Subuh page, di jalan anak mblang dat blong palei 3, xã Ea Bhôk, huyện Cư Kuin, bak manuac, sap ndem klao bui sambai. Harei nan, kapol dam dara Điện lực Đăk Lăk saong kapol dam dara palei gam saong mikva ba gauk pagam gom truac hadah jalan nao mai dalam palei, atah jaik 1.500 mét jalan điện. Urang jakar, urang kỹ thuật dui pambuak talei điện, gom; dam dara saong mikva dalam palei jah tak hareik harom tapen jalan. Oh damen hagait, kaoh klak dhar phun bơ sro tabiak jalan điệ, ong Nguyễn Văn Thịnh khan lac: “Bhap bini khol dahlak uan tabuan tuk hu điện truac hadah ka mikva nao mai. Khol dahlak nao mai harei harei, nao lễ, nao mbang ndam…hu gom truac hadah nao mai biak lagaih biak salamat. Nan ye bhap bini kham merat tame ngak.”

Tal bilan 10, dam dara dalam tỉnh pagam hu gom truac hadah atah 22 km jalan palei 

          Ong Phạm Thanh Tá, akok palei 3, xã Ea Bhôk, huyện Cư Kuin lac, hu bruk daong di gah điện, hu prein di mikva daong tame ngak, mbiah tal harei ini taong abih dom jalan tapa 6 tổ liên gia di palei 3 hu điện truac hadah. Mikva kakei gauk lac brei khik ramik siam gom điện nan piah trauc hu hadah suai lavik:“ Tapan nan hu mboh, mbaok meta palei pala hu salih birau, ba mbuan lagaih ka mikva, rik tame bruk khik kajap an ninh pak ini. Sahaneng khik ramik di bhap bini biak siam, yau bruk bhian brei kaoh dhar phun kayau sro tabiak, khik pandap panda dom talei gom điện.Oh lac dua jalan điện birau pambuak, bo gam dom jalan điện mikva dui ba eng, jien điện mikva rik tame biak siam: mikva rik tame sa thun atau 6 bilan, blaoh kuhria tui phiếu điện  puac thun dom tổ brei kuhria saong mikva dalam palei.”

          Dom gom jalan di palei 3 xã Ea Bhôk, huyện Cư Kuin, lac danak dak “Truac hadah jalan palei” harei Sanecar bo kapol dam dara điện lực Đăk Lăk peih ngak dalm thun 2019 ini. Sa-ai Hoàng Xuân Tứ, Phó bí thư Đoàn cơ sở Công ty Điện lực Đăk Lăk khan lac, tui kuhria bilan anak tal, kapol dam dara Điện lực Đăk Lăk daok ngak dua danak dak tra. Ngan saong yaok km jalan điện truac hadah, đơn vị daong ralo abih lac 30 trieu dong. Gah điện nao pasang iek, thiết kế, bloh pambuak saong dam dara, bhap bini padang ngak, khik ka dom jalan gom truac hadah patagok công năng, abih takik jien tuk ba tame pandar jeng yau gah gheih mekre.

Sa-ai Hoàng Xuân Tứ khan lac, bruk peih ngak dom danak dak truac hadah jalan langiu di bruk daong a bhap bini nao mai mbuan lagaih, khik kajap salamat angaok jalan, an ninh trật tự; daok ngak jeng talei pambuak bruk khang kajap di Chi đoàn điện lực saong dam dara palei dalam bruk daong puk paga palei pala xa hoi; ba thaot binguk gah điện chuyen nghiep, siam mekre nao jaik jang haong urang pandar điện: “ Anak tal khol dahlak brei ngak rilo danak dak truac hadah jalan palei tra. Saong ini jeng lac 1 labik biak siam ka dam dara khol dahlak hu ba akaok nao dahlau, tame dalam jang haong puk palei; ba mbuan lagaih ka dam dara patagok dom kein lagaih di dom bruk  haklan hatian daong ka bhap bini.”

Sa-ai Trần Doãn Tới, Phó Akok kapol dam dara tỉnh Đăk Lăk brei thau, danak dak “Truac hadah jalan palei” kayua dam dara tỉnh Dak Lak ngak lac sa dalam 50 danak dak praong di dam dara dalam negar Pahadar 50 thun ngak tui Di chúc di Chủ tịch Hồ Chí Minh. Tal bilan 10, dam dara dalam tỉnh pagam hu gom truac hadah atah 22 km jalan palei, jien buh tame ngak labaih 600 trieu đồng, tapa tanut ba tabiak. Dom danak dak brei mboh kein lagaih oh lac di dom km talei điện atau dom baoh gom truac hadah, bo makna dalam jang lac hu bhap bini njauk hatai rik tame ngak, pabak prein khang ka dam dara  Dak Lak patagok bruk ba akaok nao dahlau padang ngak palei pala birau./.