Urang gah hải quan dok pasang iek pandap panda 

Dalam thun 2020, gah hải quan kuhria buh tame kadung jien karja 315.000 tỷ đồng saong pacang cakak hu labaih 14.100 bruk ngak suan hukum hải quan ngan saong pandap pajeng ba suan hukum kuhria tui jien lac 4.231 tỷ đồng, taong tayak rilo bruk pablei salih pandap panda, matuy…Meng kham merat di gah hải quan, mbiah tal harei 31-12-2020, jien buh tame kadung jien karja lac labaih 315.000 tỷ đồng, sumu 93,2% dut saong bruk kuhria dahlau lac 338.000 tỷ đồng. Dalam 11 bilan akaok thun 2020, abih gah  hải quan chap mek saong langyah  14.100 bruk ngak suan hukum hải quan ngan saong pandap panda suan hukum kuhria tui jien lac 4.231 tỷ đồng. Rilo chuyên án ma tuý hu prein yawa nao dahlau di gah hải quan dom pabah mbang negar, duah mboh matuy tapa jamriah pasang iek piah gah pambuak bruk tame dauh thau, chap khik.     

Tui pathau khan di mintri padang ngak, urak ni dalam negar bahrau hu  513 danak dak sang dok  xã hội brei ka urang ngak ngan song labaih 16 triệu mét vuông sàn; dalam nan, 249 danak dak hu ngak salah bloh di labaih  5,2 triệu m2 sàn, mek hu labaih 40% bruk batabiak. 264 danak dak dok veik dok hu peih ngak tui bruk padang ngak labaih jiak 11 triệu mét vuông sang dok. Mintri padang ngak ndom lac bruk patagok sang dok ka urang ngak oh ka mek hu bruk ba tabiak ka jalan patagok sang dok di taneh ia song makna prong lac kurang phun jien. Kuhria tal urak ni Gilang pariak sarak karja bahrau parabha hu labaih 2.100 tỷ đồng dalam abih tih 9.000 tỷ đồng (bahrau pabak hu 24% phun jien tal thun 2020).               

Tapa yaok pataom thun 2020, di Gia Lai daok khik labaih 5.600 baoh kong chieng, dalam nan hu labaih 930 baoh kong chieng biak quý, daok hu takik. Urak ini, dalam tỉnh hu 948 palei dalam 1.192 palei sumu 79,5% palei urang bangsa takik daok khik hu kong chieng. Dalam nan huyen Ia Grai lac palei hu rilo kong chieng di abih. Yaok thun, gah ilmu di jaik abih dom huyện, ban dalam tỉnh brei peih ngak dom mbang pakacah ma-in kong chieng pakat palei, alin brei kong chieng ka dom palei. Bruk nan oh lac daong ngak brei hu labik main kong chieng bo daok pachreih bruk khik ramik kong chieng di mikva urang bangsa takik.

Đắk Lắk hu jiak  11.000 sinh viên dok bac di dom sang bac đại học, cao đẳng dalam tỉnh, dalam nan sinh viên bangsa takik  meblah labaih  15%.Tỉnh hu 2 sang bac  trung học phổ thông gam bac gam dok song  15 sang bac phổ thông bangsa gam bac gam dok pakat huyện. Dom thun tapa, Sở pato megru hu pataom tame padang ngak pasiam ka dom sang bac abih di nyu nan lac  dom sang bac bangsa gam bac gam dok. Urak ni, dalam tỉnh hu  6 dalam 16 sang bac phổ thông bangsa gam bac gam dok hu tanut pakat negar song dok padang ngak bahrau song ngak salah sang bac Trung học phổ thông bangsa gam bac gam dok  Đăm San di ban Buôn Hồ. Hu thau, tỉnh hu rilo anek saih urang bangsa takik mek hutanut glong dalam dom mbang pakacah  anek saih naih joi pakat tỉnh song pakat negar, mbang pakacah ilamu kỹ thuật dom pakat.

Thun ini, Gilang pariak Karja khik catang bruk salih jien rai, tiền birau tuk Tết. Tui nan, Tết Nguyên Đán anek sak kubao 2021, sarak ka bruk in jien lẻ brei ngak yau dom thun dahlau, oh in jien yaom sit di tuk Tết. Phó Thống đốc Gilang pariak karja Đào Minh Tú brei thau, Gilang pariak karja kham merat pambuak siam saong dom jabat piah pathau khan ka bhap bini thau njauk ka bruk pandar jien sit.

Labaih 16 ribau urang Lào ngak bruk jhik công nghiệp njauk lahik bruk ngak kayua jit ruak Covid-19, meda hu rajaei Lào dong tuk kan kandah, pok jien dong tagok tal 17 tỷ 700 triệu kíp Lào (labaih 42 tỷ đồng). Kayua jit ruak Covid-19, rilo bruk ngak di negar ninjauk padeih, ba tal bruk urang ngak oh hu bruk ngak. Dalam nan, rilo doanh nghiệp gah jhik brei kreih pabah mbang. Mintri Lao động song  Phúc lợi xã hội Lào brei thau, Urak ni hu labaih 277 doanh nghiệp gah jhik công nghiệp tut angan haong  kadung jien Bảo hiểm xã hội piah likau dong tuk oh hu bruk ngak ka urang ngak

Pasak Khik iek Bruk jit ruak Covid-19 Thái Lan brei thau, yaom lac mbang tamuh jit Cobid-19 birau daok rah tabiak dalam kan kandah, min Thái Lan meda oh brei pacang caga bo maong tame dom urang njom ruak saong bruk njom mbak piah parabha jeng dom labik piah pacang caga jit. Meda hu 4 labik, ngan saong dom jalan pasang iek karei di gauk, hu ba tabiak ngak ka dom tỉnh saong hu ba tame ngak chip.

Sa urang y tế di ban New York, Mỹ njauk dị ứng trak trọng hadei di tuk klauk vắc-xin pacang caga Covid-19 di Hãng jru Pfizer.. Anak bruk ni,Urang dang akaok pasak pasang iek song pacang caga jit ruak Mỹ (CDC) hu panuac kakei dom urang ilamu y tế brei tui iek dom urang  klauk vắc-xin pacang caga  Covid-19 dalam 15 minite hadei di tuk klauk, atau dalam 30 minite meyah urang ruak hu ruak dị ứng trak dalam rup.Dahlau di nan,Mỹ hu urang camereip njauk dị ứng hong vắc-xin pacang caga Covid-19 di Hãng Phai-dơ song Bai-ô-en-tếch, lac sa urang ngak y tế di  A-lát-ca (Alaska) hadei di 10 minite klauk tame./.

Urang lang: Bhumi -Hanipha-  19:00:00