Rilo bruk ngak di dam dara hu peih ngak dalam dom harei anak tal 

Di tuk pahadar 90 thun harei padang kapul dam dara TNCS Hồ Chí Minh, 22 thun padang Kadung jien bac Vừ A Dính, 7 thun padang Kalup kapul Kayua Hoàng Sa-Trường Sa anit ranam, mesup 15/3, di jabat Rajaei, Thủ tướng Nguyễn Xuân Phúc taom gaok dom urang lamboak Kadung jien bac Vừ A Dính haong dom urang lambaok ka dom menuac ngak pahala nao gam haong Kadung jien dalam rilo thun tapa. Mai hu mbaok, daok hu amuk Trương Mỹ Hoa, dahlau daih ngak Phó akaok negar, akaok Kadung jien bac Vừ A Dính, akaok Kalup kapul Kayua Hoàng Sa-Trường Sa anit ranam. Thủ tướng taong yaom glaong Kadung jien hu rilo rik daong ka bruk dak padang saong patagok taneh ia, gam haong Đảng, haong bhap bini, peih ngak jalan praong lac ba taneh ia cakrok saong oh caik ka urang halei daok veik gah likuk.Thủ tướng jeng hu pok meyaom, taong yaom glaong dom urang ngak pahala hu rik daong biak rilo drap ar brei  Kadung jien bac Vừ A Dính, lac labaih 400 tỷ đồng dalam 22 thun. Meng dom anek saih, SV hu pato pakai nan, Thủ tướng ndom lac, ini bruk njauk taduan hu pok meyaom di Đảng, Karja.

Harei 15/3, Mintri Nội vụ pambuak haong Ủy ban bangsa peih nyaom biai ka bruk ngak adat cambat, agama bhum mikva bangsa takik (DTTS) tukvak 2018-2020.  Urak ni hu labaih 2,8 triệu urang bangsa takik tui dom agama (meblah jaik 20% rahra lac urang bangsa takik). Di nyaom biai, dom urang hu mbaok hu ginum biai nao mai dom bruk pambuak tal dom  adat cambat, agama bhum bangsa takik tukvak 2018-2020. Dalam nan hu pataom tame ginum biai ka dom bruk ngak hu saong bruk daok tavak tavaiy dalam khik ramik kanja ngan haong bruk ngak agama, adat cambat dalam bhum bangsa takik. Meng nan, ndem tal dom jalan ngak piah patagok bruk agama dalam padang taneh ia....Nyaom biai jeng njauk gauk dom asal kadha njauk ngak veik dalam tukvak 2021-2025 nan lac: Jhul pakhang bruk pathau khan di bhum bangsa takik, paglaong bruk pachreih tui di rahra, pakhang hatai jia di bhap bini haong Đảng saong kanja, patagok prein khang, yam tagok dom kan kandah, mbeik drei tame gam haong taneh ia...

Panuac meng danak dak klauk jru peih praong (TCMR) pakat negar brei thau, hadei di 1 adit peih bruk klauk vaccine pacang Covid-19, abih tih 15.865 menuac hu klauk di 12 tỉnh, ban. Dalam harei 15-3, danak dak TCMR mboh hu dom urang mboh karei dalam rup hadei di tuk klauk jru, yau ye pandiak, brah pandik di labik klauk, ndaih baoh, pandik rak, aih craoh… dreih yau panuac khan daghlau di gah ngak tabiak vaccine lac AstraZeneca.

Thun ni, Tết meng kan Chôl Chnam Thmây di bhap bini bangsa Khmer meda hu peih tabiak dalam 3 harei (14,15 saong 16/4). Anak bruk jit ruak COVID - 19 daok srau kadau, tỉnh Sóc Trăng hu sangka peih ngak dom jalan pacang caga jit biak khang piah khik ka bhap bini  Khmer rok Tết meng kan Chôl Chnam Thmây dalam salamat, bui sambai, hu makna praong.  Sóc Trăng lac tỉnh hu bhap bini bangsa takik meblah jaik 36% abih tih rahra dalam tỉnh. Daok bhap bini bangsa Khmer meblah jaik 31%, rilo abih di bhum Nam bộ.     

Melam blaoh, Tòa án bhap bini ban Hà Nội hu tabiak panuac kaoh duas  12 urang dalam bruk Ethanol Phú Thọ. Kapul langyah ndom lac, danak dak Ethanol Phú Thọ brei padeih ngak meng thun 2013, kuhria tal tukvak langyah ini, lac 8 thun, khat lahik di bruk nan, lac 543 tỷ đồng lac bruk kuhria mboh hu. Biak di nyu, khat lahik meda praong jang biak rilo, kayua danak dak padeih meteh dhi. Kapul langyah kaoh duas Đinh La Thăng 11 thun guk kayau ngak suan adat gah buh jien tame ngak ba tal khat lahik trak, pataom veik dom duas karei lac 30 thun guk; Trịnh Xuân Thanh 18 thun guk ka 2 duas. Pataom veik dom duas karei hu kaoh dahlau di nan, Trịnh Xuân Thanh njauk guk tal abih rai. 10 urang daok veik njauk meng 24 bilan guk tal 6 thun 6 bilan guk. Lingiu di nan, dom urang nan daok njauk bayar dom khat lahik ka bruk nan meng 100 tỷ đồng tal 200 tỷ đồng.

Rilo negar brei padeih klauk vắc-xin di AstraZeneca kayua huak rahtabiak dom tác dụng phụ, dalam tuk gah Y tế dunya jeng daok brei thau lac ka oh hu hagait ndem cambaih ka bruk pambuak di dom bala y tế ni haong vắc-xin.  Jabat jru tavao châu Âu brei thau meda hu mbang ginum biai di harei 18/03 anak tal piah langyah ka bruk klauk jru saong brei thau veik dom asal kadha ka vắc-xin. Tui kuhria, Ủy ban cố vấn di gah Y tế dunya ka vắc-xin AstraZeneca meda hu ginum biai di harei ni.

Dalam sa kham merat piah duah bruk njauk gauk haong dom jabat báo chí Australia piah plaih brei ginum biai, Facebook bahrau mek hu thỏa thuận haong 1 jabat báo chí praong ka 2 di Australia nan lac News Corp. Dalam harak khan di mesup ini, News Corp Australia brei thau, Kapul amaik lac News Corp dunya bahrau njauk gauk haong Facebook ka bruk bayar jien brei News Corp piah pandar tin tức meng rilo jabat báo chí di News Corp angaok dunya. Dahlau di nan, Facebook jeng hu njauk gauk haong News Corp Mỹ di thun 2019 ka bruk Facebook bayar jien pandar dom kadha báo chí di News Corp. Lingiu di News Corp, báo chí Australia jeng brei thau Facebook bahrau  mek hu panuac sanya saong Nine Entertainment haong Sky News.

Hội đồng Bảo an Liên hợp quốc harei kabroi hu ginum biai ka bruk chính trị di Syria. Mbang ginum biai hu peih tabiak dalam tuk bruk mesuk gauk, sarau kadhau di Xyri rahtabiak bak 10 thun. Đặc phái viên di Tổng Thư ký LHQ ka bruk di Syria - Geir Pedersenndom lac dunya daok neh rabha gauk meng bruk mesuk metak nan, ba tal bruk ka oh duah hu jalan langyah. Đặc phái viên ieu bruk urak ni di Syria lac “sa dalam dom bruk jhak abih di urak ni” tuk bhap bini jeng manuac njauk bala taong paoh, khủng bố, vũ khí hoá học, pacang cakak, kan kandah di kinh tế ./ 

Urang lang: Thu Thảo -Mousaphuong- 16/3