Dalam 4 harei  tapa, negar  drei hu yaok ribau urang hu klauk vaccine Covid-19 di hãng  Astra Geneca.  Dalam jaik 2.000 urang hu klauk bloh, hu takik menuac mboh karei hasit dalam rup, min hanjul, yau ye aih craoh, ndaih tandon, katal rup saik… daok hu tui iek di sang iek ruak. Tui Mentri Y tế, oh hu janih vaccine halei salamat abih. Jeng yau dom janih vaccine karei, vaccine Covid-19 di Astra Genneca hu kakei lac hu meng 10% tagok dom phản ứng karei. Tui kuhria mbiah tal puac thun, Việt Nam hu yaok pluh trieu mbang vaccine Covid-19 piah klauk ka bhap bini.

“Jiak 90% doanh nghiệp Việt Nam gaok kan kandah kayua jit Covid -19” lac bruk brei mboh tapa pasang iek labaih 10.000 doanh nghiệp di  63 tỉnh, ban di negar dalam thun meng bloh. Rilo doanh nghiệp brei thau, jit ruak ngak kan kandah tal bruk taom gaok tuai damuai, kan kandah ka phun jien saong bruk urang ngak, bruk pabak pandap ngak jeng klaoh … 75% doanh nghiệp ndom lac, dom sarak dong di karja lac siam lagaih. Min, bruk mbang tui dom sarak jeng dok rilo paga pacang, brei hu danak dak cambaih laih piah jhul tagok bruk peih ngak dom sarak dong ba mai siam lagaih cambaih laih.

Hadei di sa tukvak suai lavik kareih pabah mbang piah pacang caga jit Covid-19, harei ini 13/3, baha Chùa Hương hu peih pabah mbang gilac veik. Tui dom urang po brei papah labik daok, yaom duk bilak meda tagok meng 500.000 tal 600.000đồng/ sa bilik sa melam. Yaom ghe ndik tame baha Chùa Hương jeng tagok glaong di abih lac 300.000 đồng sa mbang. Tui UB bhap bini huyện Mỹ Đức, Ban Hà Nội, taong abih tuai damuai, menuac duh bruk ka baha Chùa Hương brei cuk patiak pacang pabah, rao tangin meng jru pametai anek ruak. Tuai damuai tame baha njauk brei thau gah y tế.

Sang mac điện ia harei Hậu Giang hu prein khang 35 MWp (megawatt peak), sản lượng điện tui kuhria labaih 50.800 MWh/sa thun lac danak dak sang mac điện ia harei camereip ba tame pandar di tỉnh, rik dong peih ngak hu siam   bức xạ ia harei di Hậu Giang, lagaih song jalan patagok năng lượng tái tạo di Việt Nam. Danak dak hu mblang taneh prong 33ha, dalam nan hu  79.000 blah pin năng lượng ia harei, song yaom phun jien buh tame ngak abih tih labaih 700 tỷ đồng.Tui kuhria, jien mek tame di sang mac labaih 80 tỷ đồng/sa thun.

Cong an tỉnh An Giang  daok pambuak bruk saong BĐBP tỉnh ngak brei cambaic laic bruk pandap panda biak rilo hu duah mboh dalam sa baoh sang urang jakar BĐBP tỉnh. Tapa pasang iek 3 baoh sang di phường Vĩnh Nguơn, Ban Châu Đốc, gah Công an mboh saong chap khik labaih 1.140 janih pandap, gam saong labaih 1, 3 tấn pandap di negar langiu ngak tabiak, oh hu harak gar hagait. Mboh ini lac bruk praong, pambuak tal urang jakar di gah tapon nyom bol pan phao kraong, CA tỉnh An Giang tacei Công an Ban Châu Đốc brei duah thau, ngak cambaic laic piah langyah njauk tui hukum.

Thái Lan lac negar camereip abih di  Đông Nam Á brei padeih klauk vaccine AstraZeneca kayua huac gar drah, min dok ndom lac vaccine "hu siam". Mintri Y tế Thái Lan brei thau bruk klauk jru hu ngak veik  tuk hu pathau khan cambaih laih jang. Thủ tướng Thái Lan Prayuth Chan-Ocha song dom urang jakar tui kuhria hu klauk  vaccine Covid-19 dalam harei 11/3, min njauk klaak bruk ni hadei di tuk adat brei padeih hu batabiak.

Anek likei patao William brei thau Hoàng gia Anh oh iek lap atau iek praong bangsa halei, hadei di mbang javap jalei  di anek likei patao Harry saong diuk di gait, lac Meghan, ndom lac Hoàng gia Anh neh rabha bangsa. Bruk nan jhul Hoàng gia Anh tame bruk srau kadau khang abih kuhria meng tuk anek metau lac kumei lac Diana metai di thun 1997, lac amaik di William saong Harry. Dahlau di nan, Cung điện Buckingham ba tabiak panuac mek angan lac di Patao kumei Elizabeth,  ndem tal bruk bangsa biak njauk haduh hatai saong meda brei langyah catang, saong hu panuac lac “ dom bruk hadar veik meda karei di gauk”

  Boeing pablei hu 82 kapan haoh di bilan 2-2021 song brei thau 51 mbang urang klaak blei, tapa nan lac mbang camereip abih kuhria meng bilan 11-2019, yaom jien mek tame yaok bilan yam tapa dom harak kakei blei njauk urang klaak. Urak ni Boeing dok kandong veik  4.041 kapan haoh dom janih. Bilan 11-2020, Cục Hàng không liên bang Mỹ hu brei adat ka dom janih kapan haoh phản lực di Boeing hu par veik hadei di 20 bilan padeih par kayua  2 mbang bala ngak brei rilo menuac metai./.

Urang lang: H.Pha -A.Nghiem 13/03/2021