Di dunya rilo urang hu klauk jru pacang Covid 19 dalam nan hu VN 

Harei ini (18/3), di Hà Nội, Thường trực mBan Tacei jalan pakat negar ka pacang caga tham nhũng hu peih nyaom biai kayua TBT, akaok negar Nguyên Phú Trọng, akaok mban tacei jalan dang akaok. Tapa nan, TBT, akaok negar tacei dom jabat chức năng patagok talei pambuak bruk, lang talaih kan kandah, tavak tavaiy, jhul samar bruk pasang iek, duah thau, langyah dom vụ án di mBan tacei jalan tui iek, tacei pato; abih di nyu nan lac, samar ba tabiak langyah mbang camereip 05 bruk, dalam nan hu bruk “Ngak suan gah khik ramik, ba pandar drap ar Karja ngak brei khat lahik, palai pajoa; ngak suan dom bruk ka khik ramik taneh riya” rah tabiak di Tổng Cty mBia alak ia menyum Sài Gòn (Sabeco),Bruk “Buôn lậu; ngak suan gah kế toán ba tal khat lahik trak” rah tabiak di Cty Nhật Cường saong dom jabat hu pambuak tal.

Danak dak klauk jru peih praong pakat negar dalam harei 18-3 hu peih bruk klauk vaccine caga Covid-19 di 4 tỉnh: Hà Giang, Điện Biên, Bà Rịa -Vũng Tàu saong Bình Dương.  Tal puac maong bier harei 18-3 hu veik 3.492 urang hu klauk jru vaccine Covid-19, patagok dom urang hu klauk vaccine caga  Covid-19 tal 27.546 urang. Abih tih jeng lac dom urang jakar, urang ngak gah y tế daok taong ruak ka urang ruak Covid 19, dom urang y tế daok ngak dom bruk yau nao mek mẫu urang ruak, dut iek, pasang iek, urang dalam kapul Covid-19 taong ruak ka rahra saong mban pato tacei pacang caga jit di dom tinh, bal.

Rayo sap ndom VN bahrau peih pakak saong ba tame pandar bilai papar sap FM tự động tại đỉnh Quế, xã Tr’hy, huyện Tây Giang, tỉnh Quảng Nam. Danak dak nan caik di đỉnh Quế - Tây Giang, tỉnh Quảng Nam lac danak dak camereip abih Rayo sap ndom VN pandar dom ilamu bharau di abih dalam bruk khik ramik, ba pandar bilai papar sap, nan lac ilamu ba riyak tapa vệ tinh, pasang iek saong điều khiển meng atah tapa mạng viễn thông. Bruk ba bilai papar sap FM tự động di đỉnh Quế tame pandar hu daong ka Rayo sap ndom VN paglaong chất lượng, peih praong labik pabak riyak langik min abih takik jien padai. Bilai nan pabak riyak langik tal bhap bini dom bangsa takik daok di bhum ceik Tây Bắc tỉnh Quảng Nam, 2 huyện Nam Đông, A Lưới, tỉnh Thừa Thiên Huế haong urang Việt daok di taneh ia Lào.

Di mbang ngak bruk di Thường trực Thành ủy TPHCM  haong Thường trực Tỉnh ủy Bình Phước hu ginum biai ka jalan pambuak gauk peih ngak danak dak jalan cao tốc TPHCM - Thủ Dầu Một - Chơn Thành, TPHCM saong tỉnh Bình Phước hu njauk gauk ka rilo asal kadha hu makna praong, jang yau brei mboh bruk kham marat buh jien tame ngak jalan cao tốc TPHCM - Thủ Dầu Một - Chơn Thành. Gah jalan cao tốc ni daok dalam quy hoạch cak rok patagok dom jalan cao tốc Việt Nam, pambuak meng Tây Nguyên tapa Bình Phước, Bình Dương, pambuak tame gah timur TPHCM saong tui gah jalan vành đai 2 di TPHCM nao tal dom tỉnh Đông Nam bộ. Ni lac jalan hu makna biak praong, khik tanat bruk nao mai di dom pasak kinh tế praong abih, meda ba mai kein laba ka bruk cak rok patagok kinh tế - xã hội di TPHCM, dom tỉnh pambuak tal, jang yau dalam bhum.

MBan tacei jalan pacang caga jit COVID-19 tỉnh Đồng Tháp bahrau nao ravang, pok meyaom 2 rahra hu mboh saong khan brei urang jakar thau chip bruk urang meng Campuchia loa tame negar. Nan lac ong Trần Xuân Định, 61 thun, daok di bhum tapen negar ban sit Sa Rài, huyện Tân Hồng haong ong Lê Xí Được, daok di xã Tân Hội, ban sit Hồng Ngự. Meng hu panuac khan nan bo dom menuac tame negar VN suan hukum hu samar mboh, pacang veik, ba nao brei daok karei, padam hu chip bruk mbuan njom ruak tabiak bhap bini.

Rajaei Séc bahrau brei dui atah bruk pacang cakak tal hadei harei Phục sinh dalam tuk dom urang njom saong metai kayua Covid-19 di negar ni jeng daok di tanut glaong. Akaok mintri Y tế Jan Blatny brei thau lac hu rilo jalan pacang caga  biak catang yau ye kareih pabang sang bac, labik pablei salih - dịch vụ, pandar cuk pataik pacang pambah atau pakauk nao mai di dom bhum meda hu khik veik dalam 2 adit tra dut saong tukvak ba tabiak dahlau lac 21/3. Cộng hòa Séc lac sa dalam dom nagar châu Âu daok njauk kan kandah trak di abih kayua jit praong Covid-19 tuk dom urang metai tui kuhria lac tagok tal 200 urang yaok harei dalam rilo adit jaik di ni saong dom sang iek ruak oh daok labik ka urang ruak. 

Melam 18/3, di mbang họp báo hu peih tabiak yaok adit ka bruk jit ruak Covid-19, Thủ tướng Prang Jean Castex brei pacang cakak khang 16 tỉnh, labik daok hu jit tamuh samar, ngak trak damak ka dom sang iek ruak. Dalam 16 tỉnh ini, taong abih 8 tỉnh saong ban di bhum ban ine Paris jeng hu mbaok, gam haong 5 tỉnh daok di gah barak saong 3 tỉnh di gah Đông Nam. Jeng dalam mbang họp báo, Thủ tướng Prang brei thau taneh ia ini meda peih veik bruk pandar vắc xin Astrazeneca meng harei ini 19/3, hadei di tuk Jabat Jru tavao châu Âu ndom lac vắc xin ini hu siam mekre, salamat. Taneh ia Prang daok pamaong tal bruk klauk ka 30 triệu menuac, samu 2/3 rahra umo labaih 18 thun, di kreh bilan 6 thun ini.

Tổng thống Mỹ Joe Biden harei kabroi (18/03) brei tuan “cờ rủ” di Nhà Trắng saong dom labik di rajaei liên bang, piah pahadar dom urang njauk bala dalam klau mbang cuh phao pametai manuac rahtabiak di ban Atlanta,bang Georgia akaok adit ni. Hala dok hu tuai di Nhà Trắng, dom baoh sang liên bang karei, dom labik quân sự, dom labik lambaok negar, saong dom labik karei di Mỹ daok di negar langiu, tal bier harei 22/03 (tui maong di pak nan), dreih yau sa bruk iek praong ngan haong dom urang njauk bala di harei 16/03 meng blaoh./.

Urang lang: Mousaphuong -Thu Thảo -19/3