Cách mạng bilan 8 jak jeng, Sở Công an Bắc bộ hu padang tagok piah khik caga karja cách mạng, ong Phạm Gia Đốc hadah mbaok meta hu pok ngak Akok kapul Công an di đơn vị ini. Dalam baoh sang di jalan Hàng Quạt, Hà Nội, umo 97 thun min ong Đốc daok hadar kanal bruk druat druai tuk hu Yam ndoc Sở Công An Bắc Bộ Chu Đình Xương jao brei bruk khik iek lễ đài dalam harei Negar 2/9/1945. Peih veik blah thaok binguk sambo jhuk mbong, par sambo tui thun bilan, hu khik piah yau drap ar hu yaom glong di sang drei, ong Phạm Gia Đốc druat druai brei thau nan lac bruk praong glaong lo, gireih lo saong biak hadah mbaok meta:

          “ Dahlau di nan 2 harei, ong Chu Đình Xương lac Yam ndoc brei thau lac mek dom kapol, dahlak lac dalam kapol nan. Sa-ai tuah tamo phớt, dang anak lac sa-ai Dương, dahlak dang taphia nan. Jao bruk ka khol dahlak, dom sa-ai kakei lac ngak habar khik hu salamat lễ đài. Tuk mai tal labik nan hu urang tacei pato. Meteh bui sambai, meteh haduh hatai tuk nao khik sa lễ đài hu mak na biak praong yau nan.”

          Kayua makna biak praong di bruk ngak njauk khik kandauk, ong Phạm Gia Đốc saong dom ayut tok brei thau dahlau tuk peih bruk tabiak tuyên ngôn độc lập dua harei. Thau hu makna praong glaong di bruk nan saong tok jao ka dom urang hu hatai jia, ong Phạm Gia Đốc jeng mboh huac, mboh haduh hatai kayua brei khik hu salamat lễ đài, abih di nyu lac angaok nan hu dom urang praong saong ala nan hu yaok trieu bhap bini. Piah khik hu salamat abih gah, ong tame Mblang bein Ba Đình rilo mbang, tui iek yaok labik.

          Harei praong nan jeng mai tal, bruk mittinh rah tabiak meng mong 2 jala pandiak harei 2/9/1945 min ong Đốc saong kapol urang khik lễ đài di Sở Công an Bắc bộ hu mbaok meng subuh page piah caga bruk ngak. Abih urang dalam kapol angui cuh ao capha mbong, dang atah di labik lễ đài dom met min. Ngak bruk min ong jeng chreih chrai caong thau thei dang angaok nan, abih di nyu nan lac tuk pang sap Wa Ho bac tagok dom panuac camereip di Tuyên ngôn độc lập: “Hei bhap bini dalam negar!”… ong kham ein dalam tian dom haniem phol praong nde langik tasik, piah khik kajap hatai, ngak bruk, dang kadang ngak bruk. Tui nan, meta maong anak, tui iek dom bruk hagait karei di  dom urang meda meblak tame labik yaok trieu manuac di Quảng Trường piah ngak sraw kadau. Ong Phạm Gia Đốc hadar veik:

          “ Tuk radaih di Wa mai tal, nduac meng jalan Quán Thánh tame. Labik khol dahlak dang taphia, radaih tame gah likuh. Dahlak tok thau radaih tame min oh thau dalam radaih hu thei, hu dom urang, kayua oh brei maong tagok, dang kadang yau rup patau. Hadei di nan Wa Ho puac Tuyên ngôn Độc lập tangi sua: “Bhap bini pang cambaic ha-oh”,  bhap bini javap jalei lac pang hu cambaic. Dalam hatai baoh dahlak bui sambai ralo”

          Jeng dalam kapol urang hu khik lễ đài, Đại tá Nguyễn Bội Giong, dahlau diah lac Bí thư di Văn phòng Tổng Chính ủy, Bộ Quốc phòng, tuk nan lac urang chính trị kapol Tự vệ mesruh metak di Việt Minh palei Sét, huyện Thanh Trì, langiu Ban Ha Noi. Đại tá Nguyễn Bội Giong brei thau, tuk ngak bruk dang ala takai lễ đài, bruk hadei di tuk mek hu rajaei daok rilo sraw kadau, bhap bini njauk hatai, min oh iek lap anak dom urang gah cagar veik cách mạng daok kandong veik. Dalam trang nghiem di Mblang bein Ba Đình, yaok trieu urang kandang jua pang yaok baoh panuac Wa Ho, min ong Nguyễn Bội Giong saong tapon nyom bol pan phao karong jeng daok paglaong hatai sangka, caga dahlau dom bruk jhak, kuhria dahlau dom jalan ngak, oh huac di metai lahik:

          “ Bhap bini dang anak labaih 100 mét, nan ye meyah kol nyu hu phao ye kan di cuh njauk. Dalam dom kapol urang tagok, brei ngak tui bruk ba tabiak: dahlau tuk kapol nyaom nan hu tame lễ đài, njauk pasang iek yaok urang. Jeng hu kuhria abih, meyah hu ye tok lac baoh patuh, jru patuh. Bo adei sa-ai oh huac metai lahik, meyah dahlak mboh urang halei chat tabiak bo hu baoh patuh, dahlak jeng oh huac metai chat tame kua veik. Siam di abih brei khik kajap lễ đài.”

          Biar harei 2/9/1945, bruk Tuyên ngôn độc lập hu tamat dalam ginreih, dalam bui sambai, chreih chrai. Var lễ hu jaik triệu manuac khik hu salamat di abih,  trieu manuac di Mblang bein Ba Đình tuh tabiak dom jalan dalam ban ba tui bingu, hala dok bhong meriah patuk kanyik. Abih gauk jeng pok sap preo khang: Pachreih tui rajaei Hồ Chí Minh, Việt Nam độc lập miat miat. 75 thun tapa blaoh, thaot bingu dom urang jakar, urang lin khik lễ đài daok miat miat daok dalam akok dalam baoh hatai saong mboh hadah mnbaok meta ka tukvak sajarah dakrai, caik hatai tui pang sap suan yava ginreih taneh ia dalam panuac di Wa Ho./.

Urang lang: Aí Nghiêm  2/9/2020