Vacxin  di Viet Nam hu ngak tabiak piah klauk ka bhap bini 

MintriY tế brei thau, mesup ini oh hu menuac bahrau halei njom nCoV. Dalam 24 mon tapa, hu 7 urang njom, lac 2 urang di Hải Dương haong 5 urang meng negar lingiu tame. Urak ini daok hu 330 urang daok taong ruak, dalam nan hu 3 urang ruak trak. taong abih 3 urang nan tapa dut iek mboh lac oh njom nCoV meng 3 tal 5 mbang, oh cang pandar ECMO min kayua hu rrilo ruak dalam rup nan ye ruak daok biak trak.

Di mbang ginum biai Thường trực rajaei ka bruk pacang caga jit Covid-19, Mintri Y tế brei thau dalam negar meda lac pasang iek hu jit ruak. Min jeng daok mbuan tamuh jit veik, abih di nyu nan lac di dom ban praong. Mintri Y tế daok hu panuac brei ngak tui 5 asal kadha pacang caga jit luac tukvak tapa, lac pacang caga, duah mboh, brei daok karei, pacang cakak bhum jit saong pandam jit, daok pasang iek catang urang tame negar. Tal urak ni, Việt Nam hu klauk jru vắc xin caga Covid-19 ka labaih 24.000 urang di 12 tỉnh, bal.

UBMT negar VN tỉnh Ninh Thuận bahrau peih nyaom biai ginum gauk mbang ka 2. Nyaom biai njauk gauk ba tabiak dom urang hu tabiak angan piah pilih ruah ka QH mbang XV tỉnh Ninh Thuận lac 12 urang, dom menuac hu pilih ruah ka QH lac 6. Dalam nan hu 3 urang bangsa takik, lac 1 urang Cam  haong 2 urang Raglai; 5 urang kumei, 1 urang langiu Đảng haong 1 urang di tỉnh tabiak veik. Daok bruk piloih ruah urang ka HĐND tỉnh vaktu 2021 – 2026, urang kumei hu rilo jang 4 urang, urang ranaih umo hu rilo jang 14 urang, menuac lingiu Đảng rilo jang 3 urang duk haong ginum biai mbang ka 1. Dom menuac tabiak piah pilih ruah takik jang 1 urang, daok 89 urang. 

Cty CP đầu tư ĐMK, po gilai Bạch Đằng pajeng 1.500 tấn bau karam di harei 14/3 di mangaok tasik Mũi Né, ban  Phan Thiết, tỉnh Bình Thuận, brei thau: harei ni (18/3) meda ba tagok jalan saraong gilai. Dahlau di nan, gah tui iek bruk pajeng ba jalan tasik Bình Thuận hu payua harak ieu gah Công ty ĐMK samar hu jalan saraong gilai karam, kayua dalam tuk langik tasik yau urak ni, mayah rahtabiak bruk tathuak manyek tabiak langiu mbuan seik tame takai tasik di gah langiu Mũi Né, lac labik hu biak rilo labik rivang main pakat glaong saong ngak kan kandah tal bruk ngak mbang, daok dang di bhap bini. 

Dom adit mai ini, yaom amriak kalu di dom tỉnh Đông Nam bộ gam gam tagok yaom. Di Đồng Nai, urang pablei salih mai blei amriak kalu di bein yaom meng 70.000 - 71.000 đồng/kg; di Bà Rịa - Vũng Tàu, yaom amriak kalu tagok tal 73.500 đồng/kg – glaong abih dalam taneh ia, daok di Bình Phước, yaom lac 72.500 đồng/kg. Duk haong bilan dahlau, yaom amriak kalu tagok 20.000 đồng/kg, duk haong tukvak ini thun blaoh tagok 34.000-35.500 đồng/kg. Amriak kalu tagok yaom kayua taneh pala takik, saong thun ini pala oh njauk, takik hu baoh. Tui kuhria mboh dahlau, anak tal yaom amriak kalu daok tagok glaong.

Jabat Y tế pakat negar France brei thau, harei 17/3, negar ni hu labaih 38.500 ureang njom bahrau SARS-CoV-2 – lac tanuk glaong di abih meng di harei 8/11 thun dahlau saong hu gac  250 urang metai. Urak ni, dom sang iek ruak di ban ine Paris daok taong ruak ka jaik 1.200 urang ruak Covid-19, tui nan, nyu tapa prein taong ruak di sang iek ruak dalam bhum. Tui kuhria di melam ni (18/3), Thủ tướng France Jean Castex meda brei thau dom jalan langyah pabak veik.

UB châu Âu bahrau tabiak panuac brei thau dahlau ka bruk oh brei ba vắc-xin tapa Anhmeyah gah  Anh oh klah rabha dom vắc-xin. Javap jalei veik, Anh hu panuac lac EU daok khin mesruh, dalam tuk talei pambuak bruk di dua gah daok jhak nao mboh di anak meta dom bilan hadei di Brexit. Bruk klauk vắc-xin pacang Covid-19 di châu Âu daok srau kadau biak trak, dom taneh ia oh ginup vắc-xin piah klauk ka rahra saong rilo taneh ia brei padeih bruk klauk vắc-xin di AstraZeneca kayua huac hu hagait oh siam ka menuac klauk. Dalam tuk nan, taneh ia Anh hu blaoh 25 triệu menuac, meblah 37%menuac sia dalam taneh ia hu klauk takik di abih lac 1 mbang vắc-xin pacang Covid-19.

Jabat kuhria mboh dahlau bruk langik tasik Hàn Quốc brei thau, mbang ribuk cuah khang abih hu asal meng dom sa mạc di Trung Quốc daok pacang me-om rilo labik di Hàn Quốc. Tui kuhria, ribuk cuah daok ngak kan kandah tal akaoh pulao Triều Tiên dalam dom harei anak tal. dalam tuk nan, dhur mun saong cuah bo mbang ribuk cuah di gah barak Trung Quốc par tal Bắc Kinh harei 15-3 tui  hangin Tây Nam par gilac veik ban ni di harei 17-3, ngak ka ban ine di Trung Quốc me-om bak cuah mbang ka 2 dalam 3 harei./.

Urang lang: Thu Thảo -Mousaphuong 18/3