Urang lin daok sap gap pandap mbang ka urang brei daok karei 

Jaik 20 harei tapa, Thượng tá Lê Xuân Tuyến, Chính trị viên Tiểu đoàn 2, Sang bac quân sự Quân đoàn 1 daok di Ninh Bình oh ka mai sang di drei. Bruk ngak di sa-ai saong ayut sahabat nan lac pajeng ba, taduan raok, rami ramik labik mbang huak, ndih daok ka bhap bani meng labik jit mai veik puk palei. Page medeih tagok meng 5 tuk piah kuhria caga pandap mbang ka jaik 700 urang brei daok karei, tagok jalan taduan raok bhap bani gilac veik puk palei oh kuhria hagait tal harei melam, kuhria caga dom bruk piah pasang iek, mong iek pren yava, dut iek, neh rabha njauk haong adat hukum. Dom bruk hu jao brei biak bahrau karei jang haong dom bruk ngak dahlau diah, oh lac glaih glar bo daok biak mbuan njaom mbak ruak. Min yaok urang yaok bruk, dom urang jakar, urang lin  thei jeng ngak njauk haong adat hukum, abih hatai pamere bhap bani. Mek bui sambai di bhap bani ngak jeng bui sambai di drei. Thượng tá Lê Xuân Tuyến brei thau: “Bruk njauk caik hatai di dahlak haong mikva dahlau di tuk mikva abih tukvak brei daok karei gilac veik nao sang, nan lac dom panuac ndua dhal phol abih hatai di mikva ngan haong dom urang jakar urang lin dalam tuk vak pamere saong khaol dahlak mboh ini lac kadha vinh dự, hadah mbaok meta saong mboh hu hatai anit di mikva brei ka bol lin jang yau urang jakar urang lin khaol dahlak.”

Bruk pacang jit yau pacang khamang saong bruk gandi gandang pamere di dom urang jakar urang lin di yaok rituh labik brei daok karei, yaok njaoh aia hauk di dom sa-ai pamere ka bhap bani jeng hu mikva mboh mikva thau. Labaih 36 ribau 700 urang brei daok karei di dom labik brei daok karei pataom sa labik di bol lin nan lac hadom nan hatai anit ranam, iek prong dom urang jakar, urang lin Wa Hồ. Urak ini dalam bol lin hu tal 110 labik brei daok karei  pataom sa labik daok patui veik bruk brei daok karei saong tui iek y tế ka labaih 18.000 bhap bani. Labik brei daok karei halei jeng hacih sa-at, daok urang lin ye tuk halei jeng abih hatai, yaok van lisei pandiak ấm hatai anek manuac... Hu urang mai oh khin nao daok karei, min tuk thau cambaih bruk ngak di bol lin nan lac piah pacang khik siam mekre pren yava ka rup drei, baoh sang di drei saong mong mboh bruk dom sa-ai daok ngak, abih hatai brei ka bhap bani, ye mikva thei jeng iek prong hatung hatian di dom sa-ai, saong bol lin haong bhap bani jeng hu sa jalan sahneng pacang caga jit Covid 19. Sa urang daok karei di labik daok karei pataom salbik dalam Quân khu 7 brei thau:“Dom urang lin, dom bác sỹ, y sỹ, daong khaol dahlak cakon galam dom pandap panda ka dahlak nao tame duk saong palaghaih ka khaol dahlak hu labik mbang labik ndih hacih sa-at laneng lanoi, hu dom van mbang huak biak  bingi saong gaok mai daok salih món piah njauk cambuai di drei. Bruk ngak nan dahlak mboh hu yaom jang ameh.”

Oh lac di yaok rituh labik brei daok karei, di dom sang bac, dom jabat,  quân đoàn, quân khu bo angaok dom jalan tapen negar, bộ đội biên phòng hu brei yaok ribau tổ pacang cakak, pasang iek dom pabah mbang negar, jalan mòn jalan peih piah pacang cakak bruk njaom mbak jit ruak. Jalan tapen negar Việt Nam – Trung Quốc hu ba caik 535 tổ; jalan tapen negar Việt Nam Campuchia hu 352 tổ saong jalan tapen negar Việt Lào hu 271 tổ. Trung tướng Phùng Sỹ Tấn, Phaok tổng tham mưu trưởng, Bol lin bhap bani Việt Nam brei thau dalam vaktu 2 pacang caga jit, Bol lin meda patagok taong abih labik brei daok karei tagok 140 labik brei ka jaik 45 ribau urang daok:“Bol lin hu pandar cơ chế chỉ huy, tacei pato tui bruk di saman mesruh metak meng tuk peih bruk pacang caga jit ruak Covid-19. Hadei di vaktu 1, khaol drei samar drah bac megru ilamu, nan ye tuk yam tame vaktu 2, khaol drei peih ngak cơ chế ini cambaih laih jang, siam lagaih jang. Bộ Tư lệnh dom quân khu, quân đoàn, bộ Tư lệnh Biên phòng saong dom binh chủng thau cambaih tacei pato di Akaok Mentri Quốc phòng, Bộ Tổng tham mưu peih ngak bruk điều phối, pambuak bruk haong dom puk palei kuhria caga dom labik brei daok karei, peih ngak bruk brei daok karei pataom sa labik.”

Dom harei tapa, yaok ribau urang jakar, urang lin brei labik daok di drei ka bhap bini saong abih hatai pamere bhap bani di labik brei daok karei. Daok di dom labik tapen negar, yaok ribau urang jakar bol lin daok mbang ndih dalam ceik dalam glai dalam langik tasik tua riya pandiak bhang piah pacang khik oh brei ka urang meng labik jit tame negar drei suan adat hukum, rik daong tame bruk pacang caga  njaom mbak di jit Covid-19 meng di pabah mbang negar./.

Urang lang: Jasi - 30-3