Dom anek saih kan kathaot hu taduan sa boh may tinh bang 

Bruk tangi sua saong javap calei ka dom bruk dom kadha di Mentri Pato megru hu rilo urang QH sangka, kayua jaik dua thun tapa, jit ruak Covid -19 ngak kandah trak tal bruk pato saong bac di dom tỉnh. Akok Mentri Nguyễn Kim Sơn brei thau, tui yaok pataom, urak ini hu 1 triệu 867 anek saih oh hu jamraih mac moc piah bac da-a. Tukvak tapa, gah pato megru jak ba urang rik daong labaih 140.000 mac, dalam bilan 11, labaih 50.000 mac tính hu parabha. Gah pato megru daok kham merat khik brei bruk pato megru saong bac sumu gauk tui rilo jalan.

Dalam 2 harei lac harei 10 saong harei 11/11, labaih 8.300 máy tính bảng hu alin hadiah ka dom anek saih sang kan kandah daok di Đồng Nai haong Long An. Ini lac 2 tỉnh camereip abih hu mbang tui danak dak “Riyak haong máy tính ka adei” kayua Tập đoàn Bưu chính – Viễn thông Việt Nam (VNPT) peih ngak. Dahlau di nan, VNPT sanya daong 37.000 máy tính bảng ka anek saih, SV sang kan kathaot, sang jaik si kan kathaot di dom tỉnh, ban. Yaok máy tính bảng hu alin hadiah gam tui 1 SIM VinaPhone oh mek jien Data 4GB sa harei dalam 3 bilan, hadei di nan, yaom 50.000 đồng pandar dalam 30 harei.

Bruk pahadar, cầu siêu brei ka urang jakar urang lin, y bác sĩ var klak rup drei saong  bhap bini plang lahik dalam jit ruak praong Covid-19 kayua Ủy ban Trung ương MT Negar Viet Nam saong Thành ủy Ban raya HCM peih ngak, tui kuhria hu peih tabiak di mong 19 tuk harei 19/11 di Hội trường Thống Nhất saong dom labikdi 21 quận huyện, Ban Thủ Đức. Danak dak meda papar sap papar binguk dom thaot binguk, kadha vak ka Ban raya HCM tapa “bruk mesruh metai haong diuk” ngan saong jit ruak; gam hu panuac di urang ngak praong di Ủy ban TƯ MT negar Viet Nam, urang ngak praong di Ban raya HCM. Adat pahadar bhap bini plang lahik saong urang jakar var klak rup kayua jit ruak rah tabiak tuk mong 19 tuk meteh harei 19/11.

Dom doanh nghiệp pajeng ba bahrau brei tagok yaom pajeng ba meng 5-10%. Yaom xăng hadei di 5 mbang tagaok, urak ini yaom jaik 25.000 đồng 1 lít, jaik samu yaom tagok glaong abih di bilan 7/2013, yaom menyek lac 18.710 đồng saong 17.630 đồng 1 lít, tagok 63-74% duk saong tukvak ini thun blaoh. Hiệp hội pajeng ba pandap panda ban raya HCM brei thau, dom doanh nghiệp hu panuac caong jabat khik ramik karja pasang iek, brei trun jien je khik caga alam langik tasik. Urak ini, yaom kak 2 janih je ini biak praong, meng 3.800-4.000 đồng 1 lít xăng menyek.

Sở Ngak nong saong Patagok palei pala tỉnh Kiên Giang brei thau, jit pabui ruak aih caraoh châu Phi di tỉnh ini daok hu pacang veik, urak ini 8 xã oh hu sruh jit ruak birau. Gah ngak nong tỉnh tacei pato bhap bini peih ngak 4 mbang  pruh jru pametai anek ruak ngak hacih var ro; tui iek tani tanat bruk pablei tabiak saong blei tame dahlau di tuk sik ngak rilo pabui. Meng akok bilan 9 thun 2021, jit tả pabui Châu Phi njom mbak praong, dom pabui am cuh klak mbiah tal ini jaik 1.200 drei.

Kapul tacei ba pacang caga njaom mbak jit COVID-19 di Nga brei thau lac daok ngak bruk haong dom mintri pambuak tal piah ngak tabiak hukum ka bruk pandar mã QR bắt buộc dalam dom kuan cafe, radaih pajeng tuai saong labik pablei pandap, tui kuhria hu ba tabiak ngak tui tal bilan 6/2022. Jabat pasang iek saong khik caga urang blei pandar negar Nga brei thau, mã QR daok hu pandar di 77 labik di taneh ia. Urak ini di taneh ia Nga, bruk miễn dịch dalam bhap bini lac labaih 48%. Hu 22 triệu urang Nga brei hu klauk jru saong 9 triệu urang karei brei hu klauk veik.

Rajaei Đức brei thau, dom pasak klauk jru njauk hu peih pabah mbang gilac dalam negar, gam iew bhap bini brei klauk jru vaccine pacang Covid-19 anak bruk jit ruak tamuh khang gilac. Harei 11/11, taneh ia Đức hu 50.000 urang njom ruak birau, glong abih kuhria meng dahlau mai. Urang hu klauk jru di Đức urak ini daok biar dut saong dom taneh ia châu Âu karei, tok hu 67% urang umo dalam dara tagok.

Hãng jru Mỹ Moderna bahrau hu panuac ieu pablei vaccine caga COVID-19 ka Liên minh châu Phi (AU) yaom 7 USD 1 mbang klauk – samu meteh yaom pablei di akaok thun ini. Ini lac bruk njauk uan tabuan, daong pasiam bruk klauk caga di bhum châu Phi – labik bahrau hu 6% rahra hu klauk ginup. Tal urak ini, châu Phi hu jaik 8 triệu 500 rabau menuac njauk COVID-19 saong 220.000 urang metai./.

Urang lang: Mousaphuong- Ái Nghiêm -13/11