Dang veik anak labik pablei pandap Tết,sa-ai Trần Thị Bình Quyên, phường Tân Tiến, ban sit Buôn Ma Thuột, tỉnh Đắk Lắk brei thau, dom thun ini mai, sang sa-ai jeng blei pandap ngak dalam taneh ia piah pandar kayua sang sa-ai mboh pandap ngak dalam taneh ia nyu siam, mekre meta saong yaom mbiah di pandap Việt:

 “Sang adei daok kuhria blei mứt, ahar, kẹo Tết, mbia, ia yamen. Adei mboh pandap thun ini hu biak rilo janih, yaom mbiah. Sang adei bhian blei pandap Việt Nam saong taong yaom glaong pandap Việt Nam drei”

Jeng dreih yau sa-ai Quyên, amuk Nguyễn Minh Nguyệt, daok di phường Tân An, ban sit Buôn Ma Thuột jeng ruah dahlau pandap Việt piah blei. Tui amuk Nguyệt, pandap bo thau cambaih labik ngak, hu parang pablei di dom cửa hàng, siêu thị hu angan je, ye amuk blei dahlau pandap ngak dalam taneh:

 “Thun ini sang drei blei dom janih pandap, drei mai Siêu thị ini rilo thun ye, pandap hu biak rilo janih, siam, iek mekre nan ye drei mai blei ka nyu sahanang hatai. Yaom kaom jeng mbiah hoang kadung jien, meng urang ngak tal urang ginup meda.”

Thau hu hatai takre di menuac blei pandar, dom siêu thị saong dom urang pablei salih di Đắk Lắk hu pilih ruah saong blei mai rilo pandap Việt Nam piah pablei tết. Amuk Trần Thị Thành Nhân, Phó Giám đốc gah pandap mbang menyum, Siêu thị Co.op Mart Buôn Ma Thuột brei thau, hu caga labaih 2.000 tấn pandap yaom abih tih 70 tỷ đồng, rilo jang 10% dut saong thun dahlau. Meng hu labaih 90% pandap Việt, Co.opMart Buôn Ma Thuột hu pabak siam lagaih ka bruk yaih khan pandap Việt Nam tal tangin urang blei. Gam haong sanya khik tani tanat yaom kaom, siêu thị hu rilo mbang ba pandap Việt mai palei pala saong peih bruk khuyến mãi pachreih urang blei.

Dalam tukvak jaik Tết, Coopmart Buôn ma Thuột hu 3 mbang ba pandap Việt mai palei pala di huyện Cư Mgar, Buôn Đôn saong Krông Pách, yaok huyện 3 harei. Abih tih pandap tagok tal jaik sa ribau janih piah pablei ka mikva daok di bhum atah bayah. Meng pandap Việt dalam siêu thị tagok tal labaih 90%, Coopmart tuk halei jeng sangka pablei dahlau dom janih pandapViệt Nam hu ngak di Việt Nam.

Tui ong Trần Trọng Lưu, urang dang akaok jabat khik iek pablei salih – Sở Công thương tỉnh Đắk Lắk, dalam tuk Tết Nguyên đán thun sak pabui 2019, dom  doanh nghiệp pablei salih dalam tỉnh hu caga pandap yaom abih tih labaih 224 tỷ đồng piah khik tani tanat yaom kaom darak pasar, pabak ka bruk blei pandar tuk Tết di bhap bini. Piah khik tani tanat yaom kaom, gah Công thương hu ba tabiak bruk khik tani tanat yaom kaom darak pasar puac thun 2018 saong Tết Nguyên đán thun sak pabui 2019 pambuak haong bruk jak ba “Urang Việt Nam dahlau di abih njauk pandar pandap Việt Nam”, rik daong pabak ginup pandap panda, pabak bruk blei pandar di bhap bini dalam tỉnh, abih di nyu nan lac dom janih pandap mbang menyum yaok harei, piah daong patrun bruk tagok yaom, pacang lạm phát, pachreih urang blei pandap Việt./.