Urang brei daok karei hu brei mbang huak 3 var sa harei oh bayar jien

Labik daok karei pasak Quận 2 TPHCM lac sa talei dom baoh sang glaong 3 tal di sa sang bac klak praong labaih 3.000 m2, hu UB bhap bini quận brei ramik ngak siam jeng labik pacang cacak ruak jit brei ka labaih 60 manieng urang ruak. Pasak pacang cakak jit ruak hu ganap ndap nda y tế brei ka iek ruak, hu internet khang samar, hu labik laneng laho. Urang brei daok karei hu brei kasaing pacang pabah, sabon, kem crah pagei, hu iek glang y tế 2 mbang sa harei, mbang huak 3 var sa harei oh bayar jien.

Min bahrau ini, Ong Vũ Khắc Tiệp – urang hu angan dalam showbiz Việt, urang rang brei daok karei piah pacang jit ndom mayai oh njauk lac di labik pacang caga ruak jit di pasak mboh mblung lo ngak ka ralo urang ginaong. Ong Vũ Khắc Tiệp hu mbaok di adit yaih khan ao thời trang di Milan (Ý), hadei di nan mai veik Việt Nam, urang ieu ong njauk daok karei eng drei di sang 14 harei. Min oh ngak tui adat di gah y tế bo daok nao hu mbaok di labik ralo menuac, kayua yau nan ye njauk cap nao daok karei di pasak. Ong nan daok ngak ka ralo urang jaka lahik ralo vaktu piah lang yah, jak ba tame labik brei daok karei.

Thaot binguk di urang nan jeng jhak nao dalam meta maong di rahra tuk ndom lac, y bác sĩ pagam pambak tame bruk hu angan je di drei piah ngak ka gah truyền thông caik hatai. Dalam tuk nan, dom y bác sĩ, tuk halei jeng ba abih hatai jai daong ieik urang rahra, daong bhap bini, daong ka urang di pasak sanang hatai ieik ruak, ngak tui, ngak njauk tui bruk brei daok karei. Bác sĩ Trần Văn Khanh, Akaok sang iek ruak Quận 2 brei thau: “Taong abih urang tame daok karei hu ieik glang yau ye hatian di drei. Sanang hatai dalam bruk pacang jaga jit, sanang hatai ieik ruak caga ruak meyah hu ruak jeng oh mbak oh njom ka urang dalam sang dalam jamaah palei pala”.

Bruk ong Vũ Khắc Tiệp nan oh njauk lac sa bruk duy nhất ka oh ngak siam bruk di 1 rahra dalam vaktu bilan jit ruak ni. Bruk urang ruak ka 17 di negar drei njom Covid-19 oh khan tapak  ka ruak kik di drei ngak ka ralo urang pandiak hatai, ngak ka bhap bini rahra ginaong. Kayua kurang saneng kuhria, jeng hu manuac urang padeih bruk piah nao daok karei pacang caga, dalam nan hu gauk tian urang ruak 17.

Saneng lac, mayah urang ruak ka 17 tapak hatai khan cambac ye oh hu bruk rahra duh hatai, abih khu pố srau kadau, urang jaka di Hà Nội madeih mbiah adah nao duah urang gam haong manuac njom ruak piah samar ba tame pacang caga jit. Bo oh lac taeng ban ine Hà Nội, yaok rituh urang di dom tỉnh karei, hu urang nao sa kapal haok dan haong urang ruak ka 17 ni jeng mboh duh hatai. Menuac sia oh ka abih duh hatai ye bahrau ini, sa urang dang akaok sa công ty gom anghin điện gió pandar urang ngak di drei nao daok karei salih ka drei

Dom bruk yau nan, lac ieik lap hokum nagar, ieik lap prein yava di bhap bini, nao cagar veik dom jalan pacang caga jit praong Covid-19 daok ngak hu siam mekre di nagar khol drei, nan ye njauk kaoh biak catang tui hokum piah ngak gamnu camin ka urang pasang iek.

Thùy Dung, 26 thun, palei daok di ban ine Hà Nội, hu urang mạng xã hội ieu lac “Nai ameh dalam palei daok karei” ndom lac, nao daok karei dalam tuk hu jit praong lac bruk  di rahra. Nai Thuy Dung cih kaot dalam tapuk harei di drei brei thau lac khin lakau ndua dhar phol uon tabuon tal urang ngak gah y tế dn haong nagar. Kayua yau nan ye di 2 adit blaoh, tuk hu daok karei di Quận 3, Thùy Dung haong taong abih urang di dalam ini dang ngak eng pahacih labih daok dang jeng ye vin rup drei oh cang urang mai duh ka drei: “Tuk tame daok dalam ini meng mboh dom urang di langiu, di mbaok tanah, di angaok kapal haok, urang y tế, adei saai di ini jeng ye urang daok kakli mboh biak anit ranam gauk. Tuk adei khan lac taeng rup khin kakli dan haong lakau dhar phon uon tabuon tal taong abih urang daong drei, adei taduon ralo panuac mayaom min tapi adei mboh bruk adei ngak njauk ngak di urang bhap bini rahra”.

Tui Tiến sĩ Xã hội học Phạm Thị Thúy lac, Karja nagar,  gah y tế dan haong dom pakat karja daok kham merat pacang caga jit praong Covid-19, pachrieh taong abih rahra bhap bini ba bih hatai ngak tui dom jalan pacang caga jit di Mintri Y tế. Sa dalam dom jalan ngak hu ba tbaiak baharau di abih lac brei thau ka prein yava  rahra. Bruk ini brei hu bruk halan hatian di yaok yaok urang kayua prein yava sihat di drei jeng ye ka jammaah puk palei. Khan tapak piah daong samar mboh, daong pacang cakak jit njom mbak. Amuk Thúy daok brei thau lac: “Urak ni lac tuk jum pataom gauk piah pacang caga jit tui panuac ieu di Karja. Dom bruk ngak suan ye kol drei njauk hu panuac lac piah ba gauk plaih kayua dom bruk ngak suan nyu ba mai kanjah jhak, jhui puac preo urang halei. Bruk puac pareo nan nyu ngak ka urang mboh huac oh khin ndom tapak, tapa nan nyu ngak ka jit ruak njom mbak samar jang”.

Urak ni, bruk pacang caga jit Covid-19 di nagar drei daok hu peih ngak siam makre. Min bruk kham merat di gah chuyên môn saong di karja dom pakat meda  “tuh kraong tuh tasik” abih, mayah hu dom manuac kurang saneng kuhria dalam bruk taong jit pacang jit. Dahalau abih drei njauk caga jit ka drei dan haong sang drei, puk palei jammaah drei; sanang hatai, ba hatai pacang caga jit ruak njauk tui pato tacei di Mintri Y tế. Dalam nan, eng drei halan hatian khan brei thau njauk tapak dan haong ngak njauk tui jalan brei daok karei  lac bruk njauk ngak./.

(Urang lang: Thu Thảo – 17/03)