Tui pathau khan di Tổng cục yaok pataom brei mboh lac, abih tih yaom jien pablei salih pandap tame, tabiak negar dalam 11 bilan thun  2021 hu jiak 600 tỷ đô la Mỹ, tagok  22,3% dut song tuk vak ni thun dahlau (dalam nan pablei tabiak negar langiu tagok 17,5%, song blei meng negar langiu tame tagok 27,5%) saong pandap pablei tabiak glaong jang blei tame 225 triệu USD. Jeng dok sa bilan piah patagok yaom  jien pablei pandap tame, tabiak ka abih thun ni meda tagok hu labaih 640 tỷ USD yau kuhria mboh dahlau di gah  Công Thương. Dom yaom jien ni brei mboh biak rilo labik hadah min nyu dok dom tavak tavaiy dok kandaong veik dalam bruk pablei tabiak saong blei tame di Việt Nam luac jiak sa thun tapa, ala kan kandah di jit prong  COVID-19.

Tui pathau khan di danak dak klauk vaccine caga COVID-19 ka uranaih umo meng 12-17 thun, Mintri Y tế brei thau, Danak dak klauk vaccine caga COVID-19 ka uranaih umo meng 12 - 17 thun hu peih tabiak meng akakaok bilan 11.2021 di dalam taneh ia. Tui kuhria, danak dak meda klauk ka labaih 9 triệu uranaih dalam umo thun ini saong tui kuhria dom vaccine hu klauk lac labaih 18 triệu mbang. Tui pathau khan samar di dom tỉnh, tal harei 29/11 hu 10.573 uranaih (meblah 0,3%) oh mboh hagait karei hadei di tuk klauk jru, rilo meng lac mboh pandik di labik klauk jru. Hu 3 uranaih gaok kan kandah trak hadei di tuk klauk di Hà Nội, Bắc Giang, dalam nan hu 2 uranaih metai. Kapul chuyên môn ka dom bala hadei di tuk klauk jru brei thau lac makna ba tal metai di 2 uranaih ini hu pambuak tal phản vệ pakat IV, oh pambuak hagait tal vaccine saong bruk klauk jru.

Anak bruk dom urang njom COVID-19  dalam bhap bini tagok glong veik, hu oh takik menuac duh hatai, duah blei dom janih jru dong taong ruak Covid-19 piah khik mepiah. Rilo janih jru ka oh hu adat brei pandar, pablei salih, min dok hu dom sang jru  pablei tabiak rilo, meda ba tal kanyah jhak trak damak ka urang pandar. Lambaok Cục khik ramik jru tavoa (mintri Y tế) brei thau, urak ni, dom janih jru dok hu yaih khan song ieu pablei yau: Molnupiravir, Favipiravir song Remdesivir jeng lac suan hukum kayua dom jru ni oh ka harak tut angan brei pandar, nyu bahrau hu ba tame pandar ngak iek, hu bruk pasang iek catang di jabat chức năng. Kayua yau nan ye Cục khik ramik jru tavoa hu panuac ieu gah  chức năng pambuak tal bruk nan, patagok pasang iek, langyah khang bruk ngak suan dalam ngak tabiak, pablei salih pandar jru iek ruak COVID-19, jru hu janih Molnupiravir. 

Tui bruk ba tabiak, meng akaok bilan 12-2021, UBND ban sit Phú Mỹ meda peih bruk cưỡng chế, giải tỏa 41 lồng bè raong kaya ikan daok di gah langiu bhum taneh ramik ngak di tỉnh Bà Rịa – Vũng Tàu hu pasang iek brei adat ngak. tapa yaok pataom drap ar, kapul chức năng mboh lac dom kaya ikan raong dalam lồng bè di bhap bini lih tame labik raong kaya ikan di bhum njauk yah klaak daok viek biak praong. Piah daong ka bhap bini pablei pandap panda, Sở Ngak nong saong Patagok palei pala tỉnh hu ieu kakei dom kapul, manuac urang hu caong pambuak tal, pablei kayaikan ye taom gaok haong dom baoh sang bhap bini atau karja ban sit Phú Mỹ tui laik phone 0933.456.208  piah hu tacei jalan.  

Meng harei ni, 1-12, yaom  gas trun  2.042 đồng/sa kg (dalam nan hu VAT), samu  24.500 đồng/sa bình 12kg. Yaom pablei glaong abih  di  SP (Saigon Petro)  tal urang blei lac  454.000 đồng/sa bình 12kg. Dreih yau nan, dom bình gas di  Pacific Petro, City Petro, ESGas… trun 25.000 đồng/ sa bình 12 kg. Tui nan, yaom pablei tal urang blei lac mangaok - mala 460.000 đồng/sa bình 12kg, tui angan.

Gah Y tế dunya brei thau, kuhria tal harei 28/11 hu 56 taneh ia hu brei thau lac hu peih ngak dom bruk brei patakik nao mai piah pacang cakak biến thể Omicron, dalam nan hu bruk pakauk oh brei tame negar ngan haong dom taneh ia hu mboh dom urang njom biến thể ini. Tổng Giám đốc WHO Adhanom Ghebreyesus harei kabroi hu ieu kakei dom taneh ia huai huac kanda rilo saong brei pambuak gauk peih ngak dom jalan lagaih piah pacang caga haong Omicron, plaih ngak brei bruk trak jang di tukvak urak ini jeng ka oh thau cambaih laih bruk mbuan njom mbak di biến thể ni.

Dom urang roh duah di Singapore patagok hu sa  bộ dut iek samar  piah duah mboh kháng thể song virus SARS-CoV-2. Piah peih bruk dut iek, urang pandar srau sa tanjaoh drah di akaok tangin song dung dịch phản ứng, bloh tanjaoh hỗn hợp janih ia ni  tagok blah ba ar ngak iek, hadei di nan mek blah ba ar nan tame  dụng cụ đọc. Dalam 10 minite, dụng cụ brei thau chỉ số kháng thể song tanut cambaih laih tagok tal 93%, glong jang dut song dom jalan ngak dok hu pandar dalam balik thí nghiệm. Tui dom urang ilamu, dut iek ni meda brei thau dom urang klauk jru blaoh njauk klauk veik piah  patagok prein pacang virus halei oh.  

Dom urang ngak praong di Nigeria brei thau hu yaok rituh urang guk nduac tabiak dalam mbang taong tame sa sang guk di ban Jos, gah kreih negar ini. Dom urang pan phao cuh tame urang lin daok khik iek, ngak brei 1 urang lin saong 9 urang guk metai. Pambak tame tuk daok cuh gauk, 262 urang guk nduac tabiak. 10 urang guk njauk cap khik veik hadei di nan. Ka oh hu kapul halei tabiak mbaok lac drei ngak bruk nan. Ini lac mbang ka 4 taong tame dom sang guk di Nigeria dalam thun ini. Bilan dahlau, dom urang pan phao praong cuh tame sa sang guk di bang Oyo saong labaih 800 urang guk nduac klah. Dom labik atah bayah di gah Barak Nigeria bhian lac labik daok di dom kol co klaik saong kol phiến quân tui Islam./.

Urang lang: T.Thao & H.Pha- 1/12/2021