Pathau mikva saong taong abih gauk! Angaok bhum taneh sajarah Điện Biên, mesruh metak tapa bloh livik ye. Nao tagok meng mbom đạn, yaom lac daok ralo kan kandah, min yaok bhap bini bhian lac urang lin du kích taong khamang joi dalam saman mesruh, mai sang veik lac dom urang naih joi dalam ngak mbang, pala drak. Urang jeng sarak dalam hatai drei bruk “Bayar dhar phon” piah hadar dom thương binh, liệt sỹ, dom urang haok ralo darah ka bhum taneh ini . Bích Thủy, urang vak di rayo sap ndom VN daok di Tây Bắc hu kadha vak “Điện Biên: Tình đất, tình người”.

Hadei di harei 7/5/1954, mblang mesruh Điện Biên Phủ tayah tayac khang. Mblang hamu Mường Thanh bak phao ndao saong mbom đạn hadei di mesruh metak, yaok tấc taneh, yaok got kayau, phun hareik jeng njom bak drah di dom urang lin điện biên kayua độc lập, tự do di taneh ia. Tapa 63 thun, dom bruk nan jeng oh var hu dalam hatai di dom urang dahlau daih lac urang lin điện biên saman nan. Urang dahlau daih lac bol lin, angan Hoàng Công Đẩy, daok di tổ dân phố 20, phường Him Lam, ban Điện Biên Phủ, urang hu mbaok dalam chiến dịch Điện Biên Phủ sajarah dak rai hadar veik:  

 “Mblang mesruh tuk nan kol dahlak tok mboh sambo meraih. Sauk bak abih, kol dahlak maong mbaok gauk oh cambaih. Sang danaok, phun kayau oh daok hagait, tok daok dom mbaik geng khuah jhuk abih”

Yam tapa bruk pandik harao mesruh metak, ong Hoàng Công Đẩy saong dom urang anek Điện Biên jum pataom gauk, kham merat lao động sản xuất, dak padang bản mường. 

Noong Nhai, daok dalam xã Thanh Xương, huyện Điện Biên, tỉnh Điện Biên, labik ini  harei 25 bilan 4 thun 1954, kol Prang nyu plaik bom napan pametai 444 bhap bini, dalam nan ralo meng lac urang taha, urang kamei saong uranaih. Min urak ini, Noong Nhai jeng sa bhum padai trù phú. Meng kein lagaih lac daok dalam bhum taneh mblang hamu Mường Thanh, hu hệ thống thủy nông Nậm Rốm, mikva di labik ini hu pandar ilamu kỹ thuật, ba dom pajaih padai chất lượng glaong tame pala drak, thâm canh tăng vụ, rai diuk dak harei dak tani tanat, jhul kadul likuk eik lipa, kathaot rambah. Saai Phạm Thị Châm, bhap bini daok di bản Noong Nhai lac:

 “Kol dahlak lac dom urang daok angaok bhum taneh Điện Biên dak rai sajarah biak hadah mbaok ka rai dahlau ndih trun brei ka kol dahlak hu daok dalam sron mbon. Saong kol dahlak brei hu trách nhiệm ngak yau habar ka puk palei dak harei dak siam mekre, patruh eik patrun kathaot”.

Taneh oh phụ pren menuac, mblang hamu Mường Thanh bom đạn saman dahlau urak ini jeng vựa padai praong di bhum Tây Bắc. Kinh tế - XH di Điện Biên jeng mek hu ralo siam mekre. Thun 2016, tốc độ tăng trưởng kinh tế di tỉnh mek hu 6,83%, cơ cấu kinh tế daok tagok njauk jalan; jien mek tame kuhria tui akaok menuac labaih 22 triệu đồng sa urang sa thun; dom baoh sang kan kathaot dalam tỉnh trun ralo, tok daok labaih 54.000 baoh sang, meblah jaik 45% abih tih dom baoh sang, trun 3,2% duk saong thun dahlau nan. Tỉnh daok kham merat ngak, patagok dom kein lagaih gah du lịch sajarah, kham merat jhul du lịch jeng gah kinh tế praong di tỉnh. 

Dalam rai diuk sron mbon harei ini, yaok urang angaok bhum taneh Điện Biên anh hung oh var dhar phon dom thương binh, liệt sỹ, dom urang haok ralo darah ka bhum taneh ini. Dalam tỉnh urak ini hu labaih 16.000 urang hu buh pren yava ka cách mạng hum bang tui chế độ, sarak, dalam nan hu labaih 900 baoh sang liệt sĩ. Langiu bruk ngak siam pháp lệnh ưu đãi urang hu b pren yava ka cách mạng, dom pakat karja meng tỉnh tal puk palei jhul khang bruk “Bayar dhar phon”, pachreih hu ralo dom rai rah bhap bini hu mbaok tame. Meng thun 2011 tal urak ini, dalam tỉnh hu pasiam veik, ngak barau jaik 240 baoh sang tình nghĩa, alin hadaih labaih 760 sổ tiết kiệm. Dom amaik Việt Nam anh hung hu dom kapul nyaom, menuac urang, đơn vị taduan raong tal luac rai. Ong Lê Văn Quý, phaok akaok UB bhap bini tỉnh Điện Biên brei thau:     

“Tỉnh Điện Biên hu pathau khan praong dalam bruk bayar dhar phon, iek glang baoh sang thương binh, liệt sỹ, urang hub uh pren yava ka taneh ia. Peih dom bruk ngak pasiam veik dom nghĩa trang liệt sỹ, dom sang anit ranam, sang tình nghĩa di dom baoh sang thương binh, liệt sỹ, urang  buh pren yava ka taneh ia. Peih dom bruk nao rivang dom nghĩa trang liệt sỹ, rivang dom baoh sang gauk gar di liệt sỹ pamaong tal bruk bayar dhar phon saong jeng lac pato pakai ilamu menyum ia hadar tal halau ia”.

Angaok bhum taneh  Điện Biên dak rai sajarah, tình đất – tình người tuk halei lai tame gauk, khang kajap. Di labik ini, yaok urang daok gam rik pren yava di drei tame dak padang puk palei dak harei dak trei sil jang./.