Angaok bhum taneh cuah pandiak dahlau deih di bhum tasik Bình Thạnh, huyện Tuy Phong, tỉnh Bình Thuận, urak ini hu bak sambo hijao. Meng taneh praong labaih 2 ha, bruk raong limo, pabe gam saong pala njam patam di urang dam angan Lê Công Lợi yaok thun mek jien tame hu jaik 100 triệu đồng, ngak ka rilo menuac di labik ini pok meyaom.    

Puac thun 2013, tuk bahrau padang bruk ngak, saai Lê Công Lợi gaok biak ralo kan kandah. Kurang phun jien, kurang ia pruh, kurang ilamu raong limo kreik dalam var ro… Min meng hatai caong yam tagok di sa urang dam, dom kan kandah hu saai langyah abih. Piah hu phun jien, saai kham merat ndom biai piah sang drei ba drap ar nao padang piah mesraiy phun jien di gilang pariak ngak nông saong patagok palei pala 100 triệu đồng. Piah hu ia pruh, saai rok bingun khik ia di bilan hajan, langiu di nan saai daok khoan mek ia ngầm saong buh jien tabiak ngak hệ thống pruh ia patak pataom.  Jien mek tame meng tapon limo saong pabe, nan ye bruk ike glang hu saai biak sangka. Saai Lợi brei thau, raong limo kreik dalam var ro nyaik hu ngin, li-ar. Pandap mbang di limo ralo meng lac hareik pala, var ro hu ramik hacih nan ye tapon limo praong samar, khang kadang saong menek njauk tukvak. Dalam tuk raong, saai tuk halei jeng caga pacang ruak ka tapon limo, abih di nyu nan lac ruak laka cambuai tapaok kakau. Taphia di nan pandar dom phế phẩm meng phun pala piah ngak pandap mbang ka limo. Lingiu di bruk raong limo, saai daok raong pabe saong pala 2 ha njam, ratak haluk. Urak ini tapon limo labaih 30 drei di sang saai Lợi daok praong samar. Saai Lợi khan lac:

 “Langiu bruk raong adei daok ngak bruk gah đoàn. Adei jeng caong khin gah đoàn daong ka adei mesraiy hasit phun jien piah peih praong bruk raong glang, jeng yau kuhria ka rai diuk”.

 Jeng meng bruk raong saong pala, yaok thun sang saai Vày Say Và, urang dam bangsa Tày daok di palei Hải Thủy, xã Hải Ninh, huyện Bắc Bình, tỉnh Bình Thuận laba hu jaik 100 triệu đồng. Peih bruk ngak mbang meng 15 triệu đồng jien mesraiy ủy thác di kapul urang nông, gam saong phun jien patak pataom hu di baoh sang, saai hu buh tame raong pabe. Meng hu siam lagaih di bhum mbon ceik, gam saong taneh bilau daok ralo nan ye tapon pabe jaik 20 drei di sang saai praong samar. Thun 2013, meng jien pablei pabe, saai pala 500 geng thanh long. Tal puac thun 2016 meng bloh, saai pala gac 200 geng saong buh tabiak 150 triệu đồng piah dui điện truac gom ka phun thanh long. Oh dang veik di nan, saai daok bac megru ilamu pala bimao pon, raong cim katrau hong tapai ralo. Langiu di nan saai daok ngak padai saong pala cariah mek asar dalam taneh jaik 3 ha. Saai brei thau:             

 “Ngak padai saong pala cariah gaok tuk njauk halak palai kaik ngak oh njauk ye drei mek thanh long pabak tame padai saong cariah. Lingiu di nan drei pablei limo, atau pabe piah pabak tame, hu phun jien piah ngak vụ hadei. Mek panak raong atah. Bruk ini ngak oh jeng mek bruk daih pabak tame. Daok kurang gac drei nao tal đại lý atau labik thầu drei mek piah pabak tame”. 

Meng dom phun jien mesraiy kayua đoàn dam dara khik iek, tal urak ini, dalam tỉnh hu peih brei mesraiy labaih 268 tỷ đồng ka 306 tổ ngan saong jaik 12.500 baoh sang urang đoàn, dam dara mesraiy phun jien patagok kinh tế baoh sang. Saai Trần Sinh Toàn – phaok Bí Thư Tỉnh đoàn Bình Thuận brei thau:

 “Tapa dom phun jien nan hu daong ka dom urang đoàn dam dara  padang ngak kinh tế, dom tổ pambuak bruk, dom HTX. Tapa nan yam tagok ngak kaya meda ka rup drei saong rik daong ka XH. Yau di huyện Tuy Phong hu saai Lê Công Lợi hu bruk raong limo, pabe; di Bắc Bình hu saai Vày Say Và  urang bangsa thau duah jalan yam tagok. Langiu di nan daok hu ralo dam dara karei tra”. 

Oh dang veik di bruk pala saong raong, dom dam dara yau Lê Công Lợi daok di huyện Tuy Phong saong Vày Say Và huyện Bắc Bình, tỉnh Bình Thuận jeng caong khin peih praong bruk sản xuất, ngak mbang di dre tui jalan DL bhap bini. Min, bruk bo saai Lợi jeng yau dom urang đoàn dam dara karei duh hatai abih lac phun jien brei dam dara mesraiy.  Ndom ka bruk ini, saai Võ Thị Minh Nga, Bí thư Huyện Đoàn Tuy Phong, tỉnh Bình Thuận brei thau: 

 “Eng gilang pariak sarak karja urak ini huyện đoàn daok khik iek jaik 35 tỷ đồng. Daok ngan saong gilang pariak ngak nông saong patagok palei pala yaom lac hu peih ngak min bruk patagok rilo thành viên jang, rilo tổ jang biak kan kandah, harak gar kandah kandaiy. Ini jeng lac kan kandah ka urang đoàn dam dara khin mesraiy phun jien di gilang pariak”. 

Piah daong dom dam dara urang đoàn langyah dom tavak tavaiy di drei, anak tal, Tỉnh đoàn Bình Thuận  hu peih danak dak dam dara padang mbang ngui tukvak 2017 – 2021. Tapa nan, hu tabiak mbaok hội đồng tư vấn daong dam dara padang mbang ngui saong Kadung jien daong dam dara padang mbang ngui di tỉnh. Ini lac jalan daong dam dara pambuak bruk, trao đổi thông tin, bac megru ilamu, mesraiy hu phun jien…. daong palagaih ka dom dam dara caong khin ngak kaya meda angaok bhum palei di drei./.