Adat cakak mbuk saong caik angan ka anek lac sa adat praong di urang Cam Islam. Yaok uranaih ndih tapui tabiak jeng brei ngak adat ini. Urang Cam Islam mek angan di 25 Nabi piah caik angan ka uranaih likei saong dom angan karei dalam tapuk siphau piah caik angan ka uranaih kumei.

Kayua urang Cam Islam jia lac, hadei di tuk kayamat tal harei po Allah ba tabiak ginum jamrah, dom urang ini hu ieu tagok meng angan nan. Kayua yau nan ye ini lac sa adat oh kurang hu di uranaih Cam Islam.

Tui hukum Islam, hadei di tuk uranaih ndih tapui hu 7 harei, 14 harei atau 21 harei, siam di nyu brei ngak adat cakak mbuk, caik angan. Meyah sang kan kandah, oh hu jien padai piah ngak njauk tui dom harei yau nan, meda ngak tuk halei jeng hu, min jhui caik ka uraniah praong rilo thun.

Piah ngak cakak mbuk, caik angan ka uranaih, tui hukum brei ngak sa drei limo, atau pabe, atau sa drei menuk tano praong piah caik angan, bloh sik ralow ngak pandap mbang payak tuai damuai.

Tukvak ngak cakak mbuk, caik angan ka uranaih bhian lac tuk laho, hadei meng sambahyang zuhur bloh. Po sang, amaik ame di uraniah nao da-a ong Hakim, Imam, Tuan Tuan saong mikva dalam palei, gauk gar but pajaih mai ngak adat cakak mbuk, caik angan ka uranaih..

Tal mon tui panuac da-a, tuai ba gauk mai saong meda hadiah ka uranaih hasit jien padai, pandap me-in, atau khan ao bahrau piah mek patuah jamo ka uranaih nan…

Uranaih hu cuk khan ao bahrau, caik ndih ndang mangaok talam hu mbaik katrei, menyek mbau piah ka ong hakim saong dom ong taha hu angan je, cakak hasit mbuk, bloh luk manyek mbau tagok akaok brei patuah ka uranaih.

Piah ba tangin tame cakak mbuk, brei angan, ong Hakim sua urang ame caik angan hagait ka uranaih, bloh khan brei ka taong abih tuai hu mbaok di labik nan thau. Hadei di nan, tuk adat cakak mbuk, caik angan hu ngak salah bloh, ong Hakim pok panuac kamroi, dua plak tangin pok tagok, taong abih tuai damuai, dom urang hu mbaok di labik nan jeng pok tangin tagok tui panuac kamroi di ong Hakim, likau po Allah brei ka uraniah hu caik angan harei ini, hu kajap kro, umo atah, praong tagok hadah hadai hatai jai, bac da-a naih joi, siam mekre, salamat tal abih rai.

Kamroi bloh, pandap mbang hu ba tagok payak tuai damuai. Urang gam mbang, gam ndom klao bui sambai chreih chrai, tadhau ayuh ka po sang, ka amaik ame hu sa urang anek siam mekre, anit ranam.

Adat cakak mbuk, caik angan ka uarnaih, langiu di ilamu siam mekre meng kan mai di urang Cam Islam, tapa nan, daok brei mboh bruk jum pataom gauk, kak kajap talei rohim puk paga.

Adat ini, lavik lavik hu peih ngak iek di Palei ilamu dom bangsa di Hà Nội dalam praong prang./.