“Bac da-a siam, ngak bruk siam” lac 1 dalam 5 paka Wa Hồ pato, hu H’Nhat Buôn Yă (bangsa Ê Đê, anek saih tal bac 12A6, sang bac THPT Chu Văn An, ban sit Buôn Ma thuột, tỉnh Đắc Lắc) kanal dalam hatai meng tuk daok bac tiểu học. Lac anek ka 4 dalam baoh sang hu 6 adei sa-ai, amaik ame ngak ham, dom sa-ai kumei praongjeng padeih bac abih, meng sit H’Nhat eng drei thau kham merat bac da-a. Luac 11 thun tapa, H’Nhat gam nek hu angan anek saih joi abih gah. Oh lac bac da-a siam, H’Nhat daok lac urang jakar tal bac, urang jakar đoàn sami samar, abih hatai jai. Bac joi abih dom môn, H’Nhat biak takre môn lịch sử. Lingiu bruk tacei pato, langyah di dom gru, adei daok duah dom harak, tapuk ka sajarah piah thau rilo jang. Meng hatai takre duah thau, takre bac megru, H’Nhat mek hu rilo giải glaong dalam dom mbang pakacah kayua tỉnh, trung ương peih tabiak. Adei jeng hu Tỉnh Đoàn Đắc Lắc pok meyaom: "Bruk bac megru saong ngak tui panuac Wa, dahlau di abih lac bac da-a biak joi, piah pabak hatai caong di amaik ame, di gru pato. Adei kham merat bac da-a, min jeng hu mbaok tame dom bruk di sang bac, di tal bac yau ye bruk daoh tamia atau dom mbang pakacah kayua Sở Pato Megru peih tabiak. Adei rami ramik tukvak piah hu mbaok tame dom bruk bo oh ngak kandah hagait tal bruk bac da-a."

Bac da-a saong pasram megru dalam bol bala, thượng úy Mai Huy Bình, ngak bruk di Đồn Biên phòng Ia Rvê, huyện Ea Sup tuk halei jeng kham merat patagok  hatung hatai siam mekre di sa-ai bộ đội Wa Hồ. Lac urang dang akaok Đội Tổng hợp đảm bảo, gam ngak Phó bí thư Chi đoàn, Mai Huy Bình bhian peih tabiak dom bruk pakacah gauk brei ka dom dam dara urang đoàn dalam đơn vị. Sa-ai hu rilo jalan ngak piah rik pataom, padang kadung jien piah khik hu siam mekre dom danak “Baoh sang 100 đồng”; “Nao gam haong anek saih kathaot tal sang bac” saong “Paglaong takai yam dom adei tal sang bac”, tapa nan padang hu kadung jien daong dom sang kan kandah gah sang daok, dom anek saih kan kathaot, metui medhua takre bac da-a. Thượng úy Mai Huy Bình lac:"Dalam bruk ngak ye kham merat ngak siam bruk hu jao brei, pathau khan ka urang jakar, urang lin dalam đơn vị, saong mikva urang daok dalam labik đóng quân thau hu dom bruk ngak siam, bruk ngak gheih,, daong jhul khang bruk bac megru saong ngak tui jalan hadah krah siam mekre di Hồ Chí Minh. Anak tal, dahlak kham merat ngak siam bruk di drei, pathau khan ka urang jakar, urang lin saong bhap bini thau cambaih sarak di Đảng, hukum di Karja.

Daok sa-ai Nguyễn Bá Chí Công, Phó bí thư Đoàn phường Thắng Lợi, ban sit Buôn Ma Thuột ye hu rilo jalan ngak piah pathau khan, jak ba urang đoàn hu mbaok tame dom bruk ngak. Yau ye bruk hu mbaok khik caga siam mekre salamat jalan mbak anak dom sang bac, padang kapul dama dara halan hatian pathau khan An toàn giao thông…Tapa dom bruk ngak nan, hu ieu pataom, jak ba dam dara tame dom bruk ngak. Nan ye, dalam dom thun tapa, đoàn phường Thắng Lợi tuk halei jeng lac đơn vị tiêu biểu di ban sit Buôn Ma Thuột. Sa-ai Công jeng  rilo mbang hu pok meyaom: "Tuk dom bruk ngak praong di Đoàn, di Hội Liên hiệp thanh niên ba tabiak ye dom chi đoàn jeng ieu dom dam dara urangđoàn, meng urang đoan hu agama tal urang đoàn dam dara bangsa takik di dom tổ dân phố jeng hu mbaok ginup abih. Tuk peih dom bruk yau nan, hu daong ka dam dara urang đoàn hu rik pren yava di drei. Dalam nan hu dom bruk  thể dục thể thao – daoh tamia, nan lac bruk takre urak ini di dom dam dara urang đoàn, yau nan meng ieu pataom hu taong abih dom dam dara urang đoàn dalam puk palei”.

Meng dom bruk ngak siam, lagaih haong bruk ngak, bruk bac megru, dam dara tỉnh Đắc Lắc hu “Bac megru saong ngak tui jalan hadah krah siam mekre di Hồ Chí Minh” biak siam, biak gheih. Dom urang yau kreih camin hadah dalam bruk jak ba ini hu ngak jeng pren njaom mbak khang dalam dam dara, urang đoàn, rik daong ngak siam bruk ngak, bruk bac megru di dom cơ quan, đơn vị, sang bac di Đắk Lắk./.