Khaol dahlak mai veik huyện Ea Súp saong Buôn Đôn (tỉnh Đăk Lăk) tuk bahrau tame bilan tabau. Taphia dom mblang tabau meda glaong tapa akaok manuac, hu ralo mblang tabau thu, jaleih kayua taha. Saai Đinh Thị Hằng, thôn 11, xã Ya Tơ Mốt, huyện Ea Súp brei thau, phun tabau hu pala ralo di ini meng thun 2017. Tuk nan, phun tabau hu mong lac jalan ngak mbang siam abih di mikva, kayua hu Công ty Cổ phần tabau saradang Đăk Lăk buh phun jien saong blei veik abih phun tabau pala hu. Min tal thun ini, phun tabau jeng bruk kan kandah prong abih. Mbang ép tabau thun 2018 salah bloh labaih 1 bilan ini mai min jeng daok biak ralo tabau oh ka hu kaoh mek, njauk caik metai taha langiu hamu. Yaom lac urang nong saong sang mac hu mboh tangin pambuak bruk blei tabau min tui sa-ai Hằng, pambuak bruk tui jalan yau Yuan lac “đánh trống bỏ dùi” daok ngak ka urang pandik akaok jang: Sang dahlak hu sa héc ta oh ka kaoh hu. Urak ini hajan trun ye takuh blaoh ralo janih karei nyu mbang. Tal puac thun bo kaoh ye oh daok hagait tra... Min sang mac jeng lac puac bilan 11 ye blei tabau dahlak dahlau saong daong yaok ha 3triệu, ye oh samu phun jien drei buh tabiak ngak sa sào. Jeng hu sang dalam diah,  kaoh blaoh min klaak oh mek hu tra kayua lac hajan janal, nan ye klaak sraoh. Urak ini, hadei di sa thun ngak bo oh hu sa đồng halei tame kadung, daok tavak sre sang mac, blaoh nao mesre jien laba amaik caih laba anek...

Jaik taphia haong Ea Súp nan lac huyện Buôn Đôn,bhum pala tabua praong ka dua di Công ty Cổ phần saradang Đăk Lăk. Pak ini, bruk nan jeng oh hagait siam jang, tuk hu ralo urang nong duah mai tal UBND pakat xã khiếu nại bruk công ty oh blei tui harak pambuak bruk, caik ka tabau metai nao kayua taha. Ong Buôn Săn Viêng, daok di buôn Yang Lành, xã Krong Na, huyện Buôn Đôn brei thau, ong jeng oh ka mek tame hu sa phun halei dalam 2 héc ta tabau di baoh sang, công ty njauk taduan sa binah khat lahik: Sang dahlak hu 2 hecta tabau. Tal harei ini tabau jaleih abih, phun metai blaoh tamuh chồi ini diah bak abih. Bo sang mac oh daok blei tra. Sang mac kareik pabah mbang paje, tabau taha blaoh hu thei blei tra. Dahlak hu mbaoh tangin pambuak bruk haong công ty. Tui  nan tabau kaoh meng bilan 11 tal bilan 5 ye salah bloh.. Min urak ini tapa 2 bilan paje, nan ye bhap bani khaol dahlak meng  tagok xã tangi sua  lac ngak habar piah ka công ty langyah ka bhap bani hu siam mekre.

Jeng njauk khat lahik  yau ong Buôn Săn Viêng, amuk H’Sồi ÊBan, daok di buôn Drêch A, xã Krong Na ndom lac, bruk doanh nghiệp kareik pabah mbang sang mac, oh blei tabau di urang nong lac ngak suan hợp đồng hu mboh tangin blaoh. Hadei di tuk ngak cambaih trách nhiệm di doanh nghiệp, sang amuk meda thanh lý hợp đồng, yah klaak phun tabau piah pala janih phun karei: Sang dahlak hu labaih  2 hecta, urak ini meyah công ty oh blei  ye công ty njauk bayar. Min takik jeng hu kayua lỡ paje. 1ha bayar brei 10 triệu bloh klaak abih sraiy , blaoh mikva kaoh klaak abih oh pala tabau tra.

Tui ong Nguyễn Ngọc Phú, akaok Jabat Ngak nong saong patagok palei pala huyện Ea Súp, bruk tabau oh ka hu kaoh bo công ty Cổ phần tabau saradang Đăk Lăk kareik pabah mbang sang mac, tamat vụ ép, daok ngak ka mikva pak ini duh hatai. Taduan hu panuac khiếu nại di urang nong ka bruk ini, karja cơ sở daok tame bruk piah duah jalan langyah: Xã Chư Mlan hu payua harak da-a bloh, piah sua tangi công ty, piah mong công ty javap jalei yau habar ka dom mblang tabau bo công ty oh blei nan. Hu atau oh hu ye công ty harei nan njauk javap jaloi ka nyu cambaih.

Bilan tabau 2017, 2018, Công ty Cổ phần tabau saradang Đắc Lắc padang bhum pala tabau labaih 5 ribau ha di 2 huyện Ea Súp saong Buôn Đôn, jeng lac thun tabau akaok meti, sang mac saradang padang ngak di Ea Súp ba tame pandar. Yau nan min, dom cuang kandah tavak tave dalam bruk padang ngak - vận hành sang mac gam haong bruk yaom saradang trun biar, daok ngak ka talei pambuak bruk di doanh nghiệp saong urang nong oh siam meng akaok vụ. Dahlau di tuk sang mac kareik pabah mbang, klaak yaok rituh héc ta tabau metai taha langiu mblang, ye meng akaok vụ, Công ty Cổ phần tabau saradang Đăk Lăk hu caik rah tabiak bruk suai blei, ngak ka yaok rituh hécta tabau taha, trun năng suất saong njauk khuah, ngak ka ralo urang nong khat lahik. Kadha njauk ndom jang nan lac, meng dom tavak tavaiy di akaok vụ tal ini, hu oh takik urang nong oh daok mbak carak haong phun tabau, daok kuhria tal bruk kaoh phun tabau piah salih tapa pala phun karei. Gah tabau saradang Đăk Lăk meda gaok cuang kandah prong tuk kein laba kinh tế oh khik kajap saong hatai jia oh daok./.