Dalam dom harei bilan 7 njauk kanar hadar ini, taong abih bhap bani saong dam dara dalam negar jeng yau tỉnh Bình Phước daok hu rilo bruk ngak thau dhar thau phor tal dom sang liệt sỹ, dom thương bệnh binh, dom urang van klaak rup drei brei ka taneh aia độc lập, sron mbon, ka bhap bani haniem phol.

Pak ralo bhum taneh sajarah dalam tỉnh Bình Phước yau Phú Riềng Đỏ (huyện Bù Gia Mập), sóc Bom Bo (huyện Bù Đăng), khu căn cứ Tà Thiết (huyện Lộc Ninh), sang guk ceik Bà Rá (ban sit Phước Long)… dalam dom harei tapa hu ralo kapul nyaom manuac urang ba gauk tame rivang, sirah.

Mai tal khu di tích căn cứ Tà Thiết, oh lac tok hu dom urang jakar padeih hưu; dom urang bhian ngak bruk saong mesruh metak pak ini bo daok hu dom dam dara, urang đoàn. Dom urang nan mai pak ini oh lac tok mong iek rivang ma-in bo daok brei mboh hatai thau dhal phol ngan haong rai rah ong ame nao dahlau – dom urang van klaak rup drei piah meblah veik độc lập, tự do ka Taneh aia. Pak labik daok saong ngak bruk di dom urang lahik blaoh yau: Thượng tướng Trần Văn Trà – urang dahlau diah ngak Tư lệnh Bộ Chỉ huy Miền, Thiếu tướng Nguyễn Thị Định – urang dahlau diah ngak Phó Tư lệnh Bộ Chỉ huy Miền, Phạm Hùng – urang dahlau diah ngak Chính ủy Chiến dịch Hồ Chí Minh… gilau, dhil par bak dalam labik joa lange, ginreih di cõi vĩnh hằng.

       Dang anak baoh sang di aruah Thượng tướng Trần Văn Trà, đoàn viên Nguyễn Văn Lợi, daok di huyện Đoàn Bù Gia Mập, tỉnh Bình Phước drut droi lac: Dom mbang nao yau ini biak siam. Piah ka dom rai rah dam dara thau ka dom labik daok, labik ngak bruk di dom ong muk amaik ame di drei. Dalam kan kandah yau nan bo ong muk amaik ame drei hu ba tabiak dom jalan ngak njauk ba cách mạng nao tal jayak puac abih.

      Tapa nan, dam dara ralo puk palei dalam tỉnh Bình Phước hu tabiak bruk ramik pasiam yaok ribau baoh kabo liệt sĩ; cakak hareik, pala bingu, phun cảnh, puh ramik haci hacih di ralo nghĩa trang, đài tưởng niệm liệt sĩ. Langiu di nan, daok hu dom bruk ngak yau: iek ruak, brei jru saong alin  pandap ka Amaik Việt Nam Anh hùng, baoh sang sarak karja; ramik pasiam dom khu bảo tồn ilano dakrai sajarah; padang ngak sang anit ranam ka urang buh pren ka cách mạng. 

Bình Phước urak ini hu labaih 20.700 urang hu công haong cách mạng, dalam nan  urang hu mbaok tame bruk mesruh metak njaom mbak jru mek kalik kruac saong anek di dom urang nan daok hu mbang jien daong lac 894 urang. Tỉnh ini urak ini daok hu 319 amaik Việt Nam Anh hùng, dalam nan hu 37 amaik daok diuk. Gam haong dom pakat karja, dom  mban ngành, kapul nyaom karei dalam tỉnh, tukvak tapa, dam dara Bình Phước hu peih ngak ralo bruk siam hu mboh di meta piah pachreih tui bruk “Bayar dhal phol”, “menyum aia hadal tal halau aia”. Nan lac: Rivang saong alin pandap ka dom Amaik Việt Nam anh hùng, baoh sang sarak karja, urang hu công haong cách mạng; taduan raong dom amaik Việt Nam Anh hùng tal luac rai; peih ngak danak dak “Sa harei haong amaik”… Sa-ai Trần Quốc Duy - Bí thư Tỉnh Đoàn Bình Phước brei thau: Abih di nyu lac danak dak "Sa harei daok haong amaik", dalam bruk ngak ini ye dom urang đoàn  dam dara bhian mai puh ramik sang danaok ka dom amaik, gam ngak mbang ngak huak haong dom amaik piah klah rabha dom kan kandah saong ba bui sambai ka dom amaik.

  Dom bruk ngak  di dam dara tỉnh Bình Phước dalam bruk "bayar dhal phol" tukvak 27-7 thun ini hu ba bui sambai, klah rabha dom duh hatai di dom baoh sang sarak karja, baoh sang thương binh, liệt sĩ. Tapa nan pato pakai rai rah dam dara ka dakrai sajarah cách mạng di taneh ia,palei negar; ilamu “menyum aia hadhal tal halau aia” di bangsa, meng nan brei mboh jalan diukrai hu lý tưởng, hoài bão, hu trách nhiệm jang haong taneh ia, palei negar./.