Bilan 10 – bilan 11 yaok thun, tuk phun padai angaok puh trak asar, mikva palei Krêl (xã Ia Krêl, huyện Đức Cơ, t.Gia Lai) pataom gauk ginum biai ngak adat ieu yang ia piah likau Yàng brei ka menuac sia dalam palei hu prein yava khang kadang, sa thun hajan siam hangin lagaih, padai brah bak gilang. Adat ini hu urang dalam palei peih ngak meng dom saman ini mai, jeng sa ilamu mekre hu mikva palei Krêl saong bhap bini Tây Nguyên khik ramik.

Taha palei Rơ Châm Bôm di palei Krêl, xã Ia Krêl umo labaih 80 thun khan lac, urang Gia Rai meng kan tuk padang palei bhian pilih ruah labik hu ia rilo yau ye jaik kraong, craoh piah pabak ka anek menuac saong piah pala drak. Piah thau dhar phor po yang, mikva dalam palei yaok thun hu ngak adat ieu yang ia saong likau sa thun bahrau hu prein yava khang kadang, hajan siam hangin lagaih, padai brah bak gilang…

Urak ini, urang Gia Rai di palei Ia Krêl hu 3 adat praong ieu yang dalam thun, lac: adat ieu yang ia, adat ieu yang sang rông, adat ieu yang sang kubo. Dalam nan, adat ieu yang ia lac adat praong abih kayua mikva sahneng lac, ia lac halau gha di bruk diukrai.

Tui panuac khan di taha Rơ Châm Bôm, adat ieu yang ia hu peih ngak pak di tapen ia di palei. Hu mbaok tame ngak adat hu 7 urang, dalam nan  3 urang dang tabiak ieu yang, 4 urang daong bruk ngak adat. Pandap ieu yang hu: pabui, menuk, brah ndiuk saong alak tapai… Hadei di tuk pabui, menuk hu ngak ralow blaoh, urang daong bruk ngak adat mek tai, sud, iku di dom drei athur nan haong 1 jeik alak praong caik tagok papan kakuh saong phun nêu di tapen ia. Tuk taong abih hu salah blaoh, dom gru peih ngak adat ieu yang.

Dalam pandiak ia harei kanyik katam di Tây Nguyên, dom gru ngak adat anak bruk hu mbaok di rilo menuac dalam palei. Tuk gru ngak salah adat, menuac palei Krêl ba gauk tame mbang menyum, urang pok da-a dom tuai praong menyum alak dahlau blaoh meng tal urang dalam palei. Piah ngak hu adat ini, taha palei, urang hu angan je saong dom urang jakar palei brei ginum biai tani tanat, hadei di nan meng khan brei menuac palei thau.  

Ong Rơ Mah Chel, urang hu angan je palei Krêl khan lac, yaok thun 1 mbang, urang dalam palei peih ngak adat ieu yang ia piah brei mboh hatai thau dhar phor po yang saong ngak jeng bruk jum pataom di mikva urang dalam palei. Menuac palei ndom lac, daok haong gauk lac sa halau gha, menyum sa halau ia saong hu bruk jum pataom gauk khang kajap. Bruk jum pataom nan hu kak kajap meng dom rai ini mai.

Rilo thun ini mai, urang dalam palei Krêl jeng khik ramik, peih ngak adat, khik ramik ilamu cồng chiêng. Gam haong nan, meng bruk sangka di dom pakat karja, hu daong ka bhap bini padang ngak veik dom adat ieu yang hu praong jang piah khik ramik ilamu meng kan di bangsa./.