Hội đồng trị sự Giáo hội Phật giáo Việt Nam bahrau hu harak payua tal dom baha, dom tự viện dalam taneh ia ieu taduan mek, pok kakuh oh mek jien dom jeik bau urang ruak metai kayua Covid-19. Di TP.HCM, anak meta, Giáo hội Phật giáo ban raya brei mek baha Long Hoa (quận 10) ngak labik kakuh di anak meta bau talang di rahra palang lahik kayua jit praong min oh ka hu menuac taduan mek, atau gauk gar daok gar dalam dom labik pacang veik, dom labik daok karei, labik taong ruak. Mban ngak pahla (di mBan trị sự Giáo hội Phật giáo TP.HCM) daok hu daong áo quan brei saoh, oh njauk lac brei ka urang metai kayua Covid-19 bo daok brei ka menuac oh patuah palang lahik dalam tuk ban raya daok pa-atah di gauk, oh hu gauk gar, atau gauk gar daok gar dalam dom labik daok pacang veik, labik daok karei, labik taong ruak.

Di mbang họp báo ka bruk pacang caga jit Covid-19 di TP.HCM mesup ini, Sở Y tế ban raya brei thau, hadei di 17 mbang taduan vaccine kayua Mintri Y tế parabha brei, tal urak ini, dom quận, huyện hu klauk jaik abih ka bhap bini. TP.HCM taduan hu 4 triệu 111 rabau 040 mbang vaccine saong peih bruk klauk hu 3 triệu 430 rabau 990 mbang, kuhria rah tapa, yaok harei klauk hu ka 200.000 urang, tui kuhria, tal abih harei 12/8, TP.HCM meda klauk abih dom vaccine urak ini daok hu. UBND TP hu panuac likau Rajaei, Mintri Y tế dalam bilan 8, brei ka TP.HCM labaih 5 triệu 500 rabau mbang vaccine piah ngak hu bruk klauk ka taong abih rahra umo labaih 18 thun (lac samu 7 triệu menuac).

Mesup ini (10/8), Pasak pasang iek ruak kik (CDC) tỉnh Đồng Nai brei thau ka 830 urang dương tính haong SARS-CoV-2 bahrau hu mboh dalam tỉnh. Dalam dom urang nan, hu 24 urang hu mboh tapa dut iek saong 806 urang dalam dom labik daok karei, labik pacang veik. Tui CDC Đồng Nai, gah chức năng daok mboh hu rilo urang njaom bahrau di dom doanh nghiệp daok ngak bruk tui jalan “3 di labik” di dom huyện Nhơn Trạch haong Vĩnh Cửu, nan ye daok patagok bruk dut iek ka urang ngak, pasang iek bruk rami ramik labik ngak, labik daok saong bruk ngak tui 5 paka di Mintri Y tế.

Mesup ini 10/8, tỉnh Ninh Thuận hu 32 urang njaom bahrau Covid-19 saong 13 urang ruak abih ruak hu nao sang veik. Yau nan, tal harei ini, dalam tỉnh hu 475 urang njauk ruak Covid-19, dalam nan hu 87 urang ruak abih ruak hu nao sang, 3 urang ruak metai. UBND tỉnh bahrau brei padang Pasak tacei patao pacang caga jit Covid-19, hu brei bruk daong ka UB bhap bini, mBan tacei jalan pacang caga jit Covid-19 tỉnh dom jalan ngak piah pacang caga jit Covid-19 dalam tỉnh.

Daok di Bình Thuận, mesup ini, dalam tỉnh hu 63 urang mboh yau njom Covid-19. Urak ini hu 17.702 rahra hu klauk vaccine mbang ka 3/2021. Sở Y tế Bình Thuận bahrau brei padang Cơ sở 1 taong ruak Covid-19 di Sang iek ruak đa khoa bhum Bắc Bình Thuận, caik di Pasak pato pakai bruk ngak – pato megru thường xuyên huyện Bắc Bình. Ini lac labik taong ruak ka urang ruak Covid-19 oh hu triệu chứng, atau hu triệu chứng hanjul, labik ini hu 100 papan ndih iek ruak.

Prang hu panuac ieu Iran mai veik ginum biai di Vienna, Áo dak samar dak siam piah peih ngak veik yau dahlau thỏa thuận hạt nhân thun 2015, daok ieu lac Danak dak ngak bruk abih gah haong gauk. Tổng thống Prang Emmanuel Macron jeng hu panuac ieu Iran padeih abih dom bruk ngak hạt nhân, piah ba mbuan lagaih ka bruk ginum biai. Dahlau di nan, Mỹ jeng hu panuac lac daok caga ginum biai haong Iran ka bruk peih ngak veik yau dahlau daih thỏa thuận hạt nhân 2015.

Bruk pasiam veik kinh tế di Đông Nam Á daok biak kan kandah tuk jit praong Covid-19 haong biến thể Delta mboh lac daok pambak praong. Dom urang ilamu kuhria mboh dahlau lac, kinh tế 6 taneh ia ASEAN, oh kuhria Singapore jeng daok tagok min di tanut biar jang 1-2% duk haong dahlau di nan. Min, kinh tế Đông Nam Á meda hu siam veik haong prein khang lac gah pablei salih điện tử haong công nghệ daok tagok samar drah. Yaom glaong di dom Cty peih bruk ngak công nghệ di bhum lac labaih 340 tỷ USD dalam thun 2020 saong meda tagok jang 3 mbang di thun 2025.

Philippines urak ini daok mai veik haong bruk biak mbuan njaom mbak anak jit Covid-19 saong daok dang anak bruk tapa prein di dom sang iek ruak kayua biến thể Delta daok tamuh khang. Dom urang njaom Covid-19 di Philippines dalam 2 adit blaoh tagok 47%. Jaik 1 dalam  5 dom sang iek ruak di taneh ia ini jaik tapa prein, oh daok labik ka menuac ruak Covid-19 gam gam tagok rilo. Dalam 1.291 sang iek ruak di Philippines, 236 sang iek ruak pandar tal 85% prein, daok laik tame bruk yau Yuan lac “nguy cấp”./.

Uranglang: M.Phuong -10/08/2021