Bí thư Thành ủy Nguyễn Văn Nên lambaok Đảng bộ, karja, bhap bini Ban raya thau dhar phol Quân ủy Trung ương, Mentri Quốc phòng

Dalam tabung glong di mbang jit ka 4, bol lin ieu pataom labaih 30.000 urang lin, labaih 98.000 dân quân tự vệ gam saong 2.000 y, bác sĩ saong urang bac quan y gam haong Ban raya pacang jit. Langiu di nan, labaih 400 urang lin hu parabha jeng 33 kapol kuhria bruk ka urang metai kayua Covid-19. Nan lac dom bruk siam hu khan di nyaom biai brei thau bruk ngak hu dalam pambuak gauk pacang caga Covid-19 kayua Mentri QP saong Thành ủy Ban raya HCM peih ngak. Bí thư Thành ủy Nguyễn Văn Nên lambaok Đảng bộ, karja, bhap bini Ban raya thau dhar phol Quân ủy Trung ương, Mentri Quốc phòng hu tacei dom gah di bol lin daong bhap bini Ban raya pacang jit hu siam lagaih.

Tui mintri Y tế, urang njom bahrau COVID-19 dalam negar di 2 adit tapa trun 48% dut song 2 adit dahlau. Min, meyah kuhria tui yaok adit ye adit hadei tagok 14,4% dut song adit dahlau . 17 dalam 19 tỉnh ban gah miền Đông, Tây Nam Bộ hu urang njom dalam bhap bini tagok , hu 2 tỉnh hu urang njom trun. Abih di nyu nan lac dom tỉnh Tây Nam Bộ mbuan si njom biak glong. Meng akaok bilan 10, dom urang meng TP.HCM, Bình Dương, Đồng Nai, Long An mai labik ni biak rilo , dom meuac mai palei njom mbak labaih 1,6%.

Sở Pato megru Ban raya HCM kuhria brei ka anek saih dom tal bac 9 saong 12 klauk ginup dua mbang vaccine piah tame bac tapak di akaok bilan 12. Di nyaom biai peih ngak bruk thun bac 2021 -2022 page 29/10, Yam ndoc Sở pato megru Nguyễn Văn Hiếu brei thau, jalan ngak nan hu pok likau UB bhap bini Ban raya HCM. Bruk brei ka anek saih bac tapak daok iek tui bruk jit ruak di yaok quận, huyện. Dalam adit ini, dom quan huyen brei ngak salah bruk klauk vaccine ka anek saih THPT saong patui nan brei kalauk ka uranaih umo sit jang.

UBND tỉnh Bình Thuận bahrau patabiak bruk klauk vaccine pacang COVID-19 ka 114.000 uranaih meng 12 tal 17 thun , brei klauk dahlau ka uranaih umo meng 16 tal 17 thun. Bruk klauk vaccine ka uranaih hu peih ngak di sang bac atau labik klauk lagaih, khik hu siam mekre. Dom harei jiak di ni jit COVID-19 di Bình Thuận rah tabiak srau kadau, urang njom bahrau daok tagok . Dalam harei 28/10, tỉnh hu 116 urang njom SARS-CoV-2, dalam nan hu 86 urang dalam bhap bini.

Page 29/10, UB bhap bini tỉnh Long An brei thau hu harak payua Viện Vệ sinh dịch tễ Trung ương brei ba 300.000 mbang jru AstraZeneca, dalam abih tih 350.000 mbang jru hu jao brei, tapa 3 tỉnh Tiền Giang, Bến Tre, Đồng Tháp. Hu thau, hadei di tuk pasang iek bruk khin hu vaccine, urak ini Long An tok hu 50.000 mbang piah kalauk mbang dua saong caga piah meyah hu urang ngak mai meng labik karei. Urak ini, Long An hu taong abih bhap bini umo 18 thun tagok klauk hu ginup mbang sa vaccine saong labaih 85% hu klauk mbang dua.

WHO lac brei hu 23,4 tỷ USD dalam 12 bilan tal ka bruk pacang COVID-19, pachreih G20 – kapul dom taneh ia kinh tế dang akaok dunya, brei mboh bruk dang akaok song pabak jien ndua . Pok jien ni lac piah blei vaccine, dut iek song jalan taong ruak, meda cakak hu 5 triệu urang metai karei dalam mbang khủng hoảng. Dunya urak ni hu labaih 246 triệu urang njom song jiak 5 triệu urang metai kayua COVID-19. Urak ni , jabat y tế di Liên Hợp Quốc brei adat pandar chip 6 jainh vaccine song dok tong yaom 8 janih karei.

Dom taneh châu Âu iew Israel mek veik bruk padang ngak labaih 3.000 baoh sang daok biarau di Bờ Tây. Dalam panuac brei thau di harei 28/10, Đức, Pháp, Italia saong 9 taneh ia châu Âu karei brei thau oh njauk hatai bruk peih praong dom labik định cư di dom bhum taneh di urang Palestine daok njauk lih mek, saong iek nan lac bruk ngak suan hukum dunya, ngak jaleih dom kham merat ka jalan ngak lac dua karja. Dom taneh ia Chau Au jeng iew dua taneh ia salih birau jalan pambuak gauk saong patrun trak damak iek tui dom bruk ngak birau ini.

Ấn Độ ba rilo phao ndao blei meng Mỹ tal jalan tapen negar song Trung Quốc tuk bruk daok catang tagok. Gah patagok hu bol lin Ấn Độ parabha taom dar bhum Tawang, jiak Bhutan song Tây Tạng, labik prong ka gah quân sự song chính trị kayua negar ni pasang iek min Trung Quốc jeng hu panuac lac ngak po. Bruk bol bala di 2 gah gam gam patagok parilo di jalan tapen negar ngak brei duh hatai, abih di nyu nan lac hadei di tuk mesruh gauk di kreik bilan 6/2020, ngak ka 20 urang lin Ấn Độ song 4 lin Trung Quốc metai./.

Urang lang: Ai Nghiem – Hani Pha – 29/10 6:58:31 PM