Jit tả pabui Châu Phi di xã Tân Thới (huyện Tân Phú Đông)

Ribuk ka 13 daok samar tame tasik saong baoh taneh negar drei. Ini lac ribuk khang, hangin di bhum jiak ribuk khang pakat 12, tagok pakat 15. Tui kuhria mboh dahlau meng melam 14 saong 15 bilan 11 thun 2020, ribuk tame tapak tal bhum tasik tapen ar saong baoh taneh bhum Barak saong Trung Trung Bộ. Ribuk daok rah tabiak dalam kan kandah, oh ka thau yau halei, yau nan ye, njauk brei tui iek tani tanat, caga ribuk salih jalan nao, tuh tame baoh taneh aval jang atau te dut saong bruk kuhria dahlau. Piah caga ribuk, takik khat lahik, Thủ tướng Rajaei birau payua Công điện ka 1597 iew dom Mentri, dom gah, karaj palei tui bruk ngak hu jao brei, brei peih bruk tui iek tani tanat di ribuk piah tacei ba jalan, peih ngak sumu bruk caga bala tui jalan “ 4 di labik”

Mong 1 meteh jala pandiak harei 12-11, dalam tuk gah chức năng dok duah urang dok lahik song kuac haluk patau piah peih jalan roya 40B di labik palei 1, xã Trà Tân, huyện Bắc Trà My (Quảng Nam), ye rah tabiak bruk glut jaleih taneh labaih 5.000 m3 tuh trun njauk labik ni. Biak patuah, kayua hu khan dahlau yau nan ye oh khat lahik ka drap ar song menuac urang menuac mboh saong preo khan, nan ye oh hu uảng halei njauk hagit. Kayua ribuk ka 12, di tỉnh Ðắk Lắk hu jiak 2.000 boh sang njauk ia dauk song OH nao mai kan kandah hu, jiak 800 ha phun pala dauk dalam ia, rilo jalan mbak, tatua nao mai njauk dauh ia. Dom puk palei dok kham merat pasiam veik dom khut tayah meng bala di langik tasik , dong ka bhap bini pasiam veik bruk ngak mbang pala drak. Di tỉnh Kon Tum, hajan khang ngak glut jaleih 8 labik di jalan Hồ Chí Minh song 5 labik angaok jalan Trường Sơn Ðông ngak gar jalan radeih. Harei kabroi di tỉnh Bình Ðịnh, dok hu labaih 33.400 anek saih oh ka nao bac kayua dom sang bac dok dauh ia song jalan mbak nao mai kan kandah.

Biar harei 12/11, dom urang Quốc hội kateik tanut brei tapa Sarak caga kadung jien di karja thun 2021 ngan saong 92,53% phiếu njauk hatai. Tui nan, jien mek tame di kadung jien karja hu abih tih lac 343 ribau 6 rituh tỉ đồng, sumu 4%. Tui nan, oh brei ramik pasiam mức jien bilan cơ sở, jien bilan padeih hưu, jien daong BHXH, jien daong yaok bilan saong daong urang hu buh prein yawa tame ka cách mạng piah jien ka bruk pacang caga jit Covid-19, pasiam veik dom khut khat kayua bala meng langik tasik, pagrap tanat raidiuk bhap bini xã hội.

Brei panuac di mbang nyaom ASEAN 37 harei 12-11, Thủ tướng Nguyễn Xuân Phúc hu ndom rilo tal makna di nyaom biai mbang ni, brei thau ni lac tuk piah ka ASEAN ngak salah tong abih dom danak dak, dom bruk hu ba tabiak ngak meng akaok thun tal ni, saong batabiak jalan pambuak bruk tuk vak anak tal. Kadha njauk caik hatai di ASEAN 37 mbang ni dok dalam dom ginum biai pataom tame bruk pasiam veik kinh tế, njauk khat lihik kayua jit prong. Tui nan dom negar cong khin Hiệp định pambuak bruk kinh tế abih gah dalam bhum (RCEP) lac jalan ngak prong ka bruk ni. Dom urang pal akaok ASEAN bahrau ni hu panuac ieu samar mbaoh tangin saong ba tame peih ngak hiệp định, rik dong pakhang saong salih bahrau bruk pablei salih rilo gah samu gauk song tui hukum.

Biar harei 12/11, Mban tacei jalan pacang caga jit ruak di athur, manuk ada huyện Tân Phú Đông, tỉnh Tiền Giang brei thau, gam khan brei thau jit tả pabui Châu Phi di xã Tân Thới (huyện Tân Phú Đông). Ini lac sa dalam dom bhum di tỉnh Tiền Giang tamuh veik jit ruak. Dalam huyện kaoh pulao Tân Phú Đông, tỉnh Tiền Giang hu taphon pabui labaih 20 ribau drei. Hadei tuk brei thau hu jit tả pabui Châu Phi di xã Tân Thới, huyen nan daok peih ngak dom bruk piah pacang caga jit di bhum palei ini jeng yau dom labik jaik taphia.

Hu dom khaw tin cagar gauk ka kinh tế Mỹ. Sa gah lac, jit prong COVID-19 dok lac kan kandah prong, ngan saong dom urang njom bahrau tagok khang dalam 10 harei mai ini tuk bilan liar mai tal. Taphia di nan, jeng mboh hu siam tuk urang oh hu bruk ngak dok trun , bruk sản xuất song bruk pablei salih sang danaok hu tagok gilac veik. Meng 2 kadha yau nan biak kan si thau njauk ka kinh tế Mỹ bo ong Joe Biden dang akaok meyah hu jayah song tagok pan akaok di Nhà Trắng harei 20/1/202.

Dom taneh ia châu Âu urak ini hu urang njom ruak Covid-19 tagok gilac veik hadei di tukvak pacang hu ruak siam di mbang jit camereip. Dom taneh ia châu Âu rilo meng hu dom urang njom ruak birau tui harei glaong jang dut saong tuk vak njom ruak mbang camereip. Tui yaok pataom di Hãng tin Reuters, taong abih urang metai kayua Covid-19 di châu Âu mbiah tal ini yam tapa 300.000 urang, meblah jaik ¼ dom urang metai di dunya kayua jit ruak praong.

Tổng cục Hải quan Trung Quốc harei ni (13/11) brei thau negar ni brei padeih blei tame ikan meng công ty Basu International di Ấn Độ dalam sa adit, hadei di tuk mboh janih vi rút Cô-rô-na bahrau angaok klau janih bao bì gah langui di mực liar. Hadei di tuk tamat 7 harei padeih, bruk pablei salih hu pambuak veik. Kayua tui hukum di Tổng cục Hải quan Trung Quốc, dom gah pabak pandap mbang liar njauk padeih bruk dalam sa adit meyah lac pabak pandap hu gam vi rút Cô-rô-na. Dom gah ngak suan hukum ni mangaok 3 mbang brei padeih ngak dalam sa bilan.

Urang lang: Hani Pha – Ái Nghiêm – 13/11 10:55:49