Karja saong bhap bini xã Đak Pxi padang ngak palei pala birau meng tunut biak biar. Dalam xã hu 9 palei ngan saong 4.300 urang, dalam nan bhap bini bangsa takik Sê đăng meblah tal 99% saong baoh sang kan kathaot hu labaih 57%. Thau lac bhap bini nan po dalam bruk padang ngak  palei pala birau, urang jakar gam saong dom kapol nyaom di xã peih ngak hu jak jeng bruk jak ba mikva salih jalan sahaneng, jalan ngak mbang tal yaok bhap bini. Hu bruk tacei pato, pachreih ba, daong sumu, mikva Sê đăng daok di dom palei dalam xã jia tui, khang hatai, kham merat ngak mbang pala drak saong padang ngak palei pala birau. Sa-ai Y Vân sang daok di palei Linh La brei thau, palei hu 127 baoh sang , urak ini sang halei jang sangka kuhria bruk ngak mbang:“ Urak ini, mikva biak kham merat ngak mbang pala drak cak rok patagok kinh tế. Dut saong dahlau diah mikva yam tagok salih birau rilo. Rilo sang pala hu phun caphe duah jian tame blei mac moc, li-ua hamu. Mikva daok thau pandar rilo pajaih birau, takik tam bo rilo meng drak abih takik prein yawa. Mikva jeng tari trieng bac megru piah patagok kinh tế baoh sang.”

Kak kajap haong bruk peih ngak Danak dak bruk ngak negar padang ngak palei pala birau, urak ini hu dom salih birau dalam bruk pala drak di urang Sê đăng di xã Đak Pxi. Tal puac thun 2018, dom urang pandar pajaih birau saong chế phẩm sinh học dalam bruk pala drak hu labaih 60%. Meng dua janih phun pala ralo lac padai, bei, mikva daok pala hu 300 hecta caosu, jaok 300 ha caphe, raong taphon limo, kubao labih 1.000 drei saong daok peih praong bruk ngak mbang. Paglaong hu năng suất, parilo janih phun pala duah jien tame, raidiuk bhap bini dak harei dak salih birau. Sa-ai Y Dim, Pho akok UB bhap bini xã Đak Pxi brei thau: “ Padang ngak palei pala birau mikva kham tame ngak dom bruk jak ba di xã. Yau puh ramik hacih sa-at labik daok. Puk palei hijao, hacih, mekre. Yaok palei jeng hu Sang rông muk kei. Vin val palei mikva hu pala phun kayua hijao piah pacang  halui, ngak mekre tra. Ngan saong bruk ngak jalan betong ye  Karja saong bhap bini ngak.”

 Meng jalan sahaneng padang ngak palei pala birau oh nduac tui thành tích, tal urak ini, yaom lac xã Dak Pxi birau mek hu 7 dalam 19 tanut min dom tanut mek hu biak khang kajap. Dom tanut ngak hu oh lac angaok harak ba-ar bo nyu hu makna dalam riadiuk di mikva yau ye tanut y tế. Yaom lac 99% bhap bini dalam xã lac urang bangsa takik, hu palei daok atah balai iek ruak xã labaih 10 km min bhap bini thau sahaneng iek caga prein yawa ka rup drei jeng yau baoh sang di drei. Bác sỹ Y Bả, Akok Trạm y tế xã Đăk Pxi brei thau: “ Mikva thau sang ka jang ka prein yawa di yaok urang dalam sang jeng yau di bhap bini. Dahlau diah bhian ndih tapui di sang min urak ini hu mai ndih tapui  di balai y tế. Urang mai pasang iek pren yava di balai biak ralo. Kuhria rah tapa yaok harei hu takik di nyu meng 50 tal 70 mbang urang”

 Daok jalan ngak saong jalan padang ngak palei pala birau dalm thun 2019, ong Nguyễn Phúc Đoan, Akok UB bhap bini xã brei thau, xã palih ruah tanut paglaong jien mek tame ka bhap bini lac bruk brei salih birau: “ Taong abih hệ thống chính trị pataom tame ngak tanut ini. Bruk camreip lac khol dahlak pataom tame ngak brei paglaong năng suất, sản lượng phun pala. Phun padai ia oh lac brei tani tanat an ninh lương thực ka bhap bini dalam xã bo khol dahlak caong khin ba padai brah hu jeng pandap pablei di darak pasar piah duah jien tame ka bhap bini.”

   Dalam dom harei akok, bilan akok thun birau 2019, tame xã bhum atah bayah Đak Pxi hu mboh bruk chreih chrai ba gauk padang ngak palei pala birau ngan saong dom jalan betong daok pambuak tal dom palei; yaok ribau ha phun pala hu iek glang tui ilamu birau…Karja xã Dak Pxi saong urang bangsa Sê đăng labik ini daok jum pataom gauk ngak jeng dom bilan Xuân birau trei sir di bhum taneh rilo kan kandah. Dak Pxi njauk lac labik hadah dalam peih ngak Danak dak negar padang ngak palei pala birau di bhum urang bangsa takik  di tỉnh Kon Tum./.