Dalam thun bloh, dom sang kan kathaot, sang jaik si kan kathaot bhapbini bangsa takik tinh Ninh Thuan hu mban Điều phối Danakdak daong Tam nông tỉnh sangka daong raong limo banai. Tapa nan, daong ka mikva patagok bruk raong glang, pasiam raidiuk. Thúy Linh – urang vak di rayo sap ndom VN daok di ban raya HCM hu kadha ndom ka dom kein laba di danakdak ini :

 Danakdak daong raong limo Hifei ka 100 sang kan kathaot, sang jaik si kan kathaot bhapbini bangsa takik di mban Ban Điều phối Danakdak daong tam nông tinh Ninh Thuan peih ngak di puac thun 2013 dalam 7 palei di 5 huyen dalam tinh. Bruk ngak di danakdak piah daong ka dom sang kan kathaot, sang jaik si kan kathaot bhapbini bangsa takik thau bruk raong limo binai, paglaong jien mek tame, pasiam raidiuk. Tui nan, mban Điều phối di tỉnh lac labik điều phối phun jien ka dom puk palei; dom puk palei padang jalan daong cambaih ye: padang dom kapul, nyaom raong limo; pilih ruah anek pajaih saong parabha anek pajaih; peih tal pasram megru, tacei pato ilamu raong glang, khik iek limo binai…

Bruk di danakdak ba tabiak lac yaok sang kan kathaot, jaik si kan kathaot hu daong dua drei limo binai, hadei di tuk menek hu ba limo amaik ka dom sang kan kathaot karei dalam kapul raong; tal chu ki ka 4 ye sang kan kathaot hu quyền thanh lý drei limo amaik saong raong glang veik. Ong Đỗ Thu Nam – Akaok jabat khik ramik chiến lược, Ban Điều phối Danakdak Tam nông tỉnh Ninh Thuận brei thau “ Piah daong dom sang kan kathaot, sang jaik si kan kathaot ba gauk ngak mbang, caong khin ngak mbang tui jalan yau dom xa, huyen hu ngak bloh nan lac pato pakai, pasram megru; paglaong alamu ka dom urang nan dalam bruk raong glang, pasang iek” .

Sang saai Mang Thị Quýnh daok di palei Liên Sơn, xã Phước Vinh, huyện Ninh Phước biak kan kandah, glaih glan. Saai hu 3 urang anek, min jien mbang cai tok caong tame bruk nao ngak pah saong duan mek akhak limo kubao. Mboh hu bruk kan kandah di sang saai Quýnh, dom urang dang akaok palei Liên Sơn 2, xã Phước Vinh hu ba saai tame Tổ raong limo Hifer di danakdak Tam nông tỉnh Ninh Thuận saong hu daong dua drei limo binai. Hu yau nan, sang saai biak uan tabuan, yaok harei iek glang tani tanat ka limo meng bruk ba nao glang, brei limo mbang menyum tal bruk klauk jru caga jit ruak. Nan ye dua drei limo di sang saai praong siam, urak ini sa drei metran hu 7 bilan. 

Dreih yau sang saai Mang Thị Quýnh, 10 sang kan kathaot, sang jaik si kan kathaot bhapbini Raglai di palei Tà Dương, xã Phước Thái, huyện Ninh Phước jeng biak uan tabuan tuk hu tame danakdak raong limo Hifei kayua mban Điều phối Danakdak Tam nông tỉnh Ninh Thuận daong. Langiu bruk daong dua drei limo binai, dom sang kan kathaot daok hu pasram alamu ky thuat raong glang, bruk khik iek limo binai yau habar piah hu kein bala. Meng nan, dom sang kan kathaot, sang jaik si kan kathaot pak ini hu patagok bruk raong glang, dak harei dak pasiam raidiuk. 

Tui pasang iek ye urak ini, dom drei limo binai hu Ban Điều phối daong danakdak tam nông tỉnh Ninh Thuận daong brei jeng hu dom sang kan kathaot, sang jaik si kan ka thaot bhapbini bangsa takik iek glang siam, dom drei limo nan daok metian, dalam nan hu rilo drei jaik si menek.

Danankdak daong raong limo Hifei ka bhapbini bangsa takik kan kathaot di mban Điều phối daong danakdak Tam nông tỉnh Ninh Thuận lac sa jalan ngak njauk, oh lac ba mbuan lagaih ka sang kan kathaot sang jaik si kan kathaot bhapbini bangsa takik dalam tỉnh patagok bruk raong glang bo daok daong dom sang nan hu jien mek tame, pasiam raidiuk, yam tagok patruh eik patrun kathaot./.

Thúy Linh