khik ramik dom ilamu siam gheih di adat tui darak gah amaik di bangsa Ê đê dalam samar ini.”

Bruk patagok dom siam gheih di adat tui drak gah amaik di urang Ê đê dalam samar birau oh lac rik tame khik ramik ilamu siam gheih di bangsa Ê đê dalam bruk dak padang raidiuk birau bo daok tah klak hu dom adat cambat klak oh lagaih daok kandaong veik dalam bhum palei; pambak praong dom baoh sang hu salih birau, sumu gauk, haniem siam./.