Dalikan ka sa urang meblah glai jeng menuac khik caga glai

- 3 thun dahlau, oh hu taneh pala drak, saai Katơr Kinh daok di palei Hành Rạc, xã Phước Bình, huyện Bác Ái, tỉnh Ninh Thuận bhian nao jah tak glai ngak apuh. Dalam sa mbang jah tak glai, saai njauk urang cakar khik iek glai cap mek saong njauk guk 4 thun ka bruk ngak suan hukum nan. Cải tạo siam, saai hu palao tabiak sang guk dahlau tukvak saong meng di nan, hatai sahaneng ka bruk khik caga glai di saai Katơr Kinh salih karei rilo. Tuk hu xã Phước Bình ba tame tổ bhapbini khik caga glai, saai abih hatai pataom tame saong hadei di nan, hu mikva pok ngak akaok palei Hành Rạc: “ meng sa urang jah tak glai tal urak ini ngak phó tổ bhapnini khik caga glai. Tui Wa Hồ ndom lac glai pacang bộ đội, glai pacang kol khamang. Glai raong dom anek athur. Meng di nan, drei njauk khik caga gam gam. Drei nao khik iek dalam bhapnini drei, khik caga glai piah urang ngak apuh oh lih mek glai.

 Meng bruk lac sang bhian kurang mbang kurang cuk, tal urak ini, saai Katơr Kinh thau duah mbang pambak tame glai, ngak hijao dom glai dahlau dhiah gaok jah tak meng bruk pala pablak tangei lai saong phun mbang baoh ye: kruac bung, patei. Piah glai hijao jang, saai Katơr Kinh daok salih rilo janih phun pala lagaih saong lingik di puk palei. Dalam yaok mbang taom gaok mikva, saai Katơr Kinh jeng mek bruk di drei piah jak ba mikva gam ngak tui bruk khik caga glai, pacang caga khuah glai. Saai Chamaléa Đơ, urang bhapbini xã Phước Bình, huyện Bác Ái brei thau: “ Harei ini saai Ka tơ Kinh rút kinh nghiệm paje. Saai nan tame tổ bhapbini kakei adei saai dalam tổ, gam mikva drei. Saai ngak biak siam. Meng di nan tal ini, oh hu thei  jah tak glai tra.

-Lac urang dahlau dhiah jah tak glai yau nan ye saai thau, caong pathau khan ka mikva oh jah tak glai ngak apuh ye rup drei saong dom urang dalam tổ njauk nao dahlau. Meng gam gam pathau khan, nan ye saai Katơr  Kinh jak ba hu rilo mikva dalam palei Hành Rạc halan hatian mboah tangin sanya khik caga, patagok glai, pacang caga khuah glai.

-Dom bruk ngak di saai Katơr Kinh hu patagok hatai jum pataom di dom urang dalam tổ bhapbini khik caga glai. Meng nan, rilo thun tapa, palei Hành Rạc, xã Phước Bình, huyện Bác Ái, tỉnh Ninh Thuận oh caik rah tabiak khuah glai, jah tak glai suan hukum, urang bhapbini ngak tui siam dom adat hukum di karja ka bruk khik caga glai, pacang caga khuah glai./.

Thúy Linh/ VOV-TPHCM