Rilo urang đại biểu hu batabiak jalan ngak di drei 

Dalam danak dak mbang nyaom ka 2, Quốc hội mbang 15, dah page ini (21/10), Quốc hội hu ginum biai di kapul  ka pathau khan pacang caga jit COVID-19 saong bruk peih ngak Sarak ka 30 thun 2021 ka mbang nyaom ka 1, Quốc hội mbang 15. Gah langiu ginum biai di Quốc hội, rilo urang QH njauk gauk haong dom bruk ngak pacang caga COVID dalam tukvak anak tal bo dalam pathau khan hu brei thau, dalam nan, njauk iek praong bruk pacang caga COVID siam lagaih piah khik tani tanat an sinh xã hội. Urang QH Quàng Văn Hương, kapul Sơn La brei thau lac, piah khik tani tanat, cak rok patagok kinh tế, bruk lang talaih kan kandah gah manuac ngak, bruk ngak ngan haong manuac ngak dalam tukvak ini hu makna biak praong, abih di nyu nan lac dom urang ngak meng bhum hu jit mai palei dalam tukvak tapa.

Bier harei kabroi, di jabat rajaei, Phó Thủ tướng rajaei  Lê Văn Thành pal akaok mbang  nyaom online pakat negar ka bruk pajeng ba pandap panda, tuai damuai  song pasiam veik bruk ngak di dom labik ngak cong  khik kajap salamat, sami samar song pasang iek hu  jit  Covid-19.  Brei panuac tamat mbang nyaom, Phó Thủ tướng Lê Văn Thành  caong lac gah pajeng ba meng jalan kapal haoh brei patagok jang  dom mbang par  tui jalan khik kajap bruk pacang caga jit, ramik pasiam veik dom tanut  ka nyu lagaih song bruk di anak meta. Gam song nan, khik bruk peih radaih dom jalan mbak, jalan pasei nan ye dom tỉnh ban njauk patagok jang  dom jalan pacang caga jit , abih di nyu lac dom puk palei bhum hajao. Tui Phó Thủ tướng, khin ngak hu bruk ni njauk duah thau samar   meng di tuk hu urang njom ruak, oh caik ka sruh jit rah tabiak . Kayua yau nan ye samar patagok bruk ngak di urang pal akaok di puk palei abih di nyu nan lac  kapul pasang iek Covid bhap bini.

Jabat Cảnh sát jalan mbak, jalan pasei (PC08) – Công an Ban raya HCM brei thau, yaom lac 12 bilai pasang iek di dom jalan praong tame tabiak saong 39 bilai pasang iek di dom jalan sit jeng daok hu ban raya HCM khik veik, min bhap bini nao tapa dom bilai di dom jalan pambuak 4 tỉnh jaik taphia lac: Bình Dương, Đồng Nai, Long An saong Tây Ninh  oh njauk dut iek COVID-19 bo tok yar tabiak harak lac klauk ginup 2 mbang atau 1 mbang vaccine caga COVID-19 ginup 14 harei hadei di tuk klauk atau harak lac F0 hu thit ruak mala 180 harei. Langiu di nan, bhap bini ba tabiak viek mã QR pathau khan y tế, nao mai dalam taneh ia di mangaok ứng dụng VNEID. Bruk klaak harak dut iek mboh lac âm tính SARS- CoV-2 hu ba mbuan lagaih ka bhap bini pajeng ba pandap panda saong pabak manuac ngak bruk.

Danak dak điện hangin  Đông Hải 1 – Trà Vinh bahrau ngak salah dom bruk puac di abih  piah caga ba tame ngak . Ni lac danak dak  điện hangin  angaok tasik prong abih di  Việt Nam kuhria tal tuk vak  ni kayua  Trungnam Group ngak po padang ngak ngan song yaom phun jien abih tih jiak  5.000 tỉ đồng. Hu thau, điện hangin  Đông Hải 1 lac danak dak điện hangin tasik  camereip di Trungnam Group, min jeng lac danak dak hu  padang ngak prong song hu peih ngak dalam tuk vak biak kan kandah, tavak tavaiy. Bahrau dang anak jit  Covid-19 srau kadau, gsm dang anak  bruk langik tasik oh siam lagaih… min meng hatung hatian  ngak bruk tani tanat, gam song hatai kham merat , Kapul urang ngak  , kỹ sư di Trungnam TraVinh1 WP hu ngak salah biak gheih  jalan peih ngak di danak dak .

Tui Jabat pato magru (GD&ĐT) huyện Hàm Thuận Bắc, tỉnh Bình Thuận, thun bac ini, huyện hu labaih 35.000 anek saih dom pakat daok tui bac di 72 sang bac di 17 xã, ban sit, dalam nan labaih 1.800 anek saih lac anek kamuan urang bangsa takik. Anek saih tiểu học saong THCS di 4 xã bhum ciek glaong hu nao tal sang bac; dom xã daok viek tui kuhria meda hu nao bac di harei 25/10 anak tal. Piah trun manieng dom kan kandah ka anek saih saong gru pato, min jeng khik njauk danak dak pato magru, Jabat pato magru hu pato tacei tal dom sang bac pataom tame peih ngak patakik viek dom asal kadha pato bac.

Harei 20/10, Australia mek hu bruk klauk ginup 2 mbang vaccine pacang COVID-19 ka 70% rahra meng  16 thun tagok, brei mboh sa kadha prong dalam bruk peih pabah mbang veik taneh ia . 85,5% urang  Australia hu klauk  vaccine camereip.   Yam tapa tuk vak ni, Australia brei takik pandar bruk pacang veik jang, pacadu dom bruk pacang jit ngan song dom urang hu klauk pacang ginup song patagok tuai tame negar, dalam nan hu  sinh viên dunya song urang negar langui  hu thực thị  tạm trú karei.

Nyaom darak tapuk Frankfurt praong abih di dunya hu peih veik dalam raidiuk siam mekre bahrau di harei 20/10, hu mbaok di dom nhà xuất bản, quan pablei salih tapuk, urang puac tapuk saong labaih 300 tác giả. Nyaom Darak tapuk Frankfurt 2021 hu labaih 2.000 labik parang iek meng labaih 80 taneh ia hu mbaok tame, glaong jang tanut 7.500 labik parang iek meng labaih 100 taneh ia hu mbaok tame di thun 2019. Tui mBan peih ngak, dom tuai hu mbaok tame mbang darak tapuk thun ini hu pacang veik di tanut lac 25.000 urang sa harei, trun meteh dut saong prein yaok harei. Urang hu mbaok tame mbang darak brei cuk pataik pacang mbaok saong harak brei mboh hu klauk vacxin pacang caga jit ruak, thit ruak hadei di tuk njom COVID-19 atau dut iek mboh âm tính. Darak tapuk Frankfurt 2021 meda dui atal tal puac harei 24/10./.

Urang lang: Hanipha- Thu Thảo -21/10