Rilo tỉnh ban brei pacang veik urang tame tabiak 

Dalam mbang ginum biai di QH ka bruk peih ngak jalan patagok kinh te - xa hoi thun 2021, caga bruk ngak ka thun 2022 peih tabiak di biar harei 8/11, urang QH hu panuac caong Rajaei pataom tame parabha ginup prein khang peih ngak Danak dak pakat negar patagok kinh te - xa hoi bhum urang bangsa takik saong bhum ceik vaktu 2021-2030. Amuk Cao Thị Xuân urang QH tỉnh Thanh Hóa caong khin tacei pato dom mentri, dom gah samar ba tabiak dom harak gar hukum piah tui nan peih ngak danak dak. Abih di nyu lac samar peih ngak bruk taneh daok, taneh pala drak, pato pakai, salih bruk ngak saong ba bruk ngak pak di labik urang daok.

Dom menuac njauk COVID-19 hu rilo dalam 2 adit jaik ini, harei 8/11 dalam taneh ia hu 7.988 urang njauk ruak, lac glaong abih dalam 2 adit tapa. Dalam nan dom menuac njauk ruak daok tagok veik di TP.HCM, Đồng Nai, Bình Dương, Hà Nội haong dom tỉnh miền Tây... Di Hà Nội, harei 8/11 hu 106 urang njauk ruak bahrau, dalam nan hu 56 urang dalam bhap bini. Tỉnh An Giang bahrau patagok pakat jit jeng pakat 3 (bhum kanyik) saong daok brei ngak dom jalan ngak khang yau ye: brei padeih pajeng tuai, padeih bruk pablei mbang menyum pak di labik, tok brei pablei ba nao...

Bruk peih pato di sang bac birau hu Sở Pato megru Ban raya HCM pathau khan HĐ bhap bini Ban raya biar harei 8/11. Ngan saong bhum palei hu jit pakat 1 saong 2, sang bac hu pato tapak, oh peih ngak bruk langiu tuk pato bac. Di labik hu jit pakat 3 lac  mbuan njom ruak glong, bruk bac brei pato tui jlan gam online gam patao tapak. Tui bruk rak tabiak anak meta, dom quan huyen saong Ban Thủ Đức ba tabiak jalan pato ka yaok tal, yaok khoi. Di bhum jit pakat 4 lac pakat mbuan njom ruak biak glong, bruk bac online, tapa rayo papar bunguk, brei bài bac eng.

mBan tacei jalan pacang caga jit ruak tỉnh Bà Rịa-Vũng Tàu brei thau, dalam 24 mon tapa, tỉnh hu 149 urang njauk ruak, dalam nan hu 75 urang dalam bhap bini, rilo meng lac pambuak tal menuac mai meng langiu tỉnh. Anak bruk rah tabiak khang di jit COVID-19, Bà Rịa – Vũng Tàu hu panuac ieu rahra, doanh nghiệp ngak catang 5 bruk lac: ngak njauk tui 5 paka, pandap mbang ginup di sang – Gru iek ruak, jru tavao di sang - Test COVID-19 taong abih – Klauk vaccine di phường, xã.

UB bhap bini huyện Mộc Hóa, tỉnh Long An brei thau, jabat chức năng daok pasang iek ngak brei cambaic laic bruk klaoh tatua talei văng Bình Phong Thạnh tapa kraong Vàm Cỏ Tây, meyah ginup asar kadha meda ba tabiak kaoh tui hukum. Anak meta, Sở Jalan mbak pajeng ba tỉnh pasang iek, taong yaom bruk khat lahik saong bruk pasiam veik dalam 45 harei, tui kuhria rah tapa khat labaih 1 tỷ đồng. Camereip hu mboh bruk jaoh tatua  kayua radaih tải  60C - 56.658 pajeng trak labaih 48 tấn nduac tapa, ngak klaoh tadua nan. Dalam  tuk nan, dua akok tadua hu pagam biến brei pajeng trak 5 tấn min. Bruk ngak gar tavak jalan hasa tame tabiak pambuak saong Bình Phong Thạnh saong Pasak hành chính huyện Mộc Hóa saong  sa xã, bhap bini nao mai meng kapal.

       Japon brei adat tame negar veik dom urang negar langiu meng harei 8/11. Bruk ini pabak hatai caong di rilo kapul nyaom dalam taneh ia caong khin taduan raok urang ngak negar langiu mai veik dalam tuk menuac ngak daok kurang biak rilo, bruk njom mbak COVID-19 trun biak rilo. Min dom taneh ia hu biến chủng bahrau saong njom mbak khang oh brei tame.

       Hội đồng Y tế pakat glong Pháp birau kakei oh klauk vaccine pacang Covid-19 di hãng jru Moderna ka urang umo mala 30 thun saong tok brei pandar meteh jru klauk pabak ka dom urang langiu umo thun nan, kayua janih vacccine ini meda ba tal ruak cơ tim saong ruak màng langiu baoh hatai, abih di nyu lac dom urang umo 30 thun. Yau nan min, jabat nan kakei brei pandar vaccine Moderna ka dua mbang klauk camereip ngan saong urang umo 30 thun kayua nyu pacang biak siam ka dom urang mbuan njom ruak Covid-19 trak.

        Mintri Y tế Ấn Độ brei thau, hu 89 urang, dalam nan hu 17 uranaih, tapa dut iek mboh lac dương tính haong virus Zika di bang Uttar Pradesh. Ini lac mbang tamuh ruak njaom mbak virus Zika camereip di  bang Út-ta Pra-đét, urang njaom mbak camereip abih hu mboh di Kan-pua lac harei 23/10. Hu mboh mbang camereip di thun 1947 saong tamuh khang di Brazil thun 2015, virus Zika kayua jamaok pambak tapa ngak ka yaok rabau anek kamar njauk ruak akaok sit saong glo akaok takik carok patagok./.

Urang lang: Mousahphuong -Ái Nghiêm -9/11