Tỉnh An Giang sa labik hu taneh pala paaok prong di abih 

Dalam taneh ia urak ini hu 87.000 ha pa-ok, dalam nan ĐBSCL hu 48% taneh pala pa-ok di taneh ia. Thun blaoh, pa-ok pablei tabiak negar lingiu takik kayua  jit Covid-19, tok hu labaih 180 triệu USD. Di nyom biai paglaong prein ngak njauk dom adat ka bruk pablei pa-ok tabiak negar lingiu di Việt Nam kayua Mintri ngak nong saong patagok palei pala pambuak haong UB bhap bini tỉnh Đồng Tháp peih tabiak bahrau ini, Thứ trưởng Mintri ngak nong saong patagok palei pala Trần Thanh Nam ndom lac, jhul samar darak pasar pablei dalam taneh ia la sa bruk njauk pamaong tal dalam vaktu anak tal. Lingiu di nan, dom tỉnh, ban, doanh nghiệp, HTX brei jhul samar bruk ngak tui tanut VietGap, GlobalGap. Gam haong nan, njauk sangka tal bruk khik siam mekre hadei di paik baoh, ini lac bruk praong piah paglaong yaom baoh pa-ok.   

Tui Chi cục Kiểm lâm tỉnh Cà Mau, glai tràm U Minh Hạ saong glai di dom pulao dalam tỉnh lac labaih 44.500 ha, urak ni hu jaik 41 ribau ha mbuan khuah meng pakat III tal pakat V. Dalam nan, pakat IV (lac pakat mbuan khuah) labaih 19.480 ha saong pakat V (lac pakat biak mbuan khuah) jaik 8.000 ha. Chi cục kiểm lâm tỉnh Cà Mau  hu brei urang jakar nao pasang iek, kakei po glai, bhap bini daok di labik glai khik caga, pasang iek urang tame tabiak glai, langyah samar bruk pui khuah mayah rah tabiak saong oh caik khuah tabiak praong.

Amuk Trần Thị Thu Hiền, Phaok Yam ndok Sở Du lịch tỉnh Bà Rịa - Vũng Tàu brei thau, meng harei 8-4 tal 2-6, dom rup binguk di du lịch Bà Rịa - Vũng Tàu hu ba tagok yaih khan angaok rayo papar binguk pakat dunya BBC Global News. Ini lac mbang camereip di abih rup binguk du lịch Bà Rịa - Vũng Tàu hu tagok riyak lingik dunya. Tui nan, dom rup binguk hu mboh lac: hải đăng Vũng Tàu, takai tasik, kara kanduh tasik Côn Đảo haong dom rup binguk di dom janih ala mbat tasik Côn Đảo yau limo biển, san hô…

Yaom am maraik kalu harei ni 14/4 di dom bhum pala am maraik kalu oh salih karei, darak pasa pablei salih jeng daok gindang. Yaom am maraik kalu glaong abih di urak ni hu mboh di Châu Đức (Bà Rịa - Vũng Tàu), hu pataom blei di tanut 74.000 đồng/kg; di Đắk Lắk, Đắk Nông yaom maraik kalu tui kuhria lac 72.000 đồng/kg. Theo Cục Chế biến saong cak rok patagok darak pasa kaya nong, yaom amaraik kalu di darak pasa dalam negar tagok jang dalam bilan 3. Kuhria abih quý I/2020, yaom am maraik kalu dalam negar tagok meng 16.000 – 18.500 đồng/kg. Makna ba tal yaom maraik kalu tagok kayua gah pabak trun dalam di tuk gah caong hu rilo. Dom chuyên gia jeng brei thau, mayah yaom maraik kalu jeng daok di tanut 70.000 đồng/kg yau urak ni ye darak pasa meda trun tagok dalam puac bilan 4. Nan jeng lac tukvak bo bhap bini tamat bruk paik baoh am maraik kalu, sản lượng maraik kalu meda hu rilo jang dut saong akaok vụ.

Harei ini, CA tỉnh Bình Dương brei thau, hu cap mek Nguyễn Đức Thành (daok ieu lac Hải B, 21 thun, palei daok di Kiên Giang) lac menuac klauk 2 urang metai hadei di mbang menyum saong daoh di quán karaoke Long Hải (khu phố Cây Da, phường Thạnh Phước, ban sit Tân Uyên). Hadei di tuk klauk menuac blaoh, Nguyễn Đức Thành nduac klaak labik daok. Tapa panuac khan di bhap bini, Jabat Cảnh sát hình sự- Công an tỉnh Bình Dương hu pambuak bruk haong CA huyện Châu Thành (tỉnh Kiên Giang) cap mek chip Nguyễn Đức Thành tuk daok nduac dauk dalam sa bilik trọ di huyện Châu Thành. Tapa duah thau mboh lac, Thành lac anek metui, bac oh ka abih tal 1, klaak palei tagok TPHCM daok ban glai ban klo, njien jru phiel, hadei di nan tagok Bình Dương ngak harak gar ja piah likau bruk ngak. Kayua yau nan ye, gah CA gaok biak rilo kan kandah piah cap mek hu nyu..

Rilo negar di dunya daok kham marat samar drak klauk vắc-xin caga Covid-19 ka bhap bini piah samar mek hu bruk pacang cakak haong jit ruak dalam rahra, peih tabiak jalan ka bruk peih pabah mbang negar saong ba raidiuk hu siam mekre veik yau dahlau. Min, Australia daok brei thau, yaom lac taong abih rahra hu klauk jru vắc-xin ye negar ni jeng daok sahneng kuhria rilo bruk karei dahlau di tuk peih pabah mbang negar. Australia brei kreik pabah mbang negar meng bilan 3/2020 tal bilan 6/2021 piah pacang caga bruk njom mbak di jit Covid-19 meng gah langiu. Bruk kareih pabah mbang negar gam haong bruk pasang iek catang dom urang negar langiu mai palei lac dua bruk ngak hu makna praong piah ka Australia ngak hu jak jeng dalam bruk pacang caga  jit Covid-19 tal urak ni.

Thun ini lac thun ka 2 gam gam karja Thái Lan oh brei peih harei pataom thaik ia dalam tuk mbang Tết Songkran (meng 13 tal 15-4) kayua huac njom mbak jit ruak Covid-19. Daok di Campuchia,  yaom lac Tết Chôl Chnăm Thmey (meng harei 14 tal 16-4) daok mai jaik, dalam harei 13-4 jeng daok joa lange kayua jit praong Covid-19.Dom menuac dương tính Campuchia brei thau dalam harei 13-4 lac 181 urang, menuac metai jeng hu gac 3 urang. 

Dom urang njom Covid-19 bahrau dalam 24 maong tapa di Hàn Quốc tagok biak rilo tal labaih 700 urang. Ni lac mbang tagok dom urang njom bahrau tui harei rilo abih dalam 3 bilan tapa di Hàn Quốc.Meng yaok pataom ni, taong abih dom urang njom Covid-19 bahrau  di Hàn Quốc tagok labaih 11 ribau 419 urang. Dom urang metai kayua Covid-19 bahrau jeng hu gac 7 urang, tui nan abih dom urang metai tagok tal labaih 1 ribau 782 urang. Anak bruk njom mbak yau urak ni, gah Y tế Hàn Quốc brei thau daok sahneng tal bruk ba tame pandar bộ eng drei dut iek Covid-19 piah samar drah thau lac njom jit ruak./.

Urang lang: Thu Thảo -Mousaphuong -14/4