Dalikan: OH KHIN TABIAK TRUH KATHAOT

*******

# Pathau mikva saong taong abih gauk! Dom thun tapa, bruk peih ngak dom sarak di Đảng, hukum di Karja ka bruk patruh eik patrun kathaot, abih di nyu nan lac di dom xã biak kan kandah, bhum bhap bini bangsa takik saong bhum ceik hu ba mai rilo jak jeng praong, daong ka rilo sang kan kathaot hu raidiuk siam jang.

#Min dalam bruk patruh eik patrun kathaot jeng tamuh tabiak dom bruk oh siam yau ye duah laba ka rup drei meng sarak, pagam pambak tame bruk daong di karja saong di bhap bini, bo oh khin yam tagok tabiak truh kan kathaot.

#Dalikan OH KHIN TABIAK TRUH KATHAOT di Hồng Thủy brei mboh ka hatai sahneng ini saong pok meyaom dom baoh sang kathaot thau hu bruk siam mekre di sarak patrun kathaot khang kajap:

Dẫn chuyện: Sang amuk Tư daok dalam palei biak kan kandah di huyện Bắc Bình, tỉnh Bình Thuận. Sa page mesup harei nan, yau hu sanya dahlau, amuk Sáu, urang daok jaik sang diuk pasang amuk Tư tapa jak amuk Tư nao darak pasar:

Bà Sáu: Sa-ai Tư lơi sa-ai Tư, jala ye bo habar oh ka nao darak ini?

Bà Tư: Sáu hả? cang kau hasit, kau tabiak chip ini…

Bà Sáu: Po, khin dahlak daong hagait halei oh, piah samar nao

Bà Tư: Bloh ye, min ini, daong kau yaok pok jien ini iek.

Bà Sáu: Po, jien halei bo rilo yau nan, bahrau njauk số hả?

Bà Tư: Hu blei số halei bo njauk, jien diuk pasang kau nao kaoh  cỏ voi, cỏ sả…  pablei pataom piah meng livik mai nan

Bà Sáu: Sa-ai Tư gheih biak, thau patak pataom. Yau nan jien ini piah ngak hagait sa-ai?

Bà Tư:  Lac melam bloh diuk pasang kau jeng hu ginum gauk, ginum nao ginum mai. Mehit sang amuk Linh palei 1 daok ieu pablei drei la-oi, pajaih lai Sind. Kuhria lac jala ini nao darak mai, kau haong  Sáu vaih tame iek, meyah mboh jeng, drei caik cọc blei.

Bà Sáu: Yau nan sa-ai Tư kuhria salih tapa raong limo há?

Bà Tư: Hừ, harei nao họp kapul urang kumei, mehit yaih khan bruk raong limo lai, mboh mahu lô. Hu karja daong ilamu kỹ thuật, daong klauk jru pacang caga ruak…sang drei hu dom sào hareik lac ginup ka limo mbang, meyah kurang ye adei sa-ai dalam kapul lac daong brei pong nan.

Bà Sáu: Min……

Bà Tư: Min hagait, bruk raong limo mboh urang raong hu siam ye, bo daok hu thú ý urang klauk jru brei, oh huac ruak kik hagait.

Bà Sáu: Ô..oh lac yau nan, bo dahlak khin ndom lac, drei njauk blei la-oi halei ô, hay cứ caik jien piah nan…

Bà Tư: Blei la-oi raong praong nyu ndih tapui, oh raong bo pablei jeng hu laba, daok jien piah nan nyu caih laba hu lei?

Bà Sáu: Sa-ai Tư lơi, dahlak khin ndom lac, sang dahlak haong sang sa-ai daok lac angan sang kathaot, hu daong jien yaok bilan. Urak ini drei hu jien blei limo, yau nan daok taduan hu jien daong halei oh?

Bà Tư: Hừ..hừ.., bo daok bảo hiểm y tế gac. Bahrau ini pasang kau blac ruột thừa, lac sang kathaot hu Karja daong taong abih jien jien blac raih, meyah oh hu yau nan, ye daok hagait jien pataom meng livik mai ini.

Bà Sáu: nan nan, ruak kik hu bảo hiểm kuhria brei, kol nek naih nao bac hu miễn học phí, urak ini drei hu jien blei limo, bloh tabiak truh kathaot, thei bo daong drei tra.

Bà Tư: Hừ.. Sáu biai jeng njauk, piah kau ginum veik haong pasang kau iek habar.

Bà Sáu: Sa-ai Tư thau halei oh, khan biak brei sa-ai thau, diuk pasang dahlak thun bloh hu Kalup kapul Nhân ái daong jien oh mek laba, raong dom drei pabe bloh pablei jeng duah hu hasit jien. Kuhria ngak pasiam veik sang piah tal bilan hajan oh daok huac ia hajan sraiy tame, min mehit lac jaik hu kapul ngak pahla di ban raya mai, duah dom baoh sang kathaot dalam palei piah daong tôn tauk tabung saong brei bồn ia nan ye dahlak meng padeih ngak.

Bà Tư: Yau nan hả, bo habar Sáu thau lac jaik hu kapul ngak pahala mai?

Bà Sáu: Yau nan sa-ai Tư likei oh khan brei sa-ai thau há? Bruk nyu yau ini, harei sa-ai Tư likei nao họp kapul urang ngak nong di xã nan, bloh dahlak tapa duah sa-ai, hu sa-ai Tư khan dahlak meng thau.

Bà Tư: Kau hu mehit ong nan lac hagait lei. Piah melam kau sua veik iek. Daok urak ini adei sa-ai drei nao darak nao, jala ye. Bruk ini piah iek veik.

Bà Sáu: Po, min sa-ai jhui khan brei thei thau, adei sa-ai drei yau menuac dalam sang dahlak meng khan brei thau, daok menuac lingiu urang mehit ye oh siam.

Bà Tư: Hừ ..Sáu jhui huac hagait, kau thau piah kau sahneng veik.

-Nhạc nổi….

Dẫn chuyện: Melam nan, hadei di tuk lisei ia bloh, diuk pasang amuk Tư daok la menyum ia tea, amuk Tư meng ba bruk di tuk page tabiak khan brei pasang pang:

Bà Tư: Ong ini, dahlak sahneng veik mboh lac…drei jhui blei drei la-oi di sang anai Linh nan…

Ông Hải: Habar ..oh blei, nai nan ieu yaom glaong hả? Min drei la-oi nan pajaih siam, yaom glaong hasit jeng hu min…

Bà Tư : Ô..oh lac yau nan, dahlak oh ka tapa nan, min sahneng veik mboh lac…siam jang…drei jhui blei.

Ông Hải: Drei sahneng habar bo yau nan, melam bloh drei ginum gauk njauk gauk bloh paje.

Bà Tư : Bruk lac yau ini, mesup ini mo Sáu nyu tapa jak nao pasar, bloh nyu lac ………………….

Ông Hải: Mo Sáu nyu lac habar? Ini, amuk jhui lac mek jien me-in hụi  atau blei pandap trả góp ini daih nye. Lah pachot urang min.

Bà Tư : Ô..ong thau ye, meng halei mai ngak hagait, blei hagait drei jeng sua gauk, ginum gauk. Yau ong thau mbiah, jien halei bo me-in hụi.

Ông Hải: Yau nan muk caik jien piah ngak hagait bo oh khin blei la-oi?

Bà Tư: Oh piah ngak hagait, bo bruk nyu yau ini: Meyah drei blei la-mo, palei thau drei hu jien ye urang ba sang drei tabiak truh angan sang kan kathaot nan…

Ông Hải: Tabiak truh angan sang kathaot hả? Tabiak truh ye drei uan tabuan, habar bo muk oh khin?

Bà Tư: Thei bo khin kathaot miat halei. Min meyah oh daok dalam angan sang kathaot, habar drei hu Karja daong, tuk nan anek nao bac jeng abih jien.Bo bảo hiểm jeng oh bayar abih yaom jien iek ruak, meyah labuh ruak ye abih rilo jien lô nan ong lơi.

Ông Hải: Hừ, sang kathaot jeng hu karja daong brei rilo biak, min amuk njauk thau lac, urang daong piah ka drei kham merat tabiak truh kathaot, oh njauk lac daok nan cang karja daong miat hu.

Bà Tư : Yau nan ..tui ong..lac drei njauk blei limo mai raong hả?

Ông Hải: Blei, njauk blei…oh blei habar hu? Dalam palei drei hu dom sang urang tabiak truh kathaot  meng raong lamo nan, amuk mboh oh hagait? Dom thun tapa drei hu karja daong rilo ye, urak ini meyah tabiak truh hu kan kathaot ye drei njauk tabiak. Daok hu rilo sang urang kathaot jang drei, yau sang cei Tưởng nan, bahrau njauk bala jaoh talang lasuk, ta-eng diuk cei ngak raong 4 urang nek…

Bà Tư: Yau nan drei blei drei la-oi mai raong hả? Min harei ong nao hop di xã hu mehit lac jaik hu kapul ngak pahla mai palei drei hả?

Ông Hải: hừ..mehit lac yau nan, mehit lac urang mai daong tôn tauk tabung sang.

Bà Tư: Nan drei ka blei jhui nye. Sang drei tôn jeng klak abih ye…

Ông Hải: Ới muk lơi…, muk sahneng hagait ka nyu glaih..Tôn sang drei jeng daok pandar hu 2 – 3 thun tra, cang hagait salih chip, piah ka sang karei urang daok taik tahak jang drei.

Bà Tư: Hừ…ong biai ye dahlak pang tui.

Ông Hải: Baoh sang ini jeng hu padang meng danak dak 167 lac padang sang ka urang kan kathaot. Drei hu bloh ye, urak ini piah ka urang karei hu mbang tui hai.

Bà Tư: Ong biai biak njauk. Harei daih mo anek kacua di drei nyu mai ravang sang, nyu sua lac amaik lơi tuk halei sang drei tabiak truh angan sang kathaot, ngak ka dahlak jeng mboh suh sah dalam hatai.

Ông Hải: Njauk…njauk paje.., anek drei nyu praong abih ye, nyu jeng mboh melau. Nyu kham ngak mbang brei hu yau urang, drei ngak amaik ame jeng kham ngak piah tabiak truh kan kathaot, brei ka anek nyu hadah mbaok meta haong urang hai. Yaok sang hu kaya ye puk palei jeng hu hadah tagok, tuk nyu ba ayut likei di nyu mai klah melau haong urang. Muk mboh yau habar?

Bà Tư: Ong biai biak njauk, piah pagaiy dahlak tapa biai haong mo Sáu, bloh dahlak haong nyu ba gauk tagok xã likau tabiak truh angan sang kathaot na ong?

Ông Hải: Hừ..muk pilih ruah panuac biai habar ka mo Sáu nyu thau, nai nan jeng lac menuac siam, thau bruk, min kayua sahneng oh ka tal.

Bà Tư: Biak yau nan, anai nan biak siam hatai, yaom lac sang kan kathaot min tuk sang drei gaok kan kandah hagait ye anai halan hatian brei nyim, hu tuk dom pluh, hu tuk dom ratuh…

Ông Hải: Jeng thau yau nan, diuk pasang mo Sáu oh lac lah matah bo kayua dahlau daih me-in hụi njauk urang handaoh lahik abih jien, njauk ba sổ đỏ nao padang, bloh laik tame sraiy dangaiy, rambah rambup, min urak ini jeng ngak mbang hu veik, drei biai nyu meda pang tui.

  Dẫn chuyện: Dom harei hadei, di trụ sở ủy ban xã:

Ông Trọng: Salam sa-ai Tư, sa-ai Sáu, dua sa-ai hu bruk hagait bo tagok xã avar yau ini? Tagok mek jien daong baoh sang kan kathaot hả?

Bà Tư: Po, kol dahlak tagok ini hu hasit bruk, likau gaok ong chủ tịch hasit hu hai oh?

Ông Trọng: Hu..hu min! Bruk hagait tame padeih glaih ka meng ndom.

Bà Sáu: Po..bruk lac yau ini: 2 sang kol dahlak lac sang angan kathaot 5 thun paje, hu karja daong jeng rilo paje, Harei ini kol dahlak mboh lac drei ginup pren piah tabiak truh angan sang kathaot, nan ye tagok khan haong xã piah ba sang kol dahlak tabiak truh angan. Meyah hu bruk hagait daong ye piah brei ka dom sang karei daok kan kandah jang sang kol dahlak.

Ông Trọng: Siam lô..siam lô! Nan ..dahlak lambaok ka dom urang pan akaok Ủy ban pok meyaom 2 sa-ai nye. Meyah thei jeng oh khin tabiak truh kathaot ye baoh sang kathaot thun hadei glaong jang thun dahlau, lac naong trak ka… kadung jien karja.

Bà Tư: Tapa ini adei sa-ai kol dahlak jeng hu panuac dhar phor karja saong dom kapul nyaom tukvak tapa hu daong ka sang kol dahlak, meng nan bo kol dahlak hu tabiak truh kan kathaot.

Ông Trọng: Anak tal, dalam mbang nyaom taong yaom baoh sang kathaot dalam xã, ye xã brei pok meyaom bruk halan hatian tabiak truh kathaot di dua sa-ai. Anak meta jeng mboh lac, hu sang yaom lac ngak mbang hu tagok min jeng daok khang panuac lac sang drei kan kandah, saong daok hu dom sang kathaot min oh kham merat ngak mbang, bo khin …kathaot piah hu mbang tui dom sarak. Xã meda khang hatai ba tabiak truh angan lac sang kathaot dom sang daok pagam pambak tame bruk daong, oh khin ngak mbang piah tabiak truh kathaot. Kol drei njauk khang hatai klaak kathaot ye xã hội meng tagok hu!

Bà Tư: Biak di nyu kol dahlak jeng daok having akaok dalam jalan ngak mbang. Caong lac hadei ini hu dom sa-ai tacei jalan ngak yau habar ka hu kein laba.

Ông Trọng: Po…dua sa-ai jhui huac. Bruk jak ba “5 oh, 3 hacih” kak kajap haong bruk padang ngak palei pala bahrau tal thun 2025 hu yaok hội viên urang kumei xã drei abih hatai pachreih tui, thau biak cambaih laih nan ye nyu ngak hu biak siam. Urak ini da-a dua sa-ai tapa duk taphia ini ngak thủ tục bloh Kapul urang kumei xã brei menuac nao tal sang piah tacei pato ka 2 sa-ai.

Bà Sáu: Po, dahlak hu tame bruk Jak ba “5 oh, 3 hacih”. Nan lac oh eik lapa kathaot rambah, oh ngak suan adat hukum saong tệ nạn xã hội, oh hu bạo lực gia đình, oh ndih tapui anek ka klau tagok, oh hu anek naih lavang lavaih saong klaak bac, sang hacih, ging hacih, jalan hacih…

          ÔngTrọng: Njauk paje,tadhau ayuh ka 2 sa-ai oh lac ngak meda ka sang drei bo hadei ini daok hu jien daong ka dom sang karei. Jia lac hu harei xã drei hu ba tabiak truh angan xã biak kan kandah.

#  Mikva saong taong abih gauk bahrau pang dalikan papar sap Oh khin tabiak truh kathaot tui sap di dom urang nan lac:

          Hanipha : dalam angan Amuk Tư

 Jasi : dalam angan ong Đàng Hải – pasang amuk Tư              Thúy Linh : dalam angan Amuk Sáu, urang daok dalam palei           haong diuk pasang amuk Tư

          Musa Phuong : dalam angan ong Quảng Trọng: Chủ tịch xã