Khaol dahlak duah mai tal xã Thanh Hòa – xã daok ralo kan kandah di huyện Bù Đốp. Nao tui jalan tuh menyek, blaoh jalan hu tuh haluk tame tal xã hu mboh biak ralo puh cà phê, amaraik kalu, njam patam di mikva daok tamuh hijao, daok brei ralo baoh. Ralo baoh sang urang Yuan, urang Tày, Nùng, Khơ-me pak ini daok pandar dom mbraong ba aia pruh meng cơ điện. Ong Dương Minh Khoa, Bí thư Chi bộ ấp 9, xã Thanh Hòa bui sambai khan lac, atah di ini jaik 2 thun, njauk tame melam Giao thừa thun 2013, mikva dalam palei taduan raok jalan điện negar  ba hadah hadai mai meng dự án hu yaom 2 tỷ đồng di Tổng Công ty Điện lực gah Meraong. Ong Khoa meyaih lac, sang ong hu 4 ha pala ginup dom janih phun meng amaraik kalu, pa-aok blait, cà phê, cao su, quýt saong bruk ba aia pruh biak mbuan lagaih saong lap jien: Sang dahlak xài dom rituh ribau min, yau nan nyu jeng tui ba-zem di Karja, dahlak mong phiếu mboh sa ribau pak sa ký điện. Pak ấp 9 ini nan lac 270 baoh sang ye tok daok 9 baoh sang kathaot, daok veik nan lac baoh sang hu mbang. Rai diuk di bhap bani ấp 9 jeng dak harei dak cakrok patagok gah kinh tế.

Mboh daok saneng hasit, ong Vũ Viết Duy, akaok Ủy ban bhap bani xã Thanh Hòa, huyện Bù Đốp brei thau, xã hu 9 ấp ye daok 4 ấp 2, 4, 5, 9 gaok kan kandah ka điện. Nghị quyết di Đảng bộ xã kham merat tal puac thun ini meda katung điện mai tal sang ilamo di dom ấp daok veik saong canah dhal piah patagok tỷ lệ baoh sang pandar hu điện, paglaong rai diuk ilamo ka bhap bani. Bhap bani Thanh Hòa jeng caong khin pandar hu điện ralo jang piah patrun phun jien buh tame ka bruk ngak mbang pala drak, jang yau patrun pren ngak. Tui kuhria di mikva, bruk ba aia pruh meng động cơ điện meda lap jang jaik 30% dut haong ba aia pruh meng động cơ menyek. Kayua nan ye, oh cang pambak tame karja, peih ngak jalan xã hội hóa buh jien tame padang ngak cơ sở hạ tầng, pak ấp 4, bahrau ini jaik 40 baoh sang hu rik daong jaik 300 triệu đồng piah katung điện. Saong kadha bui sambai jeng hu mai, gah điện lực Bình Phước jeng hu buh tabiak 800 triệu đồng piah kuhria caga peih ngak jalan điện ba mai ấp ini. Ong Vũ Viết Duy, akaok Ủy ban bhap bani xã Thanh Hòa lac:Mbang dahlau phun jien buh tame di gah điện lực tỉnh jeng peih ngak hu labaih 1 mbaik cây số katung điện mai ka ấp 9. Daok bhap bani ye mikva tự katung, pagap yau jalan điện hạ thế pak ấp 5 meng blaoh ye mikva tự rik jien piah kating điện.

Piah grap tanat an toàn ka labaih 24 km jalan talei trung thế saong labaih 26 km jalan talei hạ thế trun dom labik daok di bhap bani, Trung úy Nguyễn Xuân Thủy, urang jakar dân vận Đồn Biên phòng Thanh Hòa brei thau, urang jakar bol lin dalam jabat bhian daong mikva jah tak puh ramik grap tanat ka hành lang an toàn lưới điện saong pathau khan ka mikva thau jalan pandar điện an toàn, patak pataom, mek hu ralo baoh jeng siam mekre: Oh lac ta-eng hagait mikva daok pak ấp di xã Thanh Hòa bo mikva daok pak dom bhum palei karei, tuk hu điện ye jeng salih bahrau biak ralo. Salih jalan ngak mbang, jalan trang trí dalam sang, dom pandap pandar dalam sang yau gaok điện piah tahanek lisei, dom anek saih jeng hu điện truac hadah piah bac  megru, ma-in sa-mbai. Daok ndom ka bruk ngak mbang pala drak ye daong ka bruk ba aia pruh ka dom janih phun pala abih di nyu lac dalam bilan pandiak biak siam.

Dom thun tapa, Tổng Công ty Điện lực gah Meraong saong Công ty Điện lực Bình Phước gam haong bruk katung ba điện mai ka bhap bani, hu kham merat ba điện mai ka taong abih dom đồn biên phòng dalam tỉnh. Tapa nan, ngak brei grap tanat an ninh trật tự bhum tapen negar, khik kajap chủ quyền labik tapen negar. 

Ong Mai Quy Tiên, Akaok điện lực Bù Đốp brei thau, kayua daok di bhum tapen negar, bhap bani biak takik nan ye hu dom dự án buh jien tame ngak biak glaong. Gaok mai padang ngak jalan điện atah 2-3 ki-lô-mét, min tok duh ka jaik pluh baoh sang. Min, oh lac brei ka  bruk ngak kinh tế, gah điện saong raja-ei puk palei tuk halei jeng sangka ba điện mai tal yaok baoh sang. Piah ka jalan điện negar yam atah truac hadah bhum tapen Bù Đốp./.