Rilo bruk uan harei urang kamei 20/10 hu peih ngak 

Dah page ini 20-10, Mbang ginum biai ka 2 di Quốc hội mbang XV  hu peih tabiak praong prang di Hội trường Diên Hồng, Sang Quốc hội. Mbang ginum biai hu peih tabiak tui jalan online gam haong ginum biai pataom gauk. Tukvak ngak bruk tui kuhria lac labaih 17 harei dut saong 1 bilan ka mbang ginum biai puac thun min jeng khik hu siam dom bruk praong di Quốc hội ngan haong bruk cak rok patagok di taneh ia dalam thun 2022 saong dom thun hadei di ini, khik kajap bruk pacang caga jit Covid-19. Mbang ginum biai hu Rayo sap ndem VN (VOV1), Rayo papar binguk Việt Nam (VTV1) saong Rayo papar binguk Quốc hội Việt Nam papar sap, papar binguk tapak piah ka dom cử tri saong bhap bini dalam taneh ia tui iek, tui pang.

Dok dalam dom bruk ngak piah pahadar harei urang kamei  Việt Nam 20/10, melam kabroi danak dak online  “Urang kamei song bala meng langik tasik” kayua jabat Thường trực mban tacei jalan pakat negar ka pacang caga bala song kapul  Liên hợp quốc ka bruk kamei likei samu gauk song jao quyền ka urang kamei pambuak gauk hu rah tabiak pak di  Hà Nội song Gia Lai. Tuk vak tapa, oh lac kham merat dalam bruk pathau khan, pachreih ba rahra panduan nao labik karei tuk bala rah tabiak , urang kamei di rilo  tỉnh ban dalam negar, di dom labik bhain rah tabiak bala hajan ia sua dok ngak siam bruk  ba akaok nao dahlau, dong ka gah pacang bala meng langik tasik, iek glang uranaih, urang taha, parabha pandap panda song hu mbaok dalam bruk pasaim dom khut khat kayua bala meng langik tasik.

Dalam 3 harei jaik di ini, dom tinh, bal di gah barak yau ye Phú Thọ, Thanh Hóa, Nam Định hu dom sruh jit bahrau, ngak ka jit ruak mbuan pambak   praong tuk dom urang klauk vắc xin Covid 19 di dom tinh, bal ni daok bier. Kayua yau nan ye, dom tinh, bal ni njauk peih ngak rilo bruk piah pacang caga jit saong peih ngak Sarak 128 ka diukrai lagaih, salamat, pasang iek hu jit ruak Covid 19. 

Harei 19.10  Ủy ban MT negar Việt Nam ban raya  Hồ Chí Minh pambuak bruk song mBan bangsa ban raya, Báo Công an nhân dân peih bruk alin brei 90 máy tính bảng, dong ka bruk bac online di anek saih bangsa  Chăm song Khmer hu rai duik kan kandah dok di ban raya  Muk  Phan Kiều Thanh Hương, Phó Chủ tịch Ủy ban MT negar Việt Nam ban raya brei thau, ban raya Hồ Chí Minh hu biak rilo anek saih lac urang bangsa takik, dalam nan anek saih Chăm, Khmer dok gaok kan kandah dalam rai duik. Ban raya hu peih danak dak dong brei song iek glang piah anek saih bangsa takik hu nao bac daa. Bruk alin brei máy tính bảng ka anek saih bangsa Chăm, Khmer dok di ban raya lac bruksangka daong palagaih bruk bac online ka dom adei dalam tuk jit ruak COVID-19.

Tui pathau khan meng ini tal puac thun  tội phạm meda tagok gilac veik di taong abih dom gah,  Phó akaok UBND Ban raya HCM Ngô Minh Châu ieu kakei Công an ban raya paglaong dom bruk pacang caga jit. Tui ong Châu, dalam 9 bilan akaok thun ini, bruk tội phạm di dalam ban hu trun, abih di nyu nan lac dalam 3 bilan Ban raya peih bruk paatah di gauk. Min, meng urak ini tal puac thun, tui kuhria dom tội phạm meda tagok viek di abih gah. Công an Ban raya njauk peih ngak tui 3 jalan di Mintri Công an ka bruk pacang caga tội phạm dahlau, dalam saong hadei di tuk abihh jit ruak.

Harei ni, Hội đồng Bảo an Liên hợp quốc hu peih nyaom biai piah ginum biai  ka bruk cuk tên lửa bahrau abih di Triều Tiên. Mbang nyaom hu peih tabiak tui panuac caong di  Anh song Ai lenBruk ni rah tabiak hadei di tuk  Triều Tiên brei thau bruk cuk iek sa  tên lửa đạn đạo meng kapan njuk ia dalam harei 19/10. Hãng thông tấn karja  (KCNA) di  Triều Tiên brei thau, tên lửa đạn đạo “Janih bahrau" hu cuk meng sa kapan njuk ia hu mbaok tame bruk ngak iek cuk  tên lửa đạn đạo dalam thun 2016.

Hadei di sa tukvak joa gidang, bruk duh hatai ka jit praong Covid-19 daok tamuh gilac veik di Anh tuk dom urang matai dalam harei 19/10 tagok  glaong di abih meng di bilan 03/2021, gam tui di nan dom urang njom yaok harei dalam dom harei tapa tuk halei jeng daok di tanut 40 ribau urang. Dom chuyên gia y tế brei thau lac, bruk jit ruak Covid-19 di Anh rahtabiak sarau kadhau biak samar dalam tukvak tapa, yaom lac bhap bini hu klauk ginup vắc-xin caga Covid-19 lac kayua dom urang njom dalam dom anek saih pakat 2 saong tiểu học tagok samar drah. Bruk dom ranaih ini njom ruak nyu ngak ka virus pambak tapa dom urang taha bhuan njom ruak jang.

Piah pacang cakak jit prong covid-19, I-xra-en song Dom tiểu vương quốc Ả-rập thống nhất (UAE) samar peih bruk klauk jru ka uranaih meng  3 thun tagok. Dalam tuk dom taneh ia dok kuhria caga  klauk ka uranaih meng akaok thun 2022, dalam nan hu panuac kakei brei klauk dahlau ka uranaih hu dom ruak trak./.

 Urang lang: Hanipha- Thu Thảo -20/10