“Mboh huac tuk camereip bloh mboh damen tuk atah gauk” – nan lac hatai saneg di jaik 140 urang  đoàn dam dara 3 tỉnh – bal: Cần Thơ, An Giang, Kiên Giang tuk ngak salah blaoh bruk “Dam dara bhum kraong Hậu – Ka pulao kaoh palei negar”, bahrau rah tabiak meng harei 7 tal harei 9/6 meng blaoh di Bộ Tư Lệnh Vùng 5 Hải Quân saong Xã pulao kaoh Thổ Chu huyện Phú Quốc, tỉnh Kiên Giang.

Di labik nao tal, dom urang đoàn dam dara hu mbaok tame ngak dom bruk yau ye: peih bruk padang ngak công trình dam dara “Ngak brei sang bac siam ka adei”; alin brei pandap ka mikva urang taong ikan hu rai diuk kan kandah, baoh sang sarak kajar, baoh sang urang jakar, urang lin, urang đoàn dam dara saong anek saih hu rai diuk kan kandah; peih harei pataom “Uranaih haong pulao kaoh palei negar” ngan haong dom bruk ngak yau: ma-in kadha ma-in bhap bani, alin brei pandap bac, tapuk, truyện tranh ka uranaih angaok pulao kaoh; ngak vệ sinh môi trường pambuak haong pathau khan, jak ba urang đoàn, dam dara saong bhap bani angaok pulao kaoh pacang khik alam môi trường, pacang caga jit ruak… Yaom lac kan kandah, glaih glar, min angaok cambuai dom ayut tuk halei jeng khim klao, kayua hu bhap bini anit ranam, hu urang lin chreih chrai taduan raok. Ayut Thiều Khánh Linh – Sinh viên thun ka 4 khoa Sư phạm, Sang bac Đại học Cần Thơ – sa dalam dom dam dara hu mbaok tame bruk nan khan lac: Adei mboh urang taong ikan pak ini biak rap ar tuai damuai, tuk drei mai ye mikva bui sambai taduan raok, tuk drei alin brei pandap ye mikva chreih chrai taduan mek. Dom sa-ai chiến sĩ taduan raok drei meng dom janih pandap bo dom sa-ai raong, pala, yau nan min drei mboh biak bui sambai chreih chrai ka talei rohim di urang daok di baoh taneh haong dom urang lin daok di pulao tasik.

Oh njauk lac tok hu dom urang đoàn dam dara chreih chrai bo urang lin pak pulao jeng bui sambai, nao gam haong dom bruk ngak halar hatian. Ini lac tukvak piah pato pakai ilamu cách mạng, hatai ranam taneh aia, palei negar ka rai rah dam dara, urang lin ranaih thun saong brei mboh lac urang lin saong bhap bani sa hatung hatai haong gauk. Trung sĩ Thạch Phép – Tiểu đội trưởng đại đội 2 – Tiểu đoàn 1 – Trung đoàn 152 – xã Thổ Chu – huyện Phú Quốc – tỉnh Kiên Giang lac: Dahlak caong khin tukvak anak tal, dam dara tuk halei jeng sangka saong hu ralo bruk ngak jang pamong tal pulao kaoh di Taneh aia, daong pachreih urang đoàn dam dara angaok pulao khang hatai, kajap tangin pal phao, khik kajap siam mekre bhum taneh Tây Nam di taneh ia.

Salah bloh bruk nao akaok meti “Dam dara bhum kraong Hậu – ka pulao kaoh palei negar”, chiến sĩ ao hijao di bhum taneran kraong CL daok caga ka ralo bruk rah tabiak di akaok bilan 7 tal. Pak tỉnh Cà Mau, dom thun dahlau, dom urang halar tian tabiak ribvang pulao Hòn Khoai, Hòn Chuối saong dom xã tapen tasik daok kurang ralo janih, daong brei pandap panda, padang ngak mblang ma-in siam mekre ka uranaih… Yaom lac thun ini oh ka thau cambaih labik padeih takai, min anak meta dom urang halar hatian daok caga parabha jeng ralo nyaom, jhul pakhang dom bruk ngak halar hatian di ralo puk palei kan kandah, tapen tasik, dom xã bãi ngang tapen tasik ngan haong dom bruk ngak xã hội yau: puh ramik hareik hareim saong dom chướng ngại vật, giao lưu thể thao saong văn nghệ haong dom urang jakar, urang lin...

Di Cần Thơ, tui sa-ai Đào Chí Nghĩa – Bí thư Thành đoàn bal, anak tal meda hu lực lượng chuyên labaih 10 urang đoàn dam dara hu mbaok di  Phú Quốc và Thổ Chu (tỉnh Kiên Giang), dom urang ini gam mbang, gam daok, gam ngak haong bhap bani saong urangh lin di labik ini. Yaom lac menuac takik, min meng ilamu khang kajap, hu pathram dahlau di tuk tagok jalan tabiak pulao, caong lac dom ayut meda hu ralo rik daong ka palei negar, abih di nyu nan lac ba dom bruk ngak daong pren ka pulao tasik dak harei dak pambak prong.

  "Brei nao bruk ngak siam, taduan mai veik bruk anit ranam” – yau nan ye bo bruk ngak siam gheih di dam dara halar hatian di bhum taneran kraong CL daok pambak prong, patui veik tapa yaok bilan hè. Jalan ngak brei ka pulao kaoh jeng oh padeih veik bo nyu daok hu peih ngak prong dalam jang, bak hatai ranam jang, piah ka yaok mbang nao tapa, ralo ayut mboh tự hào jang ka rup drei, ka tuk sinh viên biak hu ý nghĩa saong diuk rai hu trách nhiệm jang ka Taneh aia palei negar./.