Tuk langik hajan yau jang pandiak ong kham duan hareik klaak langui jalan 

  Lac menuac daok dalam palei hong ong Hồ Cửu, muk  Hồ Thị Lũ jeng mboh, ong Cửu sa ong taha angaok tangin pal gai koa hareik  song sa baoh thung, yaok harei nao rah tui takai tasik  piah pataom mek hareik  hu jeng bhian randap song bhap bini bhum tasik  Phước Thể, huyện Tuy Phong . Ong pataom rilo mbang radeih hareik yau nan tame sa labik bloh am chip dalam harei. Bruk ngak di  ong Cửu hu dong ka ar tasik hacih saat saong dok dong ka mik va dalam puk palei paglong hatai saheng jang dalam bruk khik ramik hacih saat, takik klaak hareik ban glai ban glo.Amuk  Hồ Thị Lũ- urang dok dalam palei hong ong Cửu ndom lac:

"Hulin mboh bruk ngak di saai Cửu biak hu makna.Hulin biak pachreih tui bruk ngak di saai. Saai bhian pataom mek hareik, kuac pataom ia nerak  luac harei. Saai bhian ndom lac mboh bhap bini hu hacih saat ye drei mboh bui sambai".

Piah jak ba menuac sia pataom mek hareik yau drei, ong Hồ Cửu buh jien tabiak blei sa thung hareik caik dalam palei song jak ba mik va klaak hareik tame thung. Dom labik halei bhian gar ia hajan, kan kandah tal bruk nao mai dalam palei, ong Cửu buh jien tabiak blei pandap njuk ia song gam ngak gam ieu bhap bini 2 gah jalan hu mbaok tame. Ong Trần La, sa urang daok di palei  3, xã Phước Thể ndom lac, bruk ngak di ong Hồ Cửu rik dong biak rilo dalam bruk padang ngak palei pala bahrau pak ni:

"lac urang dok jiak sang, hulin mboh dom bruk ngak di ong Cửu biak siam, biak kein ka menuac sia song hu dong ka xã Phước Thể tagok palei pala bahrau. Biak njauk pok meyaom. Di pak ni hulin mboh taeng ong Cửu ngak bruk ni".

Lac urang taha, praong thun, sang ong jeng ngak nong yau rilo sang karei dalam  xã, ong Hồ Cửu  patak pataom, kali kalik biak lavik meng blei hu sruh radaih piah nao pataom hareik , "likau hareik". Yaok harei, ong iek bruk nao pataom mek hareik lac bruk njauk ngak, yaom lac oh thei pah, oh hu jien padai hagait. Thun  2015, tuk palei ba tabiak danak dak  “Pui hadah khik caga siam mekre ”, caik gom ka dom jalan sit, ong Hồ Cửu jeng ba jien patak pataom di drei tabiak dong ka palei blei gom điện, talei điện. Ngan song ong Hồ Cửu, bruk ni jang yau bruk sang di drei, ngak hu bruk gait lac ong halan hatain:  

"Hulin blei 2 sruh radeih  piah pajeng ia nerak, ngak hacih saat jalan nao, abih labaih 3 triệu đồng. Hulin pasiam veik dom jalan bê tông jeng abih meng  4- 5 triệu đồng. Hulin sahneng lac bruk di puk palei jeng lac bruk di drei, labik halei khut ye drei ngak"

Bruk ngak di ong Hồ Cửu hu pambak tal rilo bhap bini dalam puk palei. Meng nan, rilo urang tuk lahaiy ye nao daong ong  Cửu ngak brukk.  Meng dom bruk ngak siam, hu kein ka puk palei,  ong Hồ Cửu hu UBND tỉnh Bình Thuận brei harak meyaom dalam bruk pakacah gauk  “Sa pren, sa hatai padang ngak palei pala bahrau”.Bahrau ni,ong hadah mbaok meta taduan hu harak meyaom di Thủ tướng rajaei  ka bruk pakacah “Abih gauk dalam negar rik pren padang ngak palei pala bahrau”.Ong Đặng Thiện Viên, Chủ tịch UBND xã Phước Thể, huyện Tuy Phong, tỉnh Bình Thuận brei thau:

 "Meng rilo thun ni mai, bruk ngak di wa  Cửu lac bruk ngak kandang joa, eng drei khin ngak. Tuk ngak oh yaih khan, oh khin breoi urang mboh blaoh meyaom, jeng oh hu urang halei tacei ngak. Dom thun ni mai, wa jeng dok ngak bruk di drei.Dom jabat, dom tuai  du lịch jeng biak pok meyaom bruk ngak di wa".

Ngan song ong Hồ Cửu, bruk ngak brei hacih saat alam môi trường, pataom mek hareik, mek ia nerak hu ong ngak mbiah tal tuk halei oh daok hu prein piah ngak. Min hatai cong khin prong abih di ong lac akaok saheng di yaok urang, dom hareik hareim tapen takai tasik urak ni hu trun meneing song meda hu rilo menuac jang, abih di nyu nan lac dom ayut ranaih umo ba tangin tame khik ramik alam môi trường hajao, hacih, mekre./.

Urang lang: Hanipha- 14/12