Di xã Liên Minh (ban sit Sa Pa), tuk Adat puh bah palei brei peih jeng ieu lac masa harei raya akaok thun brei gam. Urang Xa Phó ieu lac sa kapul bangsa di dalam dhan urang bangsa Phù Lá. Urang Xa Phó daok dui atah meng bhum mala ban sit Sa Pa tagok tal angak halau kraong Chảy gah Pur timun tỉnh Lào Cai. Urang bangsa Xa Phó pambuak talei rohim biak glaong. Yaok gen gen puk palei hu urang pan jammaah taeng, hu kapul urang taha dang akaok palei. Hadah di dalam nan hu adat Bah Puh palei. Nyu yau ye sa harei raya praong glaong di urang Xa Phó di Lào Cai.

Muk Hoàng Thị Vượng, Akaok Jabat bilik Ilamu – Khao tin Ban Sa Pa brei thau lac, di palei, Puh bah palei yau ye adat bhin ngak di urang bangsa Xa Phó peih ngak di bulan 2 saka ia bulan dalam thun brei patiak bhut bhaong ruak kik, pauon raok thun barau siam makre, padai brah siam makre, selamat. 

Dalau si peih harei Bah puh palei thun ini, saai Hù Hu Xa (palei Nậm Sang, xã Liên Minh) haong urang vakil dom baoh sang dalam palei pataom gauk di sang urang akaok palei piah ginum biai, pabha gauk daong dom acar gru yang ngak adat, pilih labik, masa jeng ye dom janih ngak yang. Tuk nao ba tui rup 1 manyin brah, 1 drei manuk, jien, 2 mbaik pang jien haong 1 kalok alak. Saai Xa brei thau lac, thei ba asau, pabui, pabe mai mada hu urang dalam palei daong bayar mang prein yawa. 

Caga ka harei peih ngak Adat bah puh palei, lakei pak gai vầu glai piah ngak “phao ndao” piah patiaok bhut bhaong ablaik sayton ba tame bruk ngak adat. Tal harei, saai Hù Hu Xa haong dom urang vakil ka dom baoh sang ba alak hala kaya baoh mai labik ngak yang di akaok palei. Dom urang lakei khang kadang, sami samar tangin takai ngak ralo manuk ada pabe pabui asau. Gru yang tangin pan ndao kayau, dhan kayau sit, mbaok luk ia juk, tame yaok baoh sang ngak yang ka palei. Nao tal sang halei gru ngak yang tuh manyin alak dak tagok papan ieu yang, pok sap ieu bih angn urang dalam sang, urang vakil dalam sang laih tangei pabik tapa akaok gru ieu yang. Blaoh di nan urang jak gauk mek phui mek ciu ba tabiak akaok palei ayuh trun sa baoh gilai bè nứa piah nyu ba trun tui ia nduac. 

Abih ngak yang tame gah main bui raya sambai suka. Mik va bhap bini urang dalam palei main ralo janih main tui muk kei biak bui sambai. Urang dalam palei jeng ye tuai damuai urang mai main mbang huak haong gauk di bah mbang jang akaok palei. Taong abih ndap nda ba mai ngak yang mbang ka abih jeng ye oh brei ba tame palei dom ndap nda mbang labaih. Mbang huak blaoh, gru ngak yang daok adei, mek danah kreim klauk vil taom dar tame haluk, blaoh mek tangi haong aku asau klauk tame haluk yau ye brei khik caga bhut baong juai brei tame palei pahua mbak bala ka urang. Gru yang cuh apui blaoh palakao angaok apui blaoh meng gilac mai sang. Meng di harei nan mbiah tal 3 harei, urang krik urang kurei oh brei tame sang tame palei. Tui akaok UBND xã Liên Minh Phàn Phủ Seng, Adat Bah puh palei mbuan sanang biasa min mada ndam gam ralo ilamu adat cambat di bangsa urang Xa Phó. Ini lac jeng sa janih njauk caik hatai roh duah thau piah chreih chrai bui sambai hatai di adat cambat ilamu bangsa kita.