Brei panuac di mbang ginum biai ka kinh tế - xã hội, danak dak bruk ngak pakat negar ka cak rok patagok bhum bangsa takik saong bhum ciek tukvak 2021-2030 harei 5/11, akaok mintri, akaok Ủy ban bangsa Đỗ Văn Chiến njauk hatai saong dom panuac di dom urang Quốc hội brei thau dom kan kandah dalam raidiuk saong dom cuang kadha di sarak jeng yau dom jalan langyah ba tabiak hu pambuak tal mikva bangsa takik dom bangsa. Akaok mintri Đỗ Văn Chiến brei thau: dalam tuk taneh ia daok kan kandah, kadung jien kanja daok kurang, jit praong Covid-19 ngak ka rilo kadha mek jien tame oh ngak hu min Trung ương Đảng, Quốc hội, rajaei jeng hu caik tabiak 104 ribau tỷ đồng piah buh tame ka bhum bangsa takik saong bhum ciek, brei mboh ni lac sa bruk sanka biak praong.

Pahadar 90 thun harei padang  Mặt trận bangsa yasa  Việt Nam (18/11/1930 - 18/11/2020), rilo bruk ngak prong hu  TPHCM peih ngak. Dalam nan hu parang iek thaot binguk “Mặt trận negar Việt Nam – labik jum pataom song patagok pren khang paprong jum pataom abih bangsa” meng harei  9 tal 18/11; pataom mbaok hadar veik bruk meng kan; jao brei Giải thưởng paprong jum pataom tong abih bangsa  TPHCM thun  2020. Jeng dalam mbang ni UBMTnegar ban raya  hu alin brei  kỷ niệm chương “Kayua bruk ngak paprong jum pataom bangsa” ka 42 urang song pok meyaon  4 boh sang hu 3 rai, 69 boh sang hu  2 rai ngak bruk  Mặt trận.

Di jabat Ủy ban Trung ương Mặt trận negar Việt Nam, Thứ trưởng mintri Ngoại giao, akaok Ủy ban kanja ka manuac Việt Nam di negar langiu Đặng Minh Khôi hu lambaok ka rahra urang VN di negar langiu jao alin jien daong mikva bhum krieh negar njauk khat lahik trak abih kayua bala meng langik tasik. Tui yaok pataom dahlau, meng harei 20/10 tal urak ni, rilo urang, kapul urang VN di negar langiu daok di Thái Lan, Séc, Campuchia, Lào, Đức, Australia, Hungary, Mỹ, Thụy Sĩ, Ukraina, Ba Lan rik daong yaom jien abih tih jaik 11,9 tỷ đồng saong labaih 3,8 triệu won.

Gah Di cư dunya song Lãnh sự quán Autralia di TPHCM bahrau jao pok pandap panda pacang caga  jit  Covid-19 yaom  500 triệu đồng ka  Đồn Biên phòng pabah mbang dunya Mộc Bài, jang yau pambuak bruk song pasak pasang iek  ruak kik  di  Sở Y tế Tây Ninh pato pasram ilamu pacang caga jit  ka dom gah  di labik jalan tapen negar . Jiak 100 urang jakar, urang lin hu duah thau ka bruk ngak siam dalam bruk tame tabiak pabah mbang negar piah pacang caga jit prong, jang yau dom kỹ năng, jalan pacang caga jit ka rup eng di drei, boh sang song bhap bini.

Dalam mbang pasang iek di Sở Y tế tỉnh Bà Rịa-Vũng Tàu saong 14 pakul di sở ni, kapul pasang iek di tỉnh brei thau lac tukvak 2014 -2019, Sở Y tế peih ngak 31 paok thầu blei pandap panda, 2 paok langyah ngan haong yaom jien abih tih labaih 690 tỷ đồng. Dalam tuk nan, 100 chủng loại hu yaom labaih 16,7 tỷ đồng, hadei di tuk hu jao brei, dom kapul ba tame piah dalam kho, oh pandar. Bruk ni rahtabiak di 5 pasak y tế huyện, ban saong sang iek ruak Y học cổ truyền tỉnh. Mkana brei thau lac kayua kurang kapul y, bác sỹ ngak (kapyua padieh hưu, salih labik ngak atau oh ginup ilamu piah pandar). Tapa pasang iek jeng brei thau lac hu mboh dom bruk ngak suan dalam tuk đấu thầu, pablei pandap panda y tế.    

Urang brei panuac di  Thủ tướng Anh Boris Johnson  brei thau, negar ni song Liên minh châu Âu (EU) meda mek hu sa  thỏa thuận pablei salih tui jalan 2 gah njauk patakik bruk karei di gauk  dalam hatai sahneng tuk ginum biai. Dahlau di nan, tamat mbang ginum biai bahrau di abih, Anh song Liên minh châu Âu oh ka mek hu thỏa thuận song klah rabha quyền di dom bhum tasik tong chap ikan song dom drak pasa  piah pablei dom pandap  tong chap hadei di tuk Brexit tamat di puac thun ni. Mbang ginum biai ni lac kham merat puac di abih piah 2 gah mek hu sa thỏa thuận song dom negar bahrau dahlau di harei  15/11 – tuk vak rah tabiak mbang nyaom pakat glong abih di  EU.

  Akaok mintri Halau ia di Ai Cập, Sudan saong Ethiopia oh ka njauk gauk ka jalan ginum biai mbang patui di nan pambual tal binek Đại Phục Hưng bo Ethiopia daok padang ngak di kraong Nile Xanh, lac bruk pambak tal halau ia di 2 negar gah hạ lưu. Ai Cập – lac negar pambak tame tal 97% ia di kraong Nile brei thau lac binek lac sa bruk kan kandah cambaih laih. Dalam tuk nan, Ethiopia maong binek lac oh kurang hu dalam bruk cak rok patagok gah điện, gam tui di nan jeng brei thau lac, binek oh ngak kan kandah tal 2 negar di gah ala lac Ai Cập saong Sudan.

Jabat khik iek jit ruak  Hàn Quốc brei thau kuhria tal harei 5/11, negar ni hu tong abih urang ruak Covid-19 lac  27.050 urang. Urang njom meng sa rituh tagok harei ka 2 gam gam tagok khang  di abih meng harei  23/11. Jabat caga jit hu panuac ieu bhap bini  patui ngak catang dom jalan pacang caga jit kayua dom mbang njom mbak sit rah tabiak oh padeih. Hàn Quốc palih ruah urang mbuan njom ruak lac uranaih umo ala  9 thun,  urang kamei metain song urang umo labaih  65 thun hu brei bảo hiểm ka jru pacang virus, tui kuhria hu peih tabiak ngak meng kreih bilan 11./.

Urang lang: Thu Thảo -H.Pha  7/11/2020