Glai dauk ia mbak Cần Giờ, ban raya HCM urak ni, lac hala phổi hijao ka ban raya. Di labik ni, yaok pluh ribau ha glai daok hu khik ramik song peih prong. Rik pren dalam nan hu kapul dam dara halan hatain di ban raya, dom urang pambuak pagam song glai luac harei melam, oh lac pandiak atau hajan, oh lac hangin ribuk song rilo kan kandah karei karei. Piah thau jang ka rai duik song bruk ngak di dom urang khik iek glai ni, daa mik va song tong abih gauk pang kadha vak di Vinh Quang, urang vak di rayo sap ndom VN dok di ban raya HCM hu ndom tal bruk nan:

          “Saai Đài lei, hu rilo menuac tame glai jak tah kayau, kapul pasang iek caong hu menuac mai daong hai” bahrau mehit đội viên Trần Minh Tú ieu phone khan brei thau, saai Phạm Văn Đài, Akaok kapul khik iek glai Lý Nhơn song rilo adei saai samar trun gaiy cao tốc mai hu mbaok chip. Tal labik, mboh sa kapul urang pan to, thong dang anak mbaok 2 urang likei halan hatian dalam kapul khik iek glai dalam tangin tok hu gai kayau. Kapul urang nan, lac menuac dalam palei, khin tak dom phun kayau nao pasiam sang danaok, dok dom urang khik iek glai ye khang hatai oh caik ka urang halei mai tak glai. Bruk ni, meyah oh naih gheih song oh khang hatai langyah ye mbuan si rah tabiak bruk tong gauk. Sa-ai Phạm Văn Đài, akaok kapul khik iek glai Lý Nhơn, huyện Cần Giờ khan lac. Mboh sang halei kuhria pasiam sang daok, adei saai khan brei drei thau chip, drei nao pasang iek tapak labik nan, meyah gaok tal glai ye drei ngak biên bản song ieu kiểm lâm trun. Meyah mikva pajeng kayau meng labik karei mai brei pataok di chốt khan brei thau, min adei saai jeng brei pasang iek tapak. Rilo urang padang ngak sang urang brei hu tal 80 phun kayau, urang pajeng mai 60 phun bloh tak di glai 20 phun, adei saai ngak biên bản, urang dui gauk tabiak ndok tong drei, min drei kham merat langyah brei mikva thau.

          Yaom lac daok atah di ban raya 20 mbiak jalan min rai duik adei saai khik iek glai dauk ia mbak Cần Giờ dok biak rilo kan kandah. Takik menuac, min parai tabiak di dom bilai - chốt atah di gauk yaok pluh mbaik jalan. Dalam tuk pandiak thu yau urak ni, glai biak mbuan si khuak song menuac urang loa tame glai jak tah kayau ngak njuh jeng hu rilo jang, adei saai njauk patagok bruk pasang iek meng ala krong tal angaok jalan glai. Dom likei dam halan hatain di labik ni hu mbang jien bilan, yaom lac 3 triệu đồng yaok bilan min jeng daok abih hatai khik caga kayua  ranam sambo hijao di glai. Saai Vũ Đức Thắng, akaok kapul khik iek glai Lôi Giang hu 23 thun pambuak pagam haong bruk pala song khik iek glai khan brei thau dom glaih glar yau ini:  Hu rilo mbang, tuk harei hu menuac tame tak glai, caga tuk lingik  laik sup, tuk adei sa-ai huak lisei ye loa pajeng nao. Thau lac yau nan, adei sa-ai tuk halei jeng khik caga, pandar gaiy hu gom hadah atah piah nao pasang iek, pacang cakak meng ala kraong tal angaok thu, chap hu urang halei ye adei saai khan brei kiểm lâm thau piah  langyah.

          Tukvak jiak di ni, meng hu jhul khang bruk pato pakai, pathau khan, akaok sahaneng ka bruk khik iek glai di mikva labik ini hu patagok. Thau saong mboh anit ka bruk khik iek glai, rilo dam dara dalam palei likau tame kapul halan hatain piah khik eik glai. Saai Trần Minh Tú, sa likei dam daok di Cần Giờ, tame kapul khik iek glai Lý Nhơn sa thun ni mai khan lac: Dok di labik ni pambuak pagam song Cần Giờ meng livik mai, nan ye likau tame kapul khik iek glai, di labik ni adei saai biak anit ranam gauk, dong ba gauk. Bruk di drei ye drei brei ngak, urak ni hu mbaok dalam kapul ye, bruk di drei nan lac brei khik iek glai, piah khik caga  kaya pandap ka taneh ia.

Rilo dam dara halan hatain dok khik iek glai Cần Giờ ndom lac, dok jiak tapen ban raya bo tame dok dalam glai, oh bui sambai, rilo tuk khin nduac mai labik hu rilo menuac. Min tuk hu padeih adat mai ban raya hu dom harei ye mboh uan dom phun tràm, phun đước, uan sambo aow hajao anit ranam. Song kayua hatai uan ranam nan, kayua pagam pambuak song glai yau nan bo dom dam dara halan hatain ban raya jeng dok harei melam duik song sambo hijao di glai./. 

                                                                           Biên dịch: Ha Ni Pha