Hadei di labaih 25 thun ngak bruk,  ong Thạch Sỏi daok di palei Trà Ông, xã Viên Bình, huyện Trần Đề padeih hưu. Lac urang jakar bangsa takik, hu ilamu chính trị, ngak bruk naih joi saong hu angan je dalam bhap bini, mai veik palei, ong hu ruah lac urang hu angan je dalam palei. Meng nan, ong kham jak ba mikva ngak siam jalan tacei ba di Đảng, hukum di Karja, jak ba mikva ba gauk padang ngak palei pala.

Dalam dom thun tapa, ong Sỏi gam saong Ban quản trị, akaok baha Lao Dên (Phđao - Pên) jak ba mikva rik daong prein yawa, jien padai tame padang ngak palei pala birau. Yaok rituh mét jalan tuh menyek gam labaih 20 baoh taua betong hu padang tagok, daong ka mikva pajeng ba pandap panda, anek bik nao bac hu lagaih. Ong Trần Quốc An, Akok Jabat Bangsa huyện Trần Đề brei thau: “Urang bhian sahaneng, meyah karja ngak jalan ye hu bayar jien veik, min sa-ai Thạch Sỏi hu langyah brei mikva thau lac ngak jalan kein lagaih ka abih gauk, pathau khan, jak ba mikva kaoh taneh peih jalan, meyah hu urang taha, ruak kik radaih tame hu tal sang, ba tame sang iek ruak chip. Dalam palei, sang halei kaya ye blei radaih, mikva, anek saih nao bac da hu lagaih.”

Ong Thạch Sỏi daok lac urang yau kareih camin hadah dalam bruk daong gauk ngak kinh tế, patruh iek patrun kan kathaot di xã Viên Bình. Ong daong mikva kan kathaot oh hu phun jien ngak mbang tapa bruk pablei pabui anek dahlau bayar hadei piak ka mikva raong. Gam tui nan, tacei pato mikva ilamu raong glang ka pabui praong siam, rilo mikva hu tapa truh kan kathaot. Ong lac urang ba akaok nao dahlau dalam bruk raong limo mek ia tasau di palei. Ini lac bruk ngak hu makna praong, ba mai kein laba glaong, tapa nan rilo sang di Viên Bình yam tagok  ngak kaya meda di bhum taneh di drei. Ong Thạch Sỏi lac: “ Dahlau di ini, rilo mikva ngak hamu bhian khat lahik, oh hu laba, hu sang daok tavak sre. Urak ini, raong limo ia tasau raidiuk mikva hu salih birau. Rilo sang mek jien laba meng bruk raong limo buh tame ngak padai duah jien tame rilo. Taphon limo jeng praong siam brei rilo ia tasau.”

Ong Thạch Sỏi jeng lac urang ngak nong naih joi di palei. Urak ini, sang ong daok raong 10 drei limo ia tasau saong 10 drei limo lai sind. Tui nan, 5 drei daok brei ia tasau hu 50 kg yaok harei, pablei hu labiah 10 triệu sa bilan. Meng thau ilamu raong glang yau nan ye ong hu mikva saong urang jakar dalam xa palih ruah ngak akok kapol urang raong limo ia tasau di xã Viên Bình. Ong tacei pato iek glang limo piah brei ia tasau yamen bingi, pablei hu yaom glaong.

          Daok ong Sơn Nát, daok di palei Tiếp Nhựt, xã Viên An, huyen Trần Đề lac urang hu ngan di palei naih joi ralo bruk ba pajaih padai đặc sản, asar padai siam, brei kein laba kinh tế mai ka pablei pala drak. Lac ayut di Kỹ sư Hồ Quang Cua, Phó giám đốc sở ngak nong saong patagok palei pala tỉnh Sóc Trăng dahlau diah, urang ngak tabiak dom janih pajaih padai đặc sản ST, nan ye dom harak tài liệu, ilamu khoa học ka bruk ngak padai hu ayut ini abih hatai tacei pato ka ong ba tame ngak ka hamu di sang drei; bloh ong Nát daok hu tacei pato veik ka mikva dalam palei.

Tui ong Sơn Nát, dahlau di ini bhum taneh Viên An ngak padai pajaih palei oh siam, min labaih 15 thun ini mai yam tagok ngak pajaih padai ST1-ST5 saong ST24, RVT. Piah ngak hamu, duah hu laba, ông jak ba mikva tame ngak hamu pablei sa labik, hu yau nan duah hu kein laba tani tanat. Urak ini, dalam xa Vien An, huyen Trần Đề  hu labaih 80% taneh ngak padai pajaih asar siam, ba mai kein laba ka baoh sang saong mikva dalam palei. Ong Nat lac: “ Drei brei ngak dahlau, mikva mboh drei ngak blaoh ngak tui. Mikva tangi sua jalan pala, bruk halei drei thau ye drei khan ka mikva. Dahlau diah, oh hu rilo kadha duah thau yau urak ini. Ayut di dahlak lac ông Hồ Quang Cua, mboh dahlak pala blaoh brei tài lieu pala drak, tacei pato ka dahlak, meng nan hu thau blaoh tacei ka mikva. Thun ini, kapol nyaom di dahlak  pala labaih 1.000 he padai Nàng Tím, janih padai đặc sản di ong Hồ Quang Cua.”

Dom thun tapa, urang hu angan je dalam mikva urang bangsa takik hu jeng dom urang rik tame rilo dalam bruk jak ba  gauk pakacak anit ranam taneh ia, ngak siam dom bruk jak ba di palei. Urang hu angan je dalam bhap bini bangsa takik daok ngak siam bruk pambuak  bhap bini saong Đảng, Karja saong Mặt trận Tổ quốc dom pakat. Tui nan, jak ba mikva pagalong bruk sahaneng caga jeng yau samar thau lac kol kanjiak jhak; khik caga an ninh trat tu, khik ramik ilamu bangsa; tah klak dom bruk oh lagaih, me tin di doan; pataom tame ngak mbang patagok kinh texa hoi, padang baoh sang ilamo, rik daong padang ngak  palei pala birau./.