Tatua Thủ Thiêm 2 atah abih tih 1.465m, hu 6 jalan radaih peih

Mintri jalan mbak pajeng ba bahrau pok panuac tagok likau Thủ tướng pasang iek brei buh jien ngak jalan cao tốc Biên Hòa - Vũng Tàu mbang 1 tui jalan PPP. Jalan nan atah 53 km hu phun jien buh tame abih tih labaih 19.000 tỷ đồng; akaok jalan di labik jalan plaih jalan roya 1 tapa Biên Hòa - Đồng Nai, jhung jalan labik mbang tapa jalan roya 56 dalam ban Bà Rịa, tỉnh Bà Rịa - Vũng Tàu. Tui bruk padang ngak jalan mbak Việt Nam vaktu 2021-2030, cao tốc Biên Hòa - Vũng Tàu pambuak tapak haong dom pabah lamnge Cái Mép - Thị Vải, mblang kapal haok Long Thành haong bhum kinh tế praong gah meraong. Jalan cao tốc ni nyu daong patrun patakik radaih ka jalan roya 51. Urak ini jalan praong pambuak Vũng Tàu, TP.HCM haong Đồng Nai daok tapa prein.

Di TP.HCM, tatua Thủ Thiêm 2 bahrau hu dom kỹ sư haong urang ngak pagam đốt dầm puac abih piah pagam mbaik tatua pambuak meng quận 1 tapa TP Thủ Đức. Atah abih tih 1.465m, hu 6 jalan radaih peih, ini lac 1 dalam dom bruk ngak praong, njauk ngak dahlau, hu UBND TP.HCM brei adat ngak dalam mbang pa-atah di gauk min khik hu bruk pacang caga jit. Urak ini, tatua ngak hu 80% dom bruk di nyu, tui kuhria, tal quý 2-2022, hu ngak salah blaoh.

Dalam harei camereip padeih lễ 2/9, dalam taneh ia hu 16 mbang bala radaih angaok jalan, ngak brei 7 urang metai, 11 urang njauk rambus, duk haong thun blaoh takik jang 13 mbang, takik jang 9 menuac metai saong takik jang 12 urang njuak rambus; jalan pasei, jalan kroang oh hu bala hagait. Dalam bilan 8, dalam taneh ia hu labaih 500 mbang bala angaok jalan, ngak brei labaih 250 urang metai, duk haong thun blaoh bilan ini trun jaik 60% mbang, trun labaih meteh dom menuac metai saong trun labaih 60% dom menuac njauk rambus. Hu yau nan meng hu bruk pa-atah di gauk piah pacang caga jit COVID-19 ngak brei radaih haong menuac trun 70-90%.

UBND tỉnh Ninh Thuận bahrau brei ramik veik tukvak peih thun bac bahrau saong pato bac thun bac 2021-2022 piah khik bruk pacang caga jit. Tui nan, anek saih dom sang bac THCS, THPT, giáo dục thường xuyên di huyện Ninh Phước haong ban Phan Rang-Tháp Chàm nao tal sang bac di harei 13/9; pakat mầm non haong tiểu học nao bac di harei 20/9; daok pakat THPT, dom sang bac peih pato online meng harei 6/9. Dom huyện daok veik tame thun bac bahrau di harei 5/9.

mBan tacei pato pacang caga bala meng langik tasik haong doang duah urang gaok bala tỉnh Bình Thuận brei thau: mbang hajan ia sua praong abih di ban sit La Gi melam 28/8 ngak brei 98 sruh kapal, gilai kram, khut, khat lahik abih tih labaih 10,3 tỷ đồng. Gah chức năng hu sraong 10 gilai ikan, ba 89 kapal gilai karei tabiak pataok di gah langiu pabah tasik La Gi. UBND ban sit La Gi ieu dom gah pambuak tal samar pasiam dom khut khat, pabak ginup pandap mbang menyum ka dom menuac khik iek kapal gilai dalam vaktu pa-atah di gauk tui Sarak 16.

Thủ tướng Japon Yoshihide Suga tabiak panuac lac oh tabiak tranh cử veik piah pilih ruah ngak akaok đảng cầm quyền saong tamat nhiệm kỳ dalam bilan ini. Bruk nan hu ba tabiak oh ka tal 1 thun hadei di tuk ong Suga tagok pan quyền, dalam tuk đảng LDP daok caga peih bruk pilih ruah chủ tịch di harei 29/9, meng bruk jak ba hu peih tabiak meng harei 17/9. Dom adit jaik di ini, dom menuac pachreih tui ong Suga, urang taduan ngak thủ tướng meng ong Shinzo Abe di bilan 9/2020 trun khang, mala 30%.

Gah kapul Kháng chiến taneh ia Afghanistan ndom lac dom lin Al-Qaeda hu mbaok dalam mbang taong tame harei 2/9 di Taliban tame bhum Panjshir, gah barak ban ine Kabul, dalam kham merat meblah mek bhum ini meng gah kháng chiến. Tui kapul ini, hu takik di nyu 640 lin Taliban metai dalam dom harei mesruh gauk. Dalam tuk nan, gah Taliban brei thau lac tame hu labik puac abih di gah kháng chiến hadei di tuk bruk ginum biai oh jeng.

Sa bala kapal haoh biak khang rah tabiak harei kabroi (2/9) di bang Connecticut - Mỹ ngak brei 4 urang metai, 2 urang njauk rambus. Sa sruh kapal haoh ginuh tame sa sang praong, glaong di tập đoàn di ong Donald Trumph, Tổng thống dahlau daih. Tukvak rah tabiak bruk nan, gah dalam sang praong nan hu 100 menuac. 2 urang peih kapal haoh haong 2 menuac nao angaok kapal haoh metai. Gah Salamat jalan par Mỹ daok duah thau ka bala nan. Makna tuk camereip mboh lac kayua suan gah kỹ thuật./.

Urang lang: M. Phuong – 03/09 15:46:00