Meng akaok bilan 3 tal ini, sang saai H'nhíp Niê daok di palei K'bu, xã Hòa Khánh, ban sit Buôn Ma Thuột tuk halei jeng hu yaok pluh urang đoàn dam dara daong ngak dom bruk yau: rok taneh, takon kaik, lai xi-măng piah ngak sang. Saai H'nhíp Niê brei thau, rup sa-ai njauk jaoh jo, sang hu ralo anek, rai diuk kurang anak kurang likuk, nan ye oh khin saneng tal bruk ngak sang. Akaok bilan 3 ini, thành đoàn Buôn Ma Thuột jak ba rik pataom daong ka sang sa-ai 30 triệu đồng piah padang ngak sang labaih 60 m2, daong ka saai hu sa baoh sang. Saai H'nhíp Niê chreh chrai lac:

 “Sang hu ralo anek, dahlak njauk pandik takai nan ye sang kan kandah lô. Akaok thun 2017, dahlak hu brei thau lac hu daong jien ngak sang meng jien kayua thành đoàn Buôn Ma Thuột jak ba; gam saong nan lac dom urang đoàn mai daong dom  jang ngak jaik bloh sang. Oh hu urang đoàn saong urang dang akaok gah đoàn ban Buôn Ma Thuột ye oh thau habiar dahlak meng hu sang daok, ndua dhar phon dom urang đoàn, urang dang akaok thành đoàn Buôn Ma Thuột."

Daok di huyện Krông Ana, saai Lê Thị Thanh Thảo, Bí thư huyện đoàn brei thau, hadei di tuk peih bilan dam dara, taong abih dom chi hội cơ sở hu ba tangin tame peih ngak dom công trình, bruk ngak dam dara. Tal urak ini, hu labaih 850 urang đoàn dam dara brei darah ngak pahala, yaok ribau urang đoàn rik daong harei lao động, daong ngak sang jum pataom, ngak tatua tapa craoh, ngak jalan mbak palei pala, puh ramik hacih sa-at palei pala, pala phun kayau… Gam saong nan lac jak ba doanh nghiệp, urang ngak pahala rik daong jien padai, pandap panda yaom jaik 200 triệu đồng piah ngak dom bruk an sinh-xã hội. Saai Lê Thị Thanh Thảo lac:

 “Peih bilan dam dara thun 2017, kol dahlak hu peih bruk padang ngak sa mblang bóng chuyền di buôn K'Tăl,  xã Ea Bông yaom labaih 12 triệu đồng. Patui di nan, peih bruk brei darah ngak pahala thun 2017, gam saong nan peih ngak dom công trình bruk ngak dam dara daok veik di thun 2017. Likau daong 59 tấn xi-măng meng dom doanh nghiệp dalam huyện piah padang ngak jalan mbak palei pala barau, taong abih dom urang đoàn jeng hu mbaok pachreih tui biak abih hatai jai”. 

Kuhria tal tukvak ini, dom cơ sở đoàn Đắk Lắk pala hu jaik 100 ribau phun kayau dom janih, jhul khang dom bruk ngak “harei car halan hatian”, “harei adit hijao”, peih bruk diễu hành mong baoh taneh, peih pakak pagam biển công trình dam dara “truac hadah jalan palei” ngan saong 50 km jalan điện di dom puk palei, peih bruk taom gaok bilan pakacah, tư vấn hướng nghiệp. Abih di nyu nan lac dalam chiến dịch dam dara halan hatian, dam dara Đắk Lắk hu ngak 4 công trình pakat tỉnh lac: ngak hệ thống halang ia hacih, rok kraong ribaong, padang ngak sang khăn quàng đỏ, padang ngak 15 mblang bóng chuyền di 15 huyện ban sit, rivang - alin pandap ka dom baoh sang sarak karja, thương bệnh binh ngan saong yaom jien labaih 1,2 tỷ đồng; labaih 123 ribau urang đoàn di tỉnh hu mbaok tame bruk brei drah ngak pahala. Saai Y Nhuân Byă, Bí thư tỉnh Đoàn Đắk Lắk brei thau, dam dara lac kapul ba akaok nao dahlau dalam dom bruk ngak tui kadha “labik halei caong khin - dam dara hu mbaok, labik halei kan kandah – hu mbaok dam dara”.

Meda lac, dom bruk ba akaok nao dahlau, halan hatian di kapul urang đoàn dam dara tỉnh Đắk Lắk hu daong ka bhap bini dalam tỉnh jia tame jang ka sa rai rah dam dara, chreih chrai, naih gheih, ngak bruk kỷ luật saong kein laba, diuk rai abih drei ka menuac sia. Bruk ba tangin tame di dam dara Đắk Lắk meng dom công trình, bruk ngak cambaih laih hu rik daong gam saong kajar palei hong bhap bini puk palei peih ngak hu kein laba danak dak padang ngak palei pala barau./.