Rilo urang prong thun bac megru ragu ragam mboh biak bui sambai 

Yaok 2 var mesup harei ngar haong harei suk yaok adit, ong Phan Văn Tuấn peih radaih patuh meng quận Bình Thạnh nao tal labik 149 jalan Linh Đông, TP.Thủ Đức piah tame tal bac oh abih jien kayua anai gru Trần Thị Thọ, urang padang tabiak Pasak ragu ragam Upponia peih pato. Hadei di jaik 1 thun tame bac, yaom lac 10 anek tangin di urang taha umo labaih 70 thun ini oh ka biak gheih piah kateik tapa phím đàn, min ong Tuấn mboh biak uan tabuan, kayua drei meda me-in hu dom kadha daoh drei takre, ngak ka bruk caong hu bac nhạc meng tuk daok sit hu jeng biak:

“Biak uan tabuan. Tuk kol dahlak daok sit, sang kan kandah nan ye oh hu jien nao bac âm nhạc. Urak ini kol dahlak meng hu thau tal âm nhạc. 10 anek tangin hu kateik angaok dom phím đàn saong tuk me-in sa kadha daoh halei nan, mboh hadar tal tuk dahlau, bui sambai haong urak ini saong chreih chrai haong harei hadei”

Pasak ragu ragam Upponia hu anai gru Trần Thị Thọ peih tabiak meng 5 thun dahlau. Tuk camereip, pasak pato nhạc ka dom adei sit. Blaoh hadei di nan thau hu hatai takre ragu ragam di dom ong amuk taha tuk ba anek taco di drei mai bac, anai Thọ brei peih tal pato piano oh mek jien ka dom urang praong thun. Tal urak ini, tal bac ini hu labaih 50 urang bac umo labaih 65 thun. Dom urang nan rilo meng lac menuac padeih hưu, jien ndo oh hu hadom.

Yaom lac pato brei saoh min anai Thọ jeng yau dom gru pato di pasak tuk halei jeng abih hatai tacei pato. Anai Thọ padang kadha pato karei ka yaok urang praong thun, ngak ka nyu mbuan piah ka dom nai, dom cei mbuan kanal, mbuan thau. Meyah pato piano ka uraniah lac bruk kan ye pato ka urang taha nyu dak kan jang, kayua dua plak tangin di dom anai, dom cei urak ini nyu khang, akaok sahneng jeng oh daok hadah yau dahlau. Rilo urang bac hadei var dahlau, njauk pato nao pato mai biak rilo mbang, min dom gru pato daok ranaih umo di pak ini oh huac glaih glar bo daok abih drei kham merat, bui sambai. Sa-ai Đinh Lê Hoàng Tài – sa gru pato di pasak khan lac:

“Drei haong dom cei gru, nai gru dalam pasak biak iek praong dom urang bac yau nan. Kayua lac umo thun praong yau nan bo dom anai, dom cei daok klaak tukvak, klak prein yava piah bac yau nan, lac biak njauk pok meyaom. Oh lac urang halei jeng ngak hu yau nan. Tuk drei daong ka dom anai, dom cei me-in hu sa kadha daoh ye drei mboh biak uan tabuan, haniem phul”

Meng bruk abih drei di dom gru pato daok ranaih umo di pasak Upponia hu daong ka dom urang bac praong thun chreih hatai mai bac. Tal bac dak harei dak rilo jang, hu dom menuac meng dom huyện langiu ban yau: Củ Chi, Bình Chánh, Hóc Môn, Nhà Bè, tal dom urang daok atah yau di Tây Ninh, Bình Dương, Đồng Nai jeng ndik 2-3 jalan radaih buýt piah mai bac. Urang halei jeng chreih chrai, bui sambai tuk tame bac. Dom akaok mbuk jhuk patih, dom plak tangin taha kacuh, tateik megei jeng mboh haniem phul tuk hu thau me-in dom phím đàn, hu pabak hatai takre di drei. Rilo urang daok jak diuk, jak pasang mai bac haong gauk, yau ye diuk pasang ong amuk Trần Thị Thu daok di Bình Dương. Yaom lac umo labaih 75 thun min adit halei ong muk jeng pajeng gauk tagok ban Thủ Đức piah bac.

Dom cambuai klao, dom buai sambai haong bruk kham merat di dom urang bac praong thun, nyu ngak ka anai gru Trần Thị Thọ hu pabak prein khang piah khik tal bac. Oh lac pato piano, anai haong dom urang daong bruk daok hu peih dom mbang "Hadah tabiak bruk naih gheih", dom mbang bac daoh, bac chat, tamia piah daong ka dom anai, dom cei mboh bui sambai jang dalam raidiuk. Meng tuk peih tal pato piano ka urang praong thun, anai Thọ jar var jang, glaih glar jang min jeng mboh haniem phul jang:

"Hu rilo urang bac ngak ka drei hu pabak prein khang piah khik veik tal bac ini, pagap yau diuk pasang anai Thu – cei Thành. 2 urang mbuk patih akaok, pajeng gauk mai bac blaoh nao sang pasram haong gauk mboh biak anit. Drei mboh bui sambai, haniem phul dalam bruk ngak ini”

Dalam labaih 5 thun tapa, tal bac piano di Pasak ragu ragam Upponia hu jeng labik pagul sanya bhian randap di urang praong thun takre ragu ragam, hu urang urak ini umo 93 thun. Sap capi di tal bac piano ini hu daong ka umo taha di urang hu makna jang, daong ka urang diukrai bui sambai, diukrai khang kadang haong anek taco. Tal bac ini jeng brei mboh lac: tuk halei, umo thun halei jeng meda tui bruk drei daok caong khin saong meda ngak hu bruk drei takre./.

Urang lang: Mousaphuong -17/4