Palei 11, xã Nâm N’Jang, huyen Dak Song, tỉnh Dak Nong hu taneh pala drak saong labik daok di bhap bini gah diah craoh. Meng dahlau mai, bruk nao mai, pajeng ba pandap panda kaya nong jeng brei nao tapa baoh tatua bruk, khut, saong tapa nan hu rilo menuac gaok bala. Sang ong Hoàng Quốc Hùng urang dahlau daih ngak bol lin jeng daok gah diah craoh, saong hu taneh pala drak praong labaih 15 ha. Mboh bruk nao mai kan kandah, dalam tuk kadung jien karja palei oh ka ngak hu, thun 2016, sang ong buh tabiak 350 trieu dong piah ngak baoh tatua khang kajap piah sang ong jeng yau mikva dalam palei nao mai hu mbuan lagaih jang. Piah ngak hu siam, ong Hùng nao pah urang mai duah thau, thiet ke baoh tatua atah 18 mét, praong 3m, glaong jaik 7m, tải trọng jaik 18 tấn. Hadei di 3 bilan ngak, baoh tatua hu ba tame pandar.

“ Dahlak jeng kham merat ngak piah hu jien meng ngak hu, ini lac bruk caong khin di khol dahlak meng 6, 7 thun sap pagap. Tuk bruk ngak mbang hu tani tanat blaoh meng biai saong diuk anek, tuk camereip diuk anek oh njauk hatai kayua abih rilo jien, tuk pataom ginup jien blaoh jeng brei jak ba diuk anek, kayua buh rilo jien bo kein laba di anak meta oh mboh hu hagait”

Ong Cù Xuân Kinh daok di palei 11, xã Nâm N’Jang brei thau, dom thun dahlau, bruk nao mai di labik ini biak kan kandah, abih di nyu nn lac bilanhajan ribuk biak huac kayau  njauk nao tapa tatua meng kayau khut, bruk. Bilan hajan ini, mikva sahanang hatai nao mai, pajeng ba khak tame drak jeng yau pajeng kaya nong mai sang biak lagaih.

“ Hu tatua ye mikva khol dahlak nao mai mbon lagaih rilo, dahlau diah tatua klak dahlak pajeng 2 mbao caphe laih gam radaih gam manuac trun craoh, urak ini hu tatua birau nao mai hu mbuan lagaih”

Daok ong Mã Văn Lục – palei 11, xã Nâm N’Jang brei thau, sang hu dua hecta apuh pala amriak kalu gah diah craoh. Meng thun bloh tal ini, meng hu baoh tatua kayau sang ong Hoàng Quốc Hùng ngak nan ye bruk nao mai hu mbuan lagaih, pajeng ba kaya nong mbuan lagaih jang biak ralo.

Urang dahlau daih ngak bol lin angan Hoàng Quốc Hùng palei daok di Vĩnh Phúc. Thun 1992, ong ba diuk anek tame xã Nâm N’Jang, huyện Đăk Song (tỉnh Đăk Nông) padang mbang ngui. Meng 3 hecta apuh tuh camereip, sang ong pala caphe. Tari tarieng, patak pataom, sang ong blei hu rilo hamu apuh. Tal urak ini, ngan saong 15 hecta  taneh, sang ong pala rilo janih phun yau ye caphe, amriak kalu, mac ca, bơ…Meng 6 hecta daok thu hoạch, yaok thun sang ong laba hu yaok rituh trieu dong. 

Tui taong yaom di ong Phạm Cường -Akok Kapul urang dahlau diah ngak bol lin xã Nâm N’Jang, Đăk Song, sang ong Hoàng Quốc Hùng oh lac naih joi bruk ngak mbang bo daok lac baoh sang nao dahlau dalam dom bruk ngak xa hoi kayua palei jak ba. Abih di nyu nan lac, meng bruk buh tabiak labaih 350 trieu dong piah ngak baoh tatua tapa craoh, ba mbuan lagaih ka bruk nao mai di bhap bini dalam palei, lac bruk njauk pok meyaom.

Meng tari tarieng ngak mbang, urang dahlau daih ngak bol lin angan Hoàng Quốc Hùng daok di palei 11, xã Nâm N’Jang, huyện Đăk Song, tỉnh Dak Nong oh lac ngak kaya meda ka sang drei bo daok rik daong biak ralo ka bruk cak roik patagok kinh te- xa hoi di palei. Meng hatung hatain siam mekre di urang lin Wa Ho, ong Hoàng Quốc Hùng tuk halei jeng paglaong bruk ngak, “ panuac ndem meyai nao gam saong bruk ngak”, hu Kapol urang dahlau diah ngak bol lin tinh Dak Nong saong UB bhap bini huyen Dak Song rilo mbang alin brei harak meyom./.