Bangsa Lào lac sa dalam 19 bangsa daok dalam tỉnh Điện Biên. Hadei di tuk mai daok, padang puk palei, urang Lào di pak ini hu dak padang, khik ramik hu biak rilo ilamo karei di drei, ngan haong dom adat cambat meng kan, yau ye adat ieu yang palei, adat pilih ruah taneh ngak sang bahrau; adat uan lisei bahrau; adat likau hajan… Dalam nan, adei ieu yang palei (Căm bản) hu peih tabiak di tuk akaok thun (tui sakavi di urang bangsa Lào) piah hadar tal ong akaok ong kei, caong dom bruk patuah jamo, siam makre ka puk palei.

Harei peih ngak adat ieu yang palei, ong gru haong dom urang daong bruk ba pandap ieu yang tabiak labik ieu yang palei piah ramik caik jeng rilo salao pandap ieu yang. Yaok salao hu dom blah khan bai mbhong saong dom janih kaong tangin, kaong takuai, buk ia, hala panieng, dom janih baoh kayau, ralin, paok padai… Tal mong siam ong gru haong lambaok lac urang likei di dom baoh sang dalam palei raok ba pandap nao tal labik ieu yang, peih ngak di labik glai ginreih saong labik ieu yang di palei. Kapul raok gam nao gam taong ginang, taih chiêng. Tal labik ieu yang palei daok di mala phun praong, phun gireih- lac labik khik suan yava di puk palei, ong gru saong rahra ba tangin tame caga sik limo atau sik pabui, ngak dom drei athur paling yang piah ngak pandap mbang pathak caik tagok salao.

Dalam rilo salao pandap ieu jang hu parang tabiak, hu 3 salao praong piah da-a ong akaok ong kei, po yang… Adat ieu yang blaoh, ong gru meng ba pandap paling yang trun, mikva daok pataom gauk vil val mbang manyum, ndem mayai biak sambai saong tadhau ayuh ka gauk hu prein yava khang kadang, gaok patuah jamo, talei rohim pambuak gauk di puk palei dak khang kajap, jumpataom gauk. Hadei di adat ieu yang di glai ginreih, yaok rahra mai veik puk palei piah padeih padei, sua tangi rivang gauk, tadhau ayuh ka gauk saong peih dom kadha ma-in meng kan, daoh tamia.

Adat ieu yang palei di urang Lào meda hu peih tabiak dalam 5 harei atau 4 harei iek tui thun nan, puk palei sik limo atau sik pabui piah ngak adat ieu yang. Dalam dom harei peih tabiak adat ieu yang palei, yaok baoh sang oh brei manyim khan bai, oh ba phun hijao tame puk palei, oh naong ia bo  tok kateik meng tangin. Urang Lào saneng lac ngak yau nan, puk palei meda gaok patuah jamo, ngak padai hu padai, pala tangei hu tangei, raong glang hu siam lagaih jang.

Dalam dom harei ieu yang palei, sang po aw lac urang hu angan je, dang akaok puk palei tuk halei jeng caga  dom jeik tapai alak piah daa dom po yang khik iek puk palei mai bui sambai saong rahra dalam palei. Hadei di tuk daa alak, urang taha dalam palei saong jru ieu yang meda pok alak tagok peih mbaok ka harei pataom gauk, tadhau ayuh ka rahra dalam palei hu prein yava khang kadang, haniem phul.

Jala pandiak puac abih di harei ieu yang palei, di sang urang dang akaok puk palei, mikva ngak salao pataom suan yava ka po sang saong gru ieu yang. Lambaok ka dom baoh sang peih ngak adat kak marai tame tangin  ka po sang, ka ong gru saong tadhau ayuh hu prein yava. Dom rahra dalam puk palei hu anek matau likei, matau kumei meda dang akaok puk palei saong ong gru ngak adat salih angan. Meng urak ini, dom urang ini oh daok angan bo amaik ame caik brei, bo mek angan bo puk palei caik brei. Hadei di nan, rahra di puk palei ba gauk mbang manyum pataom mbaok gauk biak bui sambai. Di pak ini, yaok urang dalam palei gam tadhau ayuh ka gauk bui sambai, blaoh ba drei tame dom kadha daoh tamia meng kan piah pambuak talei rohim jumpataom gauk./.