Thau kham merat saong takre bac da-a, anek saih bangsa takik daok di tỉnh Tây Ninh jeng yau anek saih sang bac THPT bangsa gam bac gam daok Tây Ninh kham yam tapa dom kan kandah piah hu jeng anek salut mbut, anek saih naih joi di sang bac rilo thun gam.
Adei Thị Photigiah bangsa Cam daok di xã Suối Dây nan lac xã kan kandah di huyện Tân Châu, tỉnh Tây Ninh. Yaom lac, baoh sang kan kandah, amaik ame adei ngak hamu ngak apuh biak glaih glar, min oh brei padeih bac. 9 thun bac da-a, thun halei adei jeng mek hu tanut bac da-a naih joi. Oh lac bac naih joi, adei daok tari tarieng tuk halei jeng hu mbaok tame dom bruk jak ba gah măng non, bruk pala njam hacih, bein jru nam…kayua Đội Thiếu niên tiền phong di sang bac peih ngak atau dom mbang pathau khan ka bruk salamat nagok jalan mbak, pandap mbang hacih sa-at - puh ramik hacih labik daok…kayua sang bac pambuak saong Mban salamat jalan mbak, Sở Y tế tỉnh Tây Ninh peih ngak. Langiu di nan, adei thau daoh thau tamia baik gheih di sang bac. Thun bac tal 7, adei hadah mbaok meta hu sang bac palih ruah nao jum ptao bangsa pakat negar saong ba mai rilo huy chương, giải thưởng glaong ka sang bac. Dalam sang, adei tuk halei jeng lac anek salut mbut. Yaom lac, nao atah meng sang tal sang bac labih 50km, min puac adit halei adei jeng nao sang piah daong amaik pablei salih, duah jien ka baoh sang di drei. Ndem tal bruk bac da-a di drei, adei khan lac: “Hulin parabha tukvak bac da-a tui janih mon bac ka lagaih, caik rilo tukvak piah bac. Hulin bac di dom ayut pak sang bac”.
Jneg yau adei Thị Photigiah, adei Thị Mary jeng ndih taouyi saong praong atgok meng baoh sang bangsa Cam kan kathaot daok di palei Tân Trung A, xã Tân Hưng, huyện Tan Chau, tỉnh Tay Ninh. Yaom lac raidiuk kan kandah, min adei kham merat yam tapa, bac da-a naih joi, njauk meyaom, 11 thun bac da-a thun halei jeng mek hu tanut bac naih joi abih di nyu nan lac dom janih mon bac gah tự nhiên yau: toán, lý , hóa. Thun bac tal 9 adei pakacah hu giải naih joi pakat tỉnh, mon ly. Langu di nan, adei Thị Mary daok tamia biak mekre, nan lac sa urang ghieh tamia di sang bac, bhian tamia Pakacah tamia ragam hijao kayua Sang bac peih ngak. Adei caong khin harei hadei hu jeng anai gru pato mon vat ly. Adei klak rabha dom sahaneng yau ini: “Hulin kham merat pang ani gru, cei gru langyah pato pakai di tal bac. Tuk halei jeng hu mbaok bac ginup var bac pabak ilamu. Hulin bac di dom ayut, tuk halei jeng kham bac”.
Meng bruk kham merat bac da-a, adei Thạch Thị Bích Hồng bangsa Khmer thun halei jeng mek hu tanut anek saih naih joi di sang bac THPT bangsa gam bac gam daok Tây Ninh 9 thun gam. Birau ini, adei Bich Hong pakacah hu giải nhất mon giao dục cong dân pakat tỉnh. Oh lac bac da-a naih joi, adei bhian tacei pato daong dom ayut sahabat bac daok yeu piah bac tagok siam jang tap dom bruk jak ba di sang bac yau ye: dua ayut kham bac yam tagok…Tuk lahe, adei bac sap bangsa, dauh thau ka adait cambat tanarakun, ilamu di dom ayut bangsa karei karei dalam sang bac piah pambuak talei rohim jum pataom bangsa takik. Adei caong khin harei hadei hu jeng anai gru piah ba dom ilamu bac megru hu tacei pato ka dom anek saih bhum glaong, bhum urang bangsa takik daok rilo kan kandah.“ Dahlak gam bac di gru patao, gam bac dom ayut sahabat. Bac mon halei ye brei kham bac ka thau ka ndom abih mon nan, dom kadha gru pato pabak gah langiu ye dahlak dauh thau piah pabak ilamu ka drei. Gam saong dom ayut sahabat duah dom jalan bac da-a lagaih piah mek hu tanut glaong abih.”
Klau urang yau kareih camin hadah dalam bruk bac da-a naih joi di sang abc THPT bangsa gam bac gam daok Tay Ninh yau brei mboh bruk takre bac da-a di anek saih bhum urang bangsa takik jeng yau anek saih Việt Nam. Caong khin mbuan mbiah hu jeng dom ania gru pato di bhum glaong, bhum urang bangsa takik di dom adei daok anak tal, daok ralo thun piah ka dom adei kham merat bac da-a piah dom caong khin hu jeng biak./.
Viết bình luận