Urang nong di Bạc Liêu daok tame tuk yuak bilan padai 

Urang nong Hậu Giang daok yuak dom mblang padai Hè thu puac bilan. Urak ini urang pablei salih daok blei padai that pak di mblang hamu yaom meng 5.400 tal 6.800đồng/kg, tui pajaih. Meng năng suất padai hu jaik 6,4 tấn/ha, gam haong padai daok hu blei di yaom glaong nan ye hadei di tuk kaoh abih jien buh tame, urang nong daok laba hu meng 25 tal labaih 30 triệu đồng/ha. Ong Nguyễn Ngọc Dũng daok di bal sit Kinh Cùng, huyện Phụng Hiệp brei thau: “Drei ngak tui tukvak di Karja ba tabiak, Karja ba tabiak yau habar drei ngak yau nan, urang jakar pandar drak ye drei drak. Ruak ye yaok thun pruh dua klau mbang, daok thun ini pruh tok sa mbang min. Ruak takik ye jien buh tame ngak takik, trun hu 1 công meng 100-200 ribau đồng. Thun ini  padai pablei hu 5.700”.

Tal tukvak ini, urang nong Hậu Giang yuak hu labaih 70 ribau dalam abih tih labaih 77 ribau ha padai Hè thu dalam tỉnh. Mblang taneh padai daok veik meda hu yuak abih mbon dalam dom harei tal. Jaik abih mikva tuk yuak blaoh ye hu urang pablei salih cang blei padai that pak di mblang hamu.

Tui gah ngak nong tỉnh Hậu Giang, thun ini yaom lac pandiak bhang, ia mbak rah tabiak khang min kayua peih ngak siam dom jalan pacang caga nan ye taong abih dua bilan padai Đông xuân saong Hè thu, di dom puk palei dalam tỉnh oh hu mblang padai halei khat lahik, padai tamuh siam saong hu rilo padai. Ong Trần Văn Tuấn- Akaok jabat ngak nong saong patagok palei pala huyện Phụng Hiệp brei thau: “Huyện Phụng Hiệp meng akaok vụ hu tacei pato siam ka  dom puk palei ngak pakhang veik dom ar pacang, mbraong binek piah pacang khik aia taba, trun pajaih njauk tuk vak di tỉnh ba tabiak. Meng nan năng suất biak glaong saong halak halin, pandiak bhang oh ngak kan kandah rilo.

Dalam tuk rilo tỉnh, bal dalam bhum daok yam tame yuak padai Hè thu puac bilan saong oh daok padai piah pablei ye urang nong di Bạc Liêu daok tame tuk yuak bilan padai ini. Meng yaom padai dalam dom harei tapa mboh lac dak harei dak tagok nan ye urang nong pak ini biak bui sambai. Meyah langiu mblang hamu, dom sruh mac yuak daok samar drah yuak padai, ye dalam sang urang nong, rilo urang pablei salih daok cang piah blei padai.

Ong Lưu Hoàng Ly- Akaok Sở Ngak nong saong patagok palei pala tỉnh Bạc Liêu, brei thau: Angaok jalan jayak di bilan padai Đông xuân akaok thun nan ye yam tapa bilan padai Hè thu ini, gah ngak nong tỉnh hu ba tabiak jalan ngak, tabiak tukvak trun pajaih cambaih laih ka yaok bhum. Taphia di nan, jabat jeng hu tacei pato dom gah chuyên môn di Sở saong dom puk palei pambuak bruk haong urang nong pasang iek saong pacang caga jit ruak angaok phun padai  di dom tukvak cakrok patagok, meng nan bo phun padai tamuh siam. Meng năng suất mek hu meng 5,5 - 6 tấn/ha, hu taong yaom lac sa dalam dom bilan padai Hè Thu ngak njauk abih meng dahlau mai, urak ini yaom padai tagok meng 800 đồng-1.000 đồng/kg dut haong akaok bilan dahlau: “Thun ini njauk padai bo daok hu yaom tra, labaih 6 ribau, nan ye mikva thei jeng bui sambai. Dahlak taong yaom lac bilan Hè thu thun ini Bạc Liêu meda mek hu jayak”. 

Tui gah Công thương dom tỉnh dalam bhum, yaom padai thun ini tagok glaong dalam dom harei tapa makna lac kayua Việt Nam hu rilo đơn hàng pablei brah tabiak negar langiu, meng nan jhul patagok darak pasar pablei salih brah dalam negar hu chreih chrai. Tui kuhria mboh dahlau, yaom padai meda daok tagok glaong dalam dom harei anak tal, kayua jit ruak Covid-19 daok tamuh tabiak khang angaok dunya, hatai caong khin blei pandar kaya nong tagok, abih di nyu nan lac dom taneh aia kan kathaot, khat lahik trak kayua jit ruak, bala meng langik tasik.

Ngan haong 2 vụ padai Đông xuân saong Hè thu mek hu jayak, ba jien tame glaong nan ye urak ini urang nong dalam bhum thei jeng bui sambai, samar drah pasiam li-ua veik mblang hamu piah trun pajaih padai bilan Thu đông ./. 

Urang lang; Jasi – 09/09