Taha palei, nghệ nhân Hồ Văn Bương lac sa dalam dom nghe nhan hu huyện Nam Trà My daa tame duah pataom, jhik ngak veik saong rik daong rilo panuac biak hu yaom glaong ka khan aw, ngui cuk, mek paraik pandap cuk ngak mekre di urang Ca Dong. Ong brei thau, khan aw di urang Ca Dong hu 4 sambo mau hu pandar rilo lac jhuk, bhong, kanjik saong mbong. Dom bingu la hu ngak rah tui jih aw, ndung bak dalam nan, lac hatai sahneng, sajarah, halau gha di bangsa.

Daok pandap ngui cuk di bangsa Xơ Đăng lac dom janih khố saong aw. Aw di urang likei lac aw glaoh meng akaok, tangin aw phluh jaik pa-ak. Pandap ngui cuk di urang kumei lac aw, khan, siuk ma-aom (siuk bara) saong yot bak anek. Bhian di nyu, aw di urang kumei Xê Đăng hu jhik takoi vil, abih blah aw tok hu dua jalan jhik biak kandauk di dua gah pa-ak. Piah ngak brei mekre jang, urang Xơ Đăng daok cuk amek paraik, yau ye kaong ban, talei takuai paraik, talei baoh nyuk patau kak ka-ing atau di takoi, abih di nyu nan lac dom pandap ngak mekre meng kan yau ye tagei, kakau di athur,… ngak jeng bruk karei jang di pandap ngui cuk di urang Xơ Đăng. Urang kumei Xơ Đăng tal umo jeng dara bhian mek blah khan ma-aom tapa rup yau brei ka dom likei dam thau lac drei ka oh hu pasang likei.

Meng kan, urang likei Xơ Đăng bhian cuk khố, oh cuk aw. Dalam dom harei rija rota, pandap ngui cuk di urang likei meda hu veik sa blah khan bai praong bhian kak anak cada ngan haong rilo bingu hala biak hadah. Dalam raidiuk yaok harei, khan aw ngui cuk di urang likei Xơ Đăng daok hu daong ka anek manuac hu mbuan lagaih dalam bruk ngak mbang, nao mai.

Ong Phạm Văn Thương, Phó akaok Jabat Ilamo – Khau tin huyện Nam Trà My brei thau lac, khan aw ngui cuk meng kan di urang Xơ Đăng lac janih ilamo bhap bini hadah krah, hu rilo janih, gheih mekre haong dom bingu hala, sambo mau, ndung bak ilamo di bhum taneh Nam Trà My.

Khan aw ngui cuk meng kan di urang Mơ Nâm rilo meng hu sambo mau jhuk, bhong, bingu la di khan aw hu ngak vil val khan, aw. Di urang kumei hu sa blah khan saong aw hu pambuak haong gauk, daong ka urang cuk gam gheih mekre, gam khang kadang, sami samar. Langiu di nan, urang kumei Mơ Nâm biak caik hatai tal pandap cuk ngak mekre yau ye parik tanye meng kayau atau meng kreim, talei takoi ngak meng ban. Pandap ngui cuk di urang likei bhian hu khố saong aw atah. Dalam dom harei roya meng kan, urang likei bhian cuk gam haong sa blah khan bai tambak anak cada.

Ong Trần Duy Dũng, Akaok UBND huyện Nam Trà My brei thau: “Bruk padang ngak veik saong brei tabiak mbaok 3 janih khan ao ngui cuk meng kan di nyaom urang Ca Dong, Xơ Đăng, Mơ Nâm piah pabak ka mikva cuk dalam dom harei roya di bangsa. Ini lac jalan peih tabiak ka dom thun anak tal, Nam Trà My jhul khang danak dak jhik ngak veik khan aw ngui cuk di mikva dom bangsa di pak ini. Tapa nan, pachreih rai ranaih, abih di nyu nan lac dom anek saih anek bhik di mikva dom bangsa cuk ngui yaok harei khan aw ngui cuk meng kan, rik daong khik ramik saong patagok dom yaom glaong ilamo di bangsa drei dalam raidiuk bahrau harei ini./.