Akaok negar Nguyễn Xuân Phúc pok meyaom dom urang đầu tư di Hoa Kỳ sangka tal Việt Nam

Dalam mbang hu mbaok tame ginum biai pakat glaong Đại hội đồng LHQ mbang 76 di New York, harei 23/9 (tui mon pak nan), Akaok negar Nguyễn Xuân Phúc hu tadaun raok dom kapul dang akaok Hoa Kỳ. Dalam dom mbang taduan raok, akaok negar Nguyễn Xuân Phúc pok meyaom dom urang đầu tư di Hoa Kỳ sangka tal Việt Nam saong brei thau, Việt Nam caik hatai dahlau tal bruk kham merat patagok gah năng lượng tui jalan khang kajap, khik tani tanat an ninh năng lượng taneh ia saong patrun phát thải sang camin. Việt Nam caong khin blei LNG meng Hoa Kỳ, rik daong patagok pablei salih nao mai di dua gah hu siam mekre, khang kajap.

Meng mon 12 melam 24/9/2021 ban Cần Thơ brei pa-atah di gauk tui Sarak 15 di Thủ tướng Rajaei mbiah tal tuk hu panuac khan bahrau di pakat hu thẩm quyền. Hu dom phường di quận Ninh Kiều; quận Cái Răng jeng daok pandar Sarak 16. Tuk peih ngak Sarak 15, UBND ban C.Thơ ieu dom palei brei patagok bruk pasang iek, tuk hu F0, kham merat pacang veik sit, njauk labik.

Kapal gilai mala 15m di ban sit La Gi, tỉnh Bình Thuận hu adat brei tabiak tasik taong cap kaya ikan angaok tasik meng harei 23/9, min brei ngak njauk tui dom bruk pacang caga jit COVID-19. Hu thau, hadei di tuk UBND ban sit La Gi brei adat ka gilai kapal meng 15m tagok hu tabiak tasik veik meng harei 9/9,  tal tukvak ini hu jaik 350 kapal gilai hu công suất praong gam haong yaok rabau urang ngak hu tabiak tasik bloh.

Anak dom kan kandah di menuac sia daok dalam dom labik sang trọ, meng akaok bilan 8, Lữ đoàn Phòng không 77, Quân khu 7 haong karja palei saong dom gah, dom kapul nyaom dalam quận Gò Vấp- TPHCM  peih bruk “Sang trọ 0 đồng”. Tal urak ini, hadei di labaih 1 bilan jak ba, hu jaik 450 po sang trọ hu mbaok tame bruk ini, saong yaom trun meng 30% tal 100% ka 2.800 phòng trọ. Abih tih yaom jien pah phòng hu trun brei lac 2 tỉ meteh yaok bilan. Gam haong nan, Lữ đoàn jeng hu ieu pataom pandap mbang huak meng dom labik piah payua tal tangin menuac urang daok di dom labik sang trọ.

Kuhria tal urak ini, Gilang pariak Sarak karja huyện Phú Giáo, tỉnh Bình Dương hu ieu pataom, jak ba labaih 560 tỷ đồng, brei ka dom sang kathaot, sang jaik kathaot saong sang bangsa takik gaok kan kandah mesraiy phun jien piah ngak mbang. Bhap bini dom bangsa di huyện Phú Giáo hu peih praong taneh pala phun công nghiệp lavik thun yau: cao-su, amriak kalu, ngak jeng bhum pala phun mbang baoh praong yau cam, kruac bung,... tapen kraong Bé tagok 1.000 ha, yaok thun yaok hecta mek hu 100 triệu đồng.  Phun jien sarak daok lac labik pambak tame khang kajap daong ka bhap bini bangsa takik tabiak truh kan kathaot, paglaong raidiuk. Tal urak ini, tok daok 14 dalam 711 baoh sang kathaot lac bhap bini bangsa takik.

Di mbang nyaom pakat glaong di Hội đồng Bảo an Liên Hợp Quốc ka bruk an ninh khí hậu, Tổng thư ký Liên hợp quốc António Guterres hu panuac ieu dom urang pan akaok dom taneh ia praong di dunya peih bruk sanya pamaong tal kadung jien khí hậu yaom 100 tỷ đô la yaok thun tuk daok dom adit tra lac tal harei peih nyaom biai pakat glaong ka khí hậu di Liên hợp quốc, COP26. Biak di nyu, bruk khủng hoảng khí hậu daok lac bruk di dunya. Dom taneh ia angaok dunya jeng daok mboh bruk pandiak bhang, khuah glai, ia sua khang dalam dom thun jaik di ini.

Sa kapul urang ilamu di Sang bac Đại học Công nghệ Vienna (Áo) haong Đại học Padova (Italy) brei thau ia prah hu virus SARS-CoV-2 par dalam không khí meda par atah jang dalam labik pasah. Ini lac bruk duah mboh bahrau, cagar veik haong dom panuac ndom dahlau daih lac, tok hu dom tanjoh prah praong meng ba tal njom mbak jit ruak, kayua dom tanjoh sit bhian par lahik samar drah. Tui nan, meda lac, bruk njom mbak oh lac meng ia prah praong atau sit, bo kayua  độ ẩm di không khí dalam langik tasik. 

Thierry Breton lac UV Liên minh châu Âu (EU) iek gah darak pasar dalam EU hu panuac caong lac dom tuai meng EU hu klauk bloh vaccine pacang Covid-19 di hãng jru AstraZeneca meda samar hu adat brei tame Mỹ yaom lac Mỹ ka oh brei adat pandar janih vaccine ini./.

Urang lang: M. Phuong – 24/09 4:07:41 PM