Thủ tướng Nguyễn Xuân Phúc hu mbaok di var peih pakak

Mentri Công an birau peih ngak Danak dak Cơ sở dữ liệu negar ka bhap bini saong danak dak Ngak tabiak, pabak brei, khik iek căn cước công dân. Piah ngak hu 2 danak dak hu biak rilo bruk ngak, Mentri Công an ba tabiak 48 bruk praong, parabha jeng 8 nyaom piah peih ngak danak dak padang ngak dữ liệu negar ka bhap bini; 55 bruk praong, parabha jeng 9 nyaom piah peih ngak danak dak căn cước công dân, tui jalan tacei pato brei salih birau, sumu gauk, khik kandauk, plaih palai pajua; brei ngak salah 2 danak dak hadlau di harei 1 bilan 7 thun 2021.

Bier harei 25/2, UBND tỉnh Gia Lai hu peih bruk rok kapul 114 urang jakar y tế ngak salah bruk di dom bhum hu jit dalam tỉnh mai veik ban Pleiku peih bruk brei daok karei tui adat. Kapul urang jaka y tế tỉnh Gia Lai hu 114 urang, hu dom bác sĩ, điều dưỡng, kỹ thuật viên ngak gah caga, dut iek, taong ruak di dom bilai y tế halain hatain tame 4 bhum palei hu jit Covid-19 di tỉnh meng harei 30/1 tal harei ni. Yau nan, tal urak ni, tapa blaoh 13 harei tỉnh Gia Lai oh mboh urang njom bahrau Covid-19. Gah y tế tỉnh hu peih bruk dut iek ka labaih 50.800 urang, mboh 27 urang dương tính. Dalam nan, 7 urang ruak hu thit ruak saong tabiak truh sang iek ruak, 20 urang daok taong ruak di sang iek ruak Dã chiến taong ruak Covid-19 tỉnh.

UB bhap bini Ban raya HCM birau hu Harak ka 549 ka bruk patui veik pacang caga jit Cobid-19 di Ban raya, hu ba tame pandar meng harei 1/3. Tui nan, Ban raya HCM daok pandar bruk pacang caga tui 5 kadha di Mintri Y tế ba tabiak, abih di nyu lac cuh pataih pacang pabah idung di labik rilo menuac. Gam haong nan, daok brei padeih dom vũ trường, quán bar, karaoke, pub, beer, club, dom labik me-in pandih thể thao dalam labik sre tal tuk hu panuac khan birau. Dom bruk karei brei peih pabah mbang gilac veik min njauk brei ngak ginup  dom jalan pacang caga jit tui bruk ba tabiak di gah y tế. Taong abih dom bruk ngak nan njauk brei pa-atah meng urang ini saong urang diah takik abih lac 1 mét, dom labik pablei pandap mbang menyum oh duh tapa 30 urang dalam sa mbang. Daok dom bruk ngak, adat cambat agama di dom labik agama, labik kakuh hui peih ngak min oh pataom tapa 50 urang di sa labik saong njauk ngak tui ginup dom jalan pacang caga jit di gah Y tế, abih di nyu lac brei cuk pataih pacang pabah, rao tangin, brei pa-atah di gauk meng 1 mét tagok.    

Piah paglaong bruk dut iek daong ka tỉnh Hải Dương pacang caga jit COVID-19, gilang paraik Vietcombank hu daong 01 mac dut iek COVID-19 yaom 4,2 tỷ đồng kapasak pasang iek ruak kik tỉnh Hải Dương. Dahlau di nan, meng akaok thun 2021 tal urak ni, Vietcombank hu daong 1,7 tỷ đồng ka bruk pacang caga jit ruak di tỉnh Hải Dương saong ban Chí Linh.

Piah pacang cakak saong trun bruk lih tapa bhum tasik di negar langiu taong kaya ikan suan hukum, tỉnh Bà Rịa - Vũng Tàu hu peih tabiak bruk caik jamriak pasang iek ka 2.504 dalam abih tih 2.910 gilai taong ikan (mek hu 86%). Hadei di 2 thun peih ngak dom jalan pacang cakak, pakauk gilai taong ikan saong urang taong cap kaya ikan suan hukum, bruk taong ikan saong urang taong cap ikan di tỉnh  Bà Rịa - Vũng Tàu lih tapa bhum tasik negar langiu hu trun min jeng daok rahtabiak sarau kadhau. Di thun 2020 rah tabiak 11 mbang, 23 sruh gilai saong 201 urang taong cap ikan njauk cap khik. Bol lin Biên phòng tỉnh Bà Rịa - Vũng Tàu hu ba tabiak sarak taong phat jien padai ngan haong 51 mbang 53 sruh gilai saong 56 urang ngan haong paoh jien labaih 1 tỷ meteh, cap mek rilo pandap panda taong ikan, harak adat kayua ngak suan dalam bruk taong cap kaya ikan. Langiu di nan, Công an tỉnh Bà Rịa - Vũng Tàu daok duah thau ngak brei cambaih laih bruk dua urang mboh yau dang tabiak ngak  harak “hợp đồng chui” ka gilai dom tỉnh tabiak bhum tasik negar langiu taong ikan suan adat.

Rajaei Nhật Bản harei ni (26/2) brei thau, negar ni daok caga klaak bruk samar drak ngan haong jit Covid-19 ka 5 tỉnh, ban tuk mboh hu siam veik. Daok Tokyo saong dom tỉnh jaik taphia njauk cang tal harei 7/3. Tui kuhria dom tỉnh Aichi,Gifu, Osaka, Kyoto saong Hyogo meda klaak bruk samar drah nan di puac bilan 2, daok tỉnh Fukuoka brei pasang iek veik kayua gah y tế jeng daok catang.

Dah page ni, mintri Y tế Campuchia brei thau lac hu duah mboh veik 44 urang njom Covid-19 bahrau, dalam nan hu 40 urang njom dalam rahra saong 4 urang meng negar langiu. Dom urang njom mbak dalam rahra mbang ni rilo meng lac rahtabiak di ban ine Phnom Penh ngak ka rajaei pak ni njauk pacang cakak 63 labik, Campuchia rah tapa 1 adit meng tuk tamuh jit Covid-19 pambuak tal “bruk pataom rilo menuac di harei 20/02” saong yaok harei mboh hu yaok pluh urang njom bahrau.

Viện Y tế Đại học  Italia harei kabroi (25/2) brei thau, tapa roh duah mboh lac, mbang camriep Covid-19 đột biến hu duah mboh di dalam ia nerak di đô thị dalam Italia.Tapa dut iek dom mẫu ia nerak di dom ban Perugia, Umbria, gah kreih negar Italia, dom urang ilamu mboh biến thể di Covid-19 hu duah mboh dahlau di nan di negar Anh saong Braxin . Tui Yam ndok gah alam saong hacih saat di Viện Y tế pakat glaong Italia Lucia Bonadona, tapa roh duah bahrau sa mbang tra mboh bruk hu makna praong di bruk pasang iek ia nerak yau haong janih Covid-19 đột biến ni./. 

Urang lang: Thu Thao –A.Nghiêm