“Dahlau diah, di labik ini urang klaak hareik ban glai ban glo. Labik ini jeng mblang hareik min urak ini abih paje” – muk Đặng Thị Mai daok di palei Đắk Lim, xã Đắk Ơ tacei tangin tame mblang taneh saoh anak sang hu ramik hacih saong ndem yau nan. Muk ndem meyai dalam bui sambai kayua meng harei xã pambuak bruk pah hu radaih pataom mek hareik, sang muk oh daok bruk “diukrai saong hareik”. Muk Mai lac: “Oh hu radaih mek hareik ye mikva urang daok thau ngak hagait karei jang lac pajeng hareik nao klak grauk labik. Labik ini jaik darak nan ye urang klak manuk, ada, pabui metai bak. Drei pacang jeng oh hu”

Sa-ai Lương Thị Diệu, urang pablei salih di darak Đắk Ơ brei thau:“ Meng tuk hu radaih mek hareik ye labik ini mboh hacih sa-at jang. Bhap bini thau sahaneng jang, oh klak hareik ban glai ban glo bo pataom veik caik hu labik di nyu”. Labik darak Đắk Ơ bhian lac pandiak tuh hareik nerak di pasak xã kayua hu rilo labik pataom hareik praong oh hu labik ngak brei hacih. Min urak ini bruk nan salih karei paje. Hareik oh daok sre haok, oh daok mbau bruk.

Di dom bhum palei, piah peih bruk khik caga alam moi truong lac biak kan kayua rilo bruk ba tal yau ye radeih sit sot, dom baoh sang ngak mbang sit sot oh sumu gauk atau bhap bini daok kurang sahaneng. Kyau yau nan ye, piah hu jien brei  kapol urang ngak bruk pataom mek hareik, yaok bilan, yaok baoh sang rik tame 25 ribau đồng jien mek hareik. Phun jien takik nan ye radaih pataom mek hareik urak ini tok hu sa sruh pajeng hareik dalam xã. Sa-ai Nguyễn Văn Tùng, urang ngak bruk mek hareik di xã Đắk Ơ brei thau: “Harei halei drei jeng nao pataom hareik min 2 - 3 harei meng pataom mek di sa labik kayua harei ini mek di jalan ini, paguh nao di jalan karei.”

Piah ngak hu dom tieu chí moi truong di danak dak padang ngak palei pala birau, meng thun 2018, UB bhap bini xã Đắk Ơ hu pok panuac tagok urang dang akaok Đảng ủy brei jak ba xã hội hóa bruk ngak hacih alam moi truong saong jao ka tư nhân dang tabiak pataom mek hareik, saong mek jien tui bruk ba tabiak di UB bhap bini tỉnh. Dalam tuk di đô thị, dom công ty dịch vụ moi truong đô thị lac dom doanh nghiệp công ích di karja, 80% jien ngak bruk meng kadung jien karja, 20% kayua bhap bini rik tame min di dom bhum palei, jien piah ngak bruk nan lac jien kayua bhap bini rik tame saong tok ginup bayar ka urang pataoom mek hareik. Nan ye, oh hu rilo palei bhum atah bayah dalam tỉnh ngak hu bruk padang kapol pataom mek hareik. Tui yaok pataom di Sở Tài nguyên saong Môi trường, jaik abih dom xã bhum atah bayah oh hu labik pataom hareik.

Phó akaok UB bhap bini xã Đắk Ơ Vũ Đức Duy brei thau: Xã biak kham merat meng xã hội hóa hu bruk nan. Kapol pataom mek hareik eng drei ngak bruk, eng drei pataom mek jien. Xã tok khik iek. Dom thun tapa, tiêu chí môi trường oh ngak hu min thun ini ngak hu tui danak dak padang ngak palei pala birau. Tuk vak anak tal, UB bhap bini xã Đắk Ơ meda pok panuac likau UB bhap bini huyện Bù Gia Mập buh brei jien padang kapol pataom mek hareik ka siam jang. Urak ini mblang hareik di xã hu ngak blaoh jalan betong tame tal labik. Xã kaoh taneh praong labaih 3 ha ka bruk padang ngak  sang mac xử lý hareik.  

Langiu di bruk padang kapol pataom mek hareik, yaok thun, UB bhap bini xã Đắk Ơ daok peih bruk pathau khan ka harei Moi truong dunya, jak ba dom kapol nyaom tabiak puh ramik ngak hacih dom jabat karja, đơn vị saong dom jalan pasak di xã. Meng nan, rik daong tame ngak siam tieu chí alm moi truong dalam bruk padang ngak palei pala birau di xã./.

Urang lang: Aí Nghiêm -8/11/2020